މެޑްރިޑް (ޑިސެމްބަރު 16) - މި ފަހަރުގެ ފީފާ ވޯލްޑް ކަޕްގައި ސްޕެއިން ގައުމީ ފުޓްބޯޅަ ޓީމުގެ ކެޕްޓަން ބޭންޑް އަޅައިގެން ކުޅުނު މިޑްފީލްޑަރު، ސާޖިއޯ ބުސްކެޓްސް ގައުމީ ޓީމުން ރިޓަޔާކޮށްފި އެވެ.
ސްޕެއިން ޓީމަށް ކުޅުން ހުއްޓާލިކަން ބުސްކެޓްސް، މިއަދު އިއުލާނުކުރިއިރު، ކްލަބް ފުޓްބޯޅައިގައި އޭނާ ކުޅެމުން އަންނަ ބާސެލޯނާ ދޫކޮށްލަން އުޅޭ ވާހަކަތައް ވެސް އަންނަނީ ދެކެވެމުންނެވެ.
"ގާތްގަނޑަކަށް 15 ވަރަކަށް އަހަރު ގައުމީ ޓީމަށް ކުޅެ، މި ޓީމުގައި ހޭދަކުރި 143 މެޗުގައި ވެސް އަހަރެން މަސައްކަތް ކުރީ ޓީމުގެ ހައްގުގައި، މިއީ ގައުމީ ޓީމާ ދުރަށް ޖެހިލަން އެންމެ ރަނގަޅު ވަގުުުތު ކަމަށް އަހަންނަށް ގަބޫލުކުރެވެނީ،" 34 އަހަރުގެ ބުސްކެޓްސް ބުންޏެވެ.
ބުސްކެޓްސް އަކީ ސްޕެއިން ގައުމީ ޓީމާ އެކު 2010 ވަނަ އަހަރުގެ ފީފާ ވޯލްޑް ކަޕާއި 2012 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ޗެމްޕިއަންކަން ހޯދި ކުޅުންތެރިއެކެވެ. ބުސްކެޓްސް އަކީ އޭރުގެ ސްކޮޑަށް ބަލާއިރު، އެންމެ ފަހުން ރިޓަޔާމަންޓް އިއުލާނުކުރި އެއް ކުޅުންތެރިޔާ އެވެ.
މި ފަހަރުގެ ވޯލްޑް ކަޕްގައި ސްޕެއިން ޓީމުގެ މެޗެއްގެ ތެރެއިން ބުސްކެޓްސް.
ސްޕެއިން ގައުމީ ޓީމަށް ބުސްކެޓްސް އަށް ވުރެ ގިނަ މެޗު ކުޅެދިނީ ދެ ކުޅުންތެރިއެކެވެ. އެއީ 167 މެޗު ކުޅެދިން، 2010 ވަނަ އަހަރުގެ ކެޕްޓަން، ކުރީގެ ކީޕަރު އިކާ ކަސިއަސް އާއި މި ފަހަރުގެ ވޯލްޑް ކަޕް ސްކޮޑުން ފުރުސަތު ނުލިބުނު ސާޖިއޯ ރާމޯސް އެވެ. ރާމޯސް ވަނީ ސްޕެއިން ޓީމަށް 180 މެޗު ކުޅެދީފަ އެވެ.
"ގައުމީ ޓީމުގައި ހޭދަކުރި ކޮންމެ ވަގުތެއް ވަރަށް ހާއްސަ، ދުނިޔޭގެ ޗެމްޕިއަނަކަށް، ޔޫރަޕްގެ ޗެމްޕިއަނަކަށް އަހަންނަށް ވެވުނު، އެންމެ ފަހުން ސްޕެއިން ޓީމުގެ ކެޕްޓަންކަން ވެސް ކޮށްފައި، ކުޅުން ހުއްޓާލާއިރު، މިއީ އަހަރެން ފަހުރުވެރިކަމާ އެކު ފާހަގަކުރާނެ ކަމެއް،" ބުސްކެޓްސް ބުންޏެވެ.
ބުސްކެޓްސް އަށް ސްޕެއިން ޓީމުން އެންމެ ފުރަތަމަ ފުރުސަތު ދިނީ 2019 ވަނަ އަހަރު ސްޕެއިންގެ އޭރުގެ ކޯޗު ވިސެންޓޭ ޑެލް ބޮސްކޭ އެވެ. އެއީ ވޯލްޑް ކަޕް ކޮލިފައިންގައި ތުރުކީއާ ދެކޮޅަށް ކުޅުނު މެޗެއްގަ އެވެ. ބުސްކެޓްސް ވަނީ ސްޕެއިން ޓީމަށް ދެ ގޯލު ޖަހައިދީފަ އެެވެ. އޭނާ ގައުމީ ޖޯޒީގައި ފެނިގެންދިޔަ އެންމެ ފަހު މެޗަކީ މި ފަހަރުގެ ވޯލްޑް ކަޕްގެ ގަދަ 16 ބުރުގައި ސްޕެއިނުން ޕެނަލްޓީ ޖަހައިގެން މޮރޮކޯ އަތުން ބަލިވި މެޗުގަ އެވެ.
