ލަންޑަން (ޑިސެމްބަރު 26) - އިނގިރޭސި ޕްރިމިއާ ލީގުގައި މިރޭ ޓޮޓެންހަމް ހޮޓްސްޕާސް އިން ފަހަތުން އަރައި، 2-2 އިން ބްރެންޓްފޯޑާ އެއްވަރުކޮށް ޕޮއިންޓެއް ހޯދައިފި އެވެ.
މިިއީ މިދިޔަ މަހު 20 އިން މި މަހު 18 އަށް ކުރިއަށް ދިޔަ ފީފާ ވޯލްޑް ކަޕް ފުޓްބޯޅަ މުބާރާތަށް، އިނގިރޭސި ޕްރިމިއާ ލީގު މެދުކަނޑާލުމަށް ފަހު، އަލުން ފަށައިގެން ކުޅުނު ފުރަތަމަ މެޗެވެ. މި މެޗުން ލިބުނު ޕޮއިންޓާ އެކު، ޓޮޓެންހަމް ހަތަރެއްގައި އޮތީ 16 މެޗުން 30 ޕޮއިންޓް ހޯދައިގެންނެވެ.
އެންމެ ފަހުން ކުޅުނު ހަތް މެޗުން އެއް ފަހަރު ބަލިވި، ބްރެންޓްފޯޑް، މިރޭ ލިބުނު ޕޮއިންޓާ އެކު ލީގުގެ ނުވަ ވަނަ އަށް ޖެހިލީ 16 މެޗުން 20 ޕޮއިންޓް ހޯދައިގެންނެވެ.
ބްރެންޓްފޯޑްގެ ދަނޑު، ޖީޓެކް ކޮމިއުނިޓީ ސްޓޭޑިއަމްގައި ކުޅުނު މެޗު ފަށައިގެން، 15 ވަނަ މިނިޓްގައި އެ ޓީމުން ލީޑުނެގި އެވެ. މި ލަނޑު ޖެހީ ޓޮޓެންހަމްގެ ގޯލުގައި ހުރި ފްރޭޒާ ފޮސްޓާ އަތުގައި ޖެހިފައި ނުކުތް ރީބައުންސް ބޯޅަ ގޯލަށް ވައްދާލައިގެން، ވައިޓާލީ ޔަނެލްޓް ޖެހި ގޯލުންނެވެ. ފުރަތަމަ ހާފުގައި ބްރެންޓްފޯޑްގެ އައިވާން ޓޯނޭ ގޯލެއް ޖެހި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމީ އޮފްސައިޑް ކަމަށެވެ.
ޓޮޓެންހަމްގެ ސޮން އަތުން ބޯޅަ ހޯދަން ބްރެންޓްފޯޑްގެ ނޯގާޑް މަސައްކަތް ކުރާއިރު، ޓޮޓެންހަމްގެ ކޭން ކައިރީގައި.
އެކަމަކު، ދެ ވަނަ ހާފުގެ ކުޅުން ފެށިގެން، ނުވަ މިނިޓް ތެރޭ ބްރެންޓްފޯޑުން ލީޑުފުޅާކުރި ގޯލު ޖެހީ ޓޯނޭ އެވެ. މިއީ ކޯނަރެއްގައި އޭރިއާތެރެއަށް ހުރަސްވި ބޯޅައަކުން، ކްރިސްޓިއަން ނޯގާޑް ޖައްސާލި ބޯޅަ ގޯލަށް ވައްދާލައިގެން، ޓޯނޭ ޖެހި ލަނޑެކެވެ.
ޓޮޓެންހަމަށް ދިރުމެއް ލިބުނީ މެޗުގެ 65 ވަނަ މިނިޓްގައި ހެރީ ކޭން ޖެހި ގޯލުންނެވެ. ކްލެމެންޓް ލޯންގްލޭ ނެގި ހުރަހަކަށް ފުންމައިގެން އަރައި، ކޭން ވަނީ ބޮލުން ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ. އޭގެ ހަ މިނިޓް ފަހުން، ޓޮޓެންހަމުން ނަތީޖާ ހަމަހަމަކުރި ގޯލު ޖެހީ ޕިއޭ އެމީލް ހޮއިބިއާ އެވެ. މިއީ އޭރިއާތެރެއިން ޑޭޖާން ކުލުސެވްސްކީ ނެގި ބޯޅައެއް ބްރެންޓްފޯޑް ކުޅުންތެރއަކު ފައިގައި ޖެހިފައި ލިބުމުން، ހޮއިބިއާ ޖެހި ގޯލެކެވެ.
މެޗުން މޮޅުވާން ޓޮޓެންހަމުން ކުރި މަސައްކަތުގައި އެ ޓީމަށް ތިން ވަނަ ގޯލެއް ޖަހައިދިނުމާ އެންމެ ގާތަށް ޖެހިލީ ކޭން އެވެ. ކޭން ބޮލުން ޖެހި ބޯޅައެއް އަމާޒުވީ ގޯލުގެ ހުރަސްދަނޑިއަށެވެ. ބްރެންޓްފޯޑް މޮޅުކޮށްދޭން އޭރިއާތެރެއިން އެ ޓީމުގެ ޓޯނޭ އަށް ލިބުނު ފުރުސަތުން އޭނާ ޖެހި ބޯޅަ ދިޔައީ ހުރަސްދަނޑިމަތިންނެވެ.
މެޗުގެ އިތުރު ވަގުތުގައި ޓޮޓެންހަމްގެ ސޮން ހެއުން މިން އޭރިއާ ބޭރުން ޖެހި ބޯޅަ ބްރެންޓްފޯޑްގެ ސްޕެއިން ގޯލްކީޕަރު، ޑޭވިޑް ރާޔާ ވަނީ މަތަކޮށްފަ އެވެ.
މި މެޗު ފެށުމުގެ ކުރިން ބްރެންޓްފޯޑް ސަޕޯޓަރުން ވަނީ ކޭންއާ ދިމާކޮށްލައިފަ އެވެ. އެއީ ދާދި ފަހުން ނިމުނު ވޯލްޑް ކަޕް ފުޓްބޯޅަ މުބާރާތުގެ ކުއާޓާ ފައިނަލުގައި ފްރާންސް އަތުން އިންގްލެންޑް ބަލިވިއިރު، ނަތީޖާ ހަމަހަމަކުރަން ލިބުނު ޕެނަލްޓީ ކޭން އަތުން ނާކާމިޔާބު ވުމުންނެވެ. ބްރެންޓްފޯޑް ސަޕޯޓަރުން އުޑުއުފުލިއިރު، ބުނެފައިވަނީ ކޭން އަތުން އެ ބޭކާރުވި ޕެނަލްޓީ ޓޯނޭ ކާމިޔާބު ކުރާނެ ކަމަށް ބުނެ އެވެ. ޓޯނޭ، ވޯލްޑް ކަޕްގެ ސްކޮޑަށް ނުނަގަ އެވެ.
އިނގިރޭސި ޕްރިމިއާ ލީގުގައި މިރޭ އިތުރު ހަ މެޗެއް ކުޅޭނެ އެވެ.
