ދޯހާ، ގަތަރު (ޑިސެމްބަރު 15) - މޮރޮކޯގެ ފުޓްބޯޅަ ތަރި ހަކީމް ޒިޔެޗް އަށް މި ފަހަރުގެ ފީފާ ވޯލްޑް ކަޕްގައި ވާދަކޮށްގެން ލިބޭ ބޯނަސް ވެސް އެ ގައުމުގައި އެހީ އަށް ބޭނުންވެފައިވާ ފަރާތްތަކަށް ސަދަގާތް ކުރަން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ޒިޔެޗް، 29، މޮރޮކޯ ގައުމީ ޓީމަށް ކުޅެން ފެށީ 2015 ވަނަ އަހަރުގެ އޮކްޓޫބަރު މަހުން ފެށިގެންނެވެ. އޭގެ ފަހުން މިހާތަނަށް ޒިޔެޗް ގައުމީ ޓީމަށް 49 މެޗު ކުޅެދީފައިވާއިރު، އޭނާ ގައުމީ ޓީމަށް ކުޅެނީ ހިލޭ ސާބަހަށެވެ. ގައުމީ ޓީމަށް ކުޅޭ ފަހަރުތަކުގައި ބޯނަހެއް ލިބޭނަމަ ހަދިޔާކުރަނީ ބޭނުންޖެހިފައިވާ ފަރާތްތަކަށެވެ.
އަރަބި ހަބަރުތައް ގެނެސްދޭ މިޑިއާތަކުން ރިޕޯޓްކުރާގޮތުގައި މި ފަހަރުގެ ވޯލްޑް ކަޕްގެ ސެމީ ފައިނަލުން މޮރޮކޯ އަށް ޖާގަ ލިބުމާ އެކު، ވޯލްޑް ކަޕްގެ ގަދަ ހަތަރު ޓީމުގެ ތެރޭގައި މޮރޮކޯ ހިމެނުމާ އެކު އެ ގައުމުގެ ފުޓްބޯޅަ އެސޯސިއޭޝަނުން ކޮންމެ ކުޅުންތެރިއަކަށް ބޯނަހެއް ދޭ ގޮތަށް ވަނީ ހަމަޖެހިފަ އެވެ.
އެ ގޮތުން ޒިޔެޗް އަށް ވެސް ބޯނަހުގެ ގޮތުގައި ގާތްގަނޑަކަށް 325،000 ޑޮލަރު ލިބެ ކަމަށް ރިޕޯޓްތައް ބުނެ އެވެ.
ރިޕޯޓްތައް ބުނާގޮތުން ޒިޔެޗް އެ ފައިސާ ހަދިޔާކުރާނީ މޮޮރޮކޯގައި އެހީ އަށް ބޭނުންވެފައިވާ ފަރާތްތަކަށެވެ.
އަރަބި ނޫސްވެރިއެއް ކަމަށްވާ ހާލިދު ބޭދޫން ރިޕޯޓްކުރާގޮތުގައި، ޗެލްސީ އަށް ކުޅެމުން އަންނަ ޒިޔެޗް އަކީ މޮރޮކޯ ގައުމީ ޓީމުގެ ކުޅުންތެރިންނަށާއި ސްޓާފުންނަށް އެހީތެރިކަން ފޯރުކޮށްދިނުމުގައި ވެސް ނަމޫނާ ކުޅުންތެރިއެކެވެ.
އެ ގޮތުން، ޒިޔެޗަށް ފުޓްބޯޅަ ކުޅެގެން ލިބޭ މުސާރައިގެ ވަކި ވަރެއް އަބަދުވެސް ޗެރިޓީ އާއި ގާތް މީހުންގެ ތެރެއިން އެހީ އަށް ބޭނުންވާ ފަރާތްތަކަށް ހަދިޔާކުރެ އެވެ. މީގެ ކުރިން ޒިޔެޗް ވަނީ މޮރޮކޯގެ ހޮސްޕިޓަލްތަކާއި އާދައިގެ ފުޓްބޯޅަ ކްލަބްތަކަށް ވެސް މާލީ ގޮތުން އެހީތެރިކަން ފޯރުކޮށްދީފަ އެވެ.
