ދޯހާ، ގަތަރު (ޑިސެމްބަރު 16) - ގަތަރުގައި މިހާރު ކުރިއަށްދާ ފީފާ ވޯލްޑް ކަޕް ފުޓްބޯޅަ މުބާރާތުން އަންހެން ތިން ރެފްރީ އަކާއި އެސިސްޓަންޓުންނަށް ފުރަތަމަ ފަަހަރަށް ފުރުސަތު ދިންއިރު، މި ފަހަރު މި ދިން ފުރުސަތާ އެކު މުސްތަގުބަލުގައި މި ފަދަ ކަންކަން ގިނަ ވާނެ ކަމުގެ އުންމީދު އެބައޮތް ކަމަށް ޖަޕާނުގެ އަންހެން ރެފްރީ، ޔޮޝީމީ ޔަމަޝީޓާ ބުނެފި އެވެ.
ވޯލްޑް ކަޕަކުން ފެނުނު ފުރަތަމަ އަންހެން ތިން ރެފްރީންނަކީ ޔޮޝީމީގެ އިތުރުން ފްރާންސްގެ ސްޓެފަނީ ފްރަޕާޓާއި ރުވާންޑާގެ ސަލީމާ މުކަންސަންގާ އެވެ. އަންހެން ތިން އެސިސްޓަންޓް ރެފްރީންނަކީ ބްރެޒިލްގެ ނެއުޒާ ބެކް، މެކްސިކޯގެ ކަރެން ޑިއާޒް މެޑީނާ އަދި އެމެރިކާގެ ކެތަރިން ނެސްބިޓް އެެވެ. އަންހެން ރެފްރީން ހަތަރު ވަނަ އޮފިޝަލެއްގެ ގޮތުގަޔާއި ވީޑިއޯ އެސިސްޓަންޓް ރެފްރީ (ވީއޭއާރް)ގަޔާއި ސީދާ މެޗު ރެފްރީގެ ގޮތުގައި ވެސް މި ފަހަރު ވަނީ ފެނިފަ އެވެ.
އެ ގޮތުން، ފްރަޕާޓް ވަނީ ގްރޫޕް ސްޓޭޖުގައި ކޮސްޓަ ރިކާ އާއި ޖަރުމަނު ކުޅުނު މެޗުގައި ރެފްރީކަން ކޮށް ފިރިހެނުންގެ ވޯލްޑް ކަޕެއްގައި ރެފްރީކަން ކުރި ފުރަތަމަ އަންހެން ރެފްރީގެ ޝަރަފް ހޯދައިފަ އެވެ.
މި ފަހަރުގެ ވޯލްޑް ކަޕް މެޗެއްގެ ތެރެއިން ޔޮޝީމީ: އޭނާ ވަނީ ވޯލްޑް ކަޕްގެ ހަ މެޗެއްގައި ބަދަލު ރެފްރީއެއްގެ ގޮތުގައި މަސައްކަތްކޮށްފައި.
ޖަޕާނުގެ ރެފްރީ، ޔޮޝީމީ އަަށް މެޗު ރެފްރީއަކަށް މަސައްކަތް ކުރުމުގެ ފުރުސަތު ނުލިބުނު ކަމުގައި ވިޔަސް ގްރޫޕް ސްޓޭޖުގެ ހަ މެޗެއްގައި އޭނާ ވަނީ ހަތަރު ވަނަ ރެފްރީއެއްގެ ގޮތުގައި މަސައްކަތްކޮށްފަ އެވެ.
"(އަންހެން ރެފްރީންނަށް) މުސްތަގުބަލު އުޖާލާވާނެ ކަމުގެ ގިނަ މަންޒަރުތަކެއް މި ވޯލްޑް ކަޕުން ފެނިގެންދިޔަ، އަހަރެން ބޭނުންވަނީ މި ހުޅުވުނު ދޮރުން، ފިރިހެނުންގެ ގިނަ މުބާރާތްތަކުން އަންހެން ރެފްރީން ފެނުން،" އޭޝިއާ ލެވަލްގެ ގިނަ މުބާރާތްތަކެއްގައި ރެފްރީކަން ކުރި ޔޮޝީމީ ބުންޏެވެ.
ޖަޕާނުގެ އަންހެން ފުޓްބޯޅައިގެ ގިނަ މުބާރާތްތަކާއި އޭޝިއާގެ ގިނަ މެޗުތަކެއްގައި ރެފްރީކަން ކުރި ޔޮޝީމީ ވަނީ 2019 ވަނަ އަހަރު ބޭއްވި އަންހެން ވޯލްޑް ކަޕާއި މިދިޔަ އަހަރުގެ އޮލިމްޕިކްސްގައި ރެފްރީކަން ކޮށްފަ އެވެ. ޔޮޝީމީ ވަނީ މި އަހަރު، އޭޝިއާގެ ކްލަބް ފުޓްބޯޅައިގެ އެންމެ ބޮޑު މުބާރާތް ކަމަށްވާ އޭއެފްސީ ޗެމްޕިއަންސް ލީގުގެ މެޗެއްގައި ވެސް ރެފްރީކަން ކޮށް، އެ މުބާރާތުގެ ތާރީހުގައި މެޗެއްގެ ރެފްރީކަން ކުރި ފުރަތަމަ އަންހެން ރެފްރީގެ ޝަރަފް ހޯދައިފަ އެވެ.
މި ފަހަރުގެ ވޯލްޑް ކަޕުން ދުނިޔެ އަށް އަންހެން ރެފްރީންގެ ކިބައިގައި ގާބިލުކަން އެބަހުރިކަން ސާފުވެގެންދިޔަ ކަމަށާއި އެއީ އިތުބާރު ހޯދައިގެން ދެން ތިބި އަންހެން ރެފްރީން ވެސް ކުރިއަށްދިއުމަށް އަޒުމު ކަނޑައަޅަން ޖެހޭ ސަބަބެއް ކަމަށް ޔޮޝީމީ ވަނީ ބުނެފަ އެވެ.
