ދޯހާ، ގަތަރު (ޑިސެމްބަރު 17) - މިހާރު ގަތަރުގައި ކުރިއަށްދާ ފީފާ ވޯލްޑް ކަޕް ފުޓްބޯޅަ މުބާރާތުގައި ވާދަކުރާ ގައުމުތަކަށް ކްލަބްތަކުގެ ކޮންޓްރެކްޓްގައި ތިބި ކުޅުންތެރިން ވީއްލައިގެން، "ފީފާ ކްލަބް ބެނިފިޓް ޕްރޮގްރާމް"ގެ ތެރެއިން އެންމެ ބޮޑު އާމްދަނީއެއް ލިބޭ ކްލަބަކަށް އިނގިރޭސި ޗެމްޕިއަން މެންޗެސްޓާ ސިޓީ ވެއްޖެ އެވެ.
މީޑިއާ ރިޕޯޓްތައް ބުނާގޮތުން މި ފަހަރު ފީފާ ކްލަބް ބެނިފިޓް ޕްރޮގްރާމްގެ ތެރެއިން ކްލަބްތަކަށް ޖުމްލަ އެކު، 209 މިލިއަން ޑޮލަރު ދޫކުރާނެ އެވެ. މި ފައިސާ އަކީ ވޯލްޑް ކަޕްގެ މުއްދަތަށް ކުޅުންތެރިންގެ ކޮންޓްރެކްޓުން ވީއްލައިގެން ގައުމީ ޓީމުތަކަށް ކުޅެން ޖެހޭތީ، އެ މުއްދަތަށް ކޮންޓްރެކްޓްގައި ބުނާ ފައިސާގެ އަދަދުން ޖެހޭ ވަރު ކްލަބްތަކަށް ދިނުމަށް ފީފާ އިން ކުރިއަށްގެންދާ ޕްރޮގްރާމެކެވެ.
މެންޗެސްޓާ ސިޓީގެ 16 ކުޅުންތެރިއަކު ވަނީ މި ފަހަރުގެ ވޯލްޑް ކަޕްގެ އެކި ގައުމުތަކަށް ކުޅެފަ އެވެ. މުބާރާތުގެ ފަހު ދެ މެޗު ދެން އޮތްއިރު، މިހާތަނަށް ޓީމުތައް ގޮސްފައިވާ ހިސާބަށް ބަލާއިރު، ކްލަބް ބެނިފިޓް ޕްރޮގްރާމުން އެންމެ ބޮޑު އާމްދަނީއެއް ލިބެނީ ސިޓީ އަށެވެ. އެ ގޮތުން ސިޓީ އަށް 5.58 މިލިއަން ޑޮލަރު ލިބޭނެ އެވެ.
ވޯލްޑް ކަޕްގެ ފައިނަލުގައި ކުޅޭ ސިޓީގެ ކުޅުންތެރިއަކީ އާޖެންޓީނާގެ ޒުވާން ފޯވާޑް ހޫލިއަން އަލްވަރޭޒް އެވެ. އޭނާ ވަނީ މިހާތަނަށް މި ފަހަރުގެ މުބާރާތުގައި ހަތަރު ގޯލު ޖަހައިފަ އެވެ.
ބާސެލޯނާ އިން 17 ކުޅުންތެރިން ވޯލްޑް ކަޕްގައި ކުޅުނު ކަމުގައި ވިޔަސް އެ ޓީމަށް ޖެހެނީ 4.1 މިލިއަން ޑޮލަރެވެ. އެއީ އެ ޓީމުގެ ގިނަ ކުޅުންތެރިންތަަކަކަށް މާ އަވަަހަށް ވޯލްޑް ކަޕް ނިމިފައިވާތީ އެވެ. ބާސެލޯނާގެ 17 ކުޅުންތެރިންގެ ތެރެއިން އަށް ކުޅުންތެރިން ތިބީ ސްޕެއިން ސްކޮޑުގަ އެވެ. އެ ކުޅުންތެރިންނަށް ގަދަ 16 ބުރުން މޮރޮކޯ އަތުން ބަލިވެ ވަނީ މުބާރާތް ނިމިފަ އެވެ.
