މެންޗެސްޓާ، (ޑިސެމްބަރު 15) - އިނގިރޭސި ޕްރިމިއާ ލީގުގެ އެންމެ ކާމިޔާބު ކުލަބު ކަމަށްވާ މެންޗެސްޓާ ޔުނައިޓެޑް ވިއްކާލުމަކީ މި ވަގުތު ކުލަބަށް އެންމެ ރަނގަޅު ގޮތްކަމަށް އެ ކުލަބުގެ ކޯޗު އެރިކް ޓެން ހާގް ބުނެފި އެވެ.
މެންޗެސްޓާ ޔުނައިޓެޑްގެ މިހާރުގެ ވެރިންނަކީ އެމެރިކާގެ ބިލިއަނަރުން ކަމަށްވާ ގްލޭޒާ އާއިލާ އެވެ. ގްލޭޒާސް އިން 2005 ވަނަ އަހަރު ޔުނައިޓެޑް ގަތީ 1.34 ބިލިއަން ޑޮލަރަށެވެ. އެހެން ނަމަވެސް ފަހަކަށް އައިސް ކުލަބުގެ މާލީ ހާލަތު ދަށްވެ އެކުލަބު ވިއްކާލުމުގެ ވިސްނުން ގެންގުޅެމުން އަންނަކަމަށް ގްލޭޒާ އާއިލާއިން ވަނީ މިދިޔަ މަހު ހާމަކޮށްފަ އެވެ.
ޔުނައިޓެޑް ވިއްކާލުމާ ގުޅޭގޮތުން ކޯޗު އެރިކް ޓެން ހާގަށް އަމާޒުވި ސުވާލުތަކަށް ޖަވާބުދެމުން އޭނާ ބުނީ ކުލަބަށް މި ވަގުތު އެ ކަހަލަ ބަދަލެއް މުހިންމު ކަަމަށް ދެކޭ ކަމަށެވެ.
އޭނާ ބުނީ އާ ބަޔަކު ހަވާލުވުމުން ކުލަބުގެ ކުރިއެރުމަށް އިތުރު ފައިސާ ލިބޭނެ ކަމަށާއި، އެއީ ޓްރާންސްފާ މާކެޓުގައި ބޭނުންވާ ކުޅުންތެރިން ހޯދަން ލިބޭނެ ބާރެއްގެ ގޮތުގައި ދެކޭ ކަމަށެވެ. މި ސީޒަން ފެށުމުގެ ކުރިން އެކުލަބާ ގުޅުނު ކޯޗު ބުނީ މި ވަގުތު ޓްރާންސްފާ ބާޒާރުގައި ކުޅުންތެރިންގެ އަގަށް އަންނަ ބަދަލަށް ބަލާއިރު ރަނގަޅު ކުޅުންތެރިންތަކެއް ހޯދެން އޮތީ ރަނގަޅު އަދަދެއްގެ ބަޖެޓެއް ލިބިގެން ކަމަށެވެ.
"އަހަރެން ބުނާނީ މިއީ ރަނގަޅު ބަދަލެކޭ. އަހަރުމެންނަށް ޓްރާންސްފާގައި ކުޅުންތެރިން ހޯދަން ހިތްހަމަޖެހޭ ވަރުގެ ބަޖެޓެއް އޭރުން ލިބޭނެ." ޓެން ހާގް ބުންޏެވެ.
ޓެން ހާގް ބުނީ މިކަންކަމާ ގުޅޭގޮތުން ކުލަބުގެ ޗީފް އެގްޒެކެޓިވްސް ރިޗާޑް އާނޯލްޑާ އެކު މަޝްވަރާތައް ކުރެވިފައިވާ ކަމަށާއި، ކޮންމެ ކަހަލަ ބަދަލެއް ކުލަބުގެ އިސް މަގާމުތަކަށް އައިކަމުގައި ވިޔަސް ކުލަބުގެ އަމާޒާއި ސަގާފަތް ބަދަލުނުވާނެ ކަމަށެވެ.
ކުލަބު ވިއްކާލުމާ ގުޅޭގޮތުން ވާހަކަދައްކަން މިހާރުގެ ވެރިންކަމަށްވާ ގްލޭޒާސްއާ ބައްދަލުވުމުގެ ފުރުސަތު އަދި ނުލިބުނު ނަމަވެސް، މި ސީޒަން ނިމުމުގެ ކުރިން އެކަހަލަ ނިންމުމެއް ނުވަތަ ބަދަލެއް ނާންނެކަމުގެ ޔަގީންކަން އެބައޮތްކަމަށް އޭނާ ބުންޏެވެ.
ޓެންހާގް ބުނީ ޓްރާންސްފާ މާކެޓުގައި ހޭދަކުރެވޭނެ ފެންވަރުގެ ބަޖެޓެއް ލިބުން މިހާރު މުހިންމު ކަމަށާއި، ޕްރިމިއާ ލީގުގައި މި ވަގުތު ހިމެނޭ ގިނަ ކުލަބުތަކުގައި އެ ފެންވަރު އެބަހުރި ކަމަށެވެ. މި ގޮތުން މިހާރު އަށް ވަރަކަށް ކުލަބަކީ ބޭނުންވާ އަގެއް ދީފައި ކުޅުންތެރިން ގަނެވޭނެ ފެންވަރު ހުރި ޓީމުތަކެއް ކަމަށެވެ.
މީޑިއާ ތަކުން ރިޕޯޓް ކުރާ ގޮތުން މިއަހަރުގެ ފުރަތަމަ ކުއާޓާގައި ކުލަބަށް މާލީ ގޮތުން ގެއްލުންތަކެއް ވަނީ ވެފަ އެވެ. އެންމެ ފަހުން ކުލަބަށް ގެނައި ކުޅުންތެރިންގެ ޓްރާންސްފާ ފީތަކުން 300 މިލިއަން ޕައުންޑް (380 މިލިއަން ޑޮލަރު) އަދި އޮތީ ނުދައްކާ ކަމަށް ވެސް ރިޕޯޓްތަކުގައިވެ އެވެ.
