ބަންގްލަދޭޝްގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަންގެ ބީޗް ވޮލީބޯލް ޓުއާގައި ރާއްޖޭގެ ދެ ޕެއާ ވެސް ކުޅުނު ފުރަތަމަ މެޗުން މޮޅުވެއްޖެ އެވެ.
މިއަދު ފުރަތަމަ މެޗުގައި ނުކުތީ ރާއްޖޭގެ ޝަމާއިލް ހުސެއިން އާއި އަހުމަދު މުހައްމަދު (ކޯކޭ)ގެ ޕެއާ އާއި ބަންގްލަދޭޝްގެ ނޫރު ނަބީ އާއި ޝައިފުއްދީންގެ ޕެއާ އެވެ. މި މެޗުން ޝަމާއިލް އާއި ކޯކޭގެ ޕެއާ ވަނީ 21-09، 21-12 އިން މޮޅުވެފަ އެވެ.
ރާއްޖޭގެ އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް)ގެ ޕެއާ ވަނީ ކިރްގިސްތާންގެ މެޑެޓްބެކް އޫލޫ އާއި ޒީންބެކް އޫލޫ އަތުން 21-12، 21-12 އިން މޮޅުވެފަ އެވެ.
މުބާރާތުގެ ފޯމެޓް ރޭވިފައި އޮތްގޮތުން، އަށް ޕެއާއެއް ވަނީ ދެ ގްރޫޕަކަށް ބަހާލައިފަ އެވެ. ކޮންމެ ގްރޫޕެއްގެ ގަދަ ދެ ޓީމު ސެމީ ފައިނަލަށް ދާ ގޮތަށެވެ. ފުރަތަމަ މެޗުތަކުން މޮޅުވުމުން ރާއްޖޭގެ ދެ ޕެއާ އަށް ވެސް ވަނީ ސެމީގެ ފުރުސަތު ބޮޑުވެފަ އެވެ.
ރާއްޖޭގެ ދެ ޕެއާ އަށް ވެސް މިއަދު އަދި އެއް މެޗު އެބައޮތެވެ. އެ ގޮތުން މެންދުރު ފަހު ސެޝަންގައި ރާއްޖޭގެ ކޯކޭ އާއި ޝަމާއިލްގެ ޕެއާ ބައްދަލުކުރާނީ ނޭޕާލްގެ ސުނަރު އާއި ޝްރެސްތާގެ ޕެއާއާ އެވެ. އަދި ކުޑަކާއްޓެ އާއި އެޑަމްގެ ޕެއާ ބައްދަލުކުރާނީ ބޫޓާންގެ ޑޯޖީ އާއި ޖިގްމޭގެ ޕެއާއާ އެވެ. މި މެޗުތަކުން މޮޅުވެއްޖެނަމަ ބާކީ މެޗެއް އޮއްވައި ސެމީ ޔަގީންވީ އެވެ.
ގްރޫޕްގެ ފަހު މެޗުގައި، މާދަމާ ޝަމާއިލް އާއި ކޯކޭގެ ޕެއާ ކުޅޭނީ ބަންގްލަދޭޝްގެ ބިސްވާސް އާއި ޕަވެލްގެ ޕެއާއާ އެވެ. އަދި އެޑަމް އާއި ކުޑަކާއްޓެގެ ޕެއާ ބައްދަލުކުރާނީ ބަންގްލަދޭޝްގެ މޮންސޫރާއި ހައިދަރުގެ ޕެއާއާ އެވެ.
