ޒާހިރު ނަސީރު މެމޯރިއަލް ބާސްކެޓްބޯޅަ ޗެމްޕިއަންޝިޕްގެ ފިރިހެން ޑިވިޝަނުގެ ފައިނަލުގައި ރޭ ރެޑްވިންގްސް ބާސްކެޓްބޯލް ކްލަބް ބަލިކޮށް ޓީރެކްސް ބާސްކެޓްބޯލް ކްލަބުން މުބާރާތުގެ ޗެމްޕިއަންކަން ހޯދައިފި އެވެ.
ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު ފައިނަލް މެޗު ފޯރިގަދަ ކުޅުމަކަށް ފަހު ޓީރެކްސް އިން ކާމިޔާބުކުރީ 50-54 ޕޮއިންޓުންނެވެ.
މެޗު ފަށައިގެން ދެ ޓީމުގެ ފަރާތުން ވެސް ލީޑެއް ނަގައި ހަމަޖެހިލަން ބޭނުންވާތީ ފެނިގެންދިޔައީ އަވަސް ކުޅުމެކެވެ. ރެޑްވިންގްސްގެ ޒުވާން ކުޅުންތެރިން ކައިރިގައި ޓީރެކްސްގެ ތަޖުރިބާކާރު ކުޅުންތެރިން ރަނގަޅު ކުޅުމެއް ދައްކައި، ފުރަތަމަ ކުއާޓާ ނިންމާލީ، 17-21 އިން ލީޑުގައި އޮވެ އެވެ.
އެކަމަކު، ދެ ވަނަ ކުއާޓާގައި ރެޑްވިންގްސް އިން ކުޅުން ރަނގަޅުކުރިއެވެ. ރެޑްވިންގްސް އިން ދެ ވަނަ ކުއާޓާ މެދު ތެރެއިން 27-25 އިން ލީޑުނަގައި، މި ކުއާޓާ ނިންމާލިއިރު، އޮތީ، 29-25 އިން ކުރީގަ އެވެ.
ޓީރެކްސް އާއި ރެޑްވިންގްސް ރޭ ކުޅުނު ފައިނަލް މެޗުގެ ތެރެއިން: ރެޑްވިންގްސްގެ ޒައިދާން (ކ) ކައިރިން ޓީރެކްސްގެ ވިލްދާން ބޯޅަ ހިފައިގެންދަނީ
ދެ ވަނަ ކުއާޓާގައި ދެއްކި ކުޅުން ރެޑްވިންގްސް އިން ވަނީ ތިން ވަނަ ކުއާޓާ ފެށިއިރު ވެސް ތަކުރާރުކޮށްފަ އެވެ. ނަތީޖާ އަަކަށްވީ ރެޑްވިންގްސް އިން މި ކުއާޓާ ފެށިގެން ހަތް ޕޮއިންޓުގެ ލީޑެއް ނެގުމެވެ. އެކަމަކު، އަލީ ފަޒްލީ (އޮލިމްޕިކް)ގެ އިރުޝާދުގެ ދަށުން ކުުޅުނު ޓީރެކްސް އިން ބަދަލުތަކެއް ގެނެސްގެން، މެޗުގެ ތެރެއަށް އެނބުރި އަ އެވެ. އަދި ކުއާޓާ ނިންމާލީ 41-41 އެއްވަރުވެގެންނެވެ.
ނަތީޖާ ނެރުނު ކުއާޓާގައި ޓީރެކްސް އިން ވަރަށް ރަނގަޅަށް ތަޖުރިބާގެ ބޭނުންކޮށްގެން ކުޅުނެވެ. އެ ޓީމުން ޕްރެޝަރު ވަގުތުތަކުގައި ވެސް ހަމަޖެހިގެން ކުޅުމުގެ ނަތީޖާ އަކަށްވީ 50-54 އިން މެޗުން މޮޅުވުމެވެ. މި ކުއާޓަރުގައި ރެފްރީ ވަނީ ޓީރެކްސްގެ އިބްރާހިމް އަންފާލް ޝަރީފް (އަންޓެ) އާއި އިސްމާއިލް ވިލްދާނަށް ފިޔަވަޅު އަޅައިފަ އެވެ.
ރޭގެ މެޗުގައި ޓީރެކްސް ޓީމަށް އެންމެ ރަނގަޅު ކުޅުމެއް ދެއްކީ 22 ޕޮއިންޓް އެއްކުރި އަހުމަދު ފިރާޝް އެވެ. ފިރާޝް އަށް ވަނީ މުބާރާތުގެ އެންމެ މޮޅު ކުޅުންތެރިޔާގެ މަގާމު ވެސް ލިބިފަ އެވެ. އެ ޓީމުން ދެން އެންމެ ރަނގަޅު ކުޅުމެއް ދެއްކީ އެ ޓީމަށް އެންމެ ގިނަ ރީބައުންޑް ނަގައިިދިން، މުހައްމަދު ހުވައިލިދު އަލީ (ހުވޭ) އެވެ. ހުވޭ ވަނީ ރީބައުންޑުން ހަތް ޕޮއިންޓް ސްކޯކޮށްފަ އެވެ.
ރޭގެ ފައިނަލް މެޗަށް ފަހު ރަނަރަޕަށް ދިޔަ ރެޑްވިންގްސް ޓީމު މެޑަލް އަޅައިގެން ފޮޓޯއަކަށް ހުއްޓިލައިގެން.
މި މުބާރާތުގައި ރެޑްވިންގްސް އިން ޖުމްލަކޮށް ބަލާއިރު މޮޅު ކުޅުމެއް ދެއްކި އެވެ. ރޭގެ މެޗުގައި ރެޑްވިންގްސް އަށް އެންމެ ރަނގަޅަށް ކުޅެދިނީ، 14 ޕޮއިންޓް ސްކޯކުރި އަހުމަދު ލައިލް ޝިފާން އެވެ.
އޭގެ އިތުރުން މެޗުގައި އެންމެ ގިނައިން ރީބައުންޑް ކާމިޔާބުކުރި ކުޅުންތެރިއަކީ، ރެޑްވިންގްސްގެ ޝިރުފާން އަހުމަދު އެވެ. އޭނާ ވަނީ ރީބައުންޑުން އެކަނި 13 ނަގައިދީފަ އެވެ.
މަރުހޫމް ޒާހިރު ނަސީރު މެމޯރިއަލް ބާސްކެޓްބޯޅަ ޗެމްޕިއަންޝިޕަކީ ދާދި ފަހުން ނިމުނު އެމްބީއޭ ޗެމްޕިއަންޝިޕުގައި ރަނގަޅު ނަތީޖާ ނެރުނު ކުލަބްތަކާ އެކު މުޅިން އަލަށް ބާސްކެޓްބޯޅަ އެސޯސިއޭޝަން އޮފް މޯލްޑިވްސް އިން ކުރިއަށްގެންދިޔަ މުބާރާތެކެވެ. ލަންކާގެ ޓީމުތައް ވެސް ވާދަކުރި މި މުބާރާތުގެ އަންހެން ޑިވިޝަނުގެ ޗެމްޕިއަންކަން ހޯދީ ކުއީންސް ބާސްކެޓްބޯލް ކްލަބް އެވެ.
