ދޯހާ، ގަތަރު (ޑިސެމްބަރު 13) - ފީފާ ވޯލްޑް ކަޕްގެ ސެމީ ފައިނަލުގައި މި ވަގުތު އޮތް ޓީމުތަކުގެ ތެރެއިން ވެސް އާޖެންޓީނާ އަށް ސަޕޯޓްކުރެވެން ނެތް ކަމަށާއި ތަށި ހޯދާނެ ކަމަށް ބެލެވެނީ އެންމެ ފަހުގެ ޗެމްޕިއަން ފްރާންސް ކަމަށް ބްރެޒިލްގެ ކުރީގެ ފޯވާޑް، ލުއިސް ރޮނާލްޑޯ ނަޒާރިއޯ ބުނެފި އެވެ.
ގަތަރު ވޯލްޑް ކަޕް ކޮމިޓީ އާއި ފީފާގެ ދައުވަތަކަށް މި ވަގުތު ދޯހާގައި ހުރި ރޮނާލްޑޯ، މީޑިއާ އަށް ދިން އިންޓަވިއުއެއްގައި ބުނެފައިވަނީ، ބްރެޒިލްގެ އެންމެ ވާދަވެރި އާޖެންޓީނާ އަށް ސަޕޯޓްކުރެވޭނެ ގޮތެއް ނެތް ކަމަށާއި ފްރާންސް އިން ތަށި ދިފާއުކުރާނެ ކަމުގެ އުންމީދު ބޮޑު ކަމަށެވެ.
ބްރެޒިލާ އެކު ދެ ފަހަރު ވޯލްޑް ކަޕްގެ ޗެމްޕިއަންކަން ހޯދާފައިވާ ރޮނާލްޑޯ ބުނީ ސެމީ ފައިނަލުގައި މިރޭ ކްރޮއޭޝިއާއާ ދެކޮޅަށް އާޖެންޓީނާ ކުޅޭ މެޗުގައި ވެސް އެދެނީ ކްރޮއޭޝިއާ އަށް ކާމިޔާބު ލިބުން ކަމަށެވެ.
"ދެފުށް ދެ ގޮތް މީހަކަށް ވާކަށް ނެތިން، އަހަންނަކަށް ނުބުނެވޭނެ އަހަރެން އުފާވާނެއޭ އާޖެންޓީނާ މޮޅުވީމަ. ނޫނީ އެ މީހުން ވޯލްޑް ކަޕް ހޯދީމަ،" ރޮނާލްޑޯ ބުންޏެވެ.
"އަހަރެން ފުޓްބޯޅަ ދެކެނީ ވަރަށް ރޮމޭންޓިކް ކަމެއްގެ ގޮތުގައި. ޔަގީނުން ވެސް ކޮންމެ ޓީމެއް ތަށި ހޯދިޔަސް އަހަރެން މަރުހަބާ ކިޔާނަން، އެއީ އަދި އުފާވުމެއް ނޫން،"
2002 ވަނަ އަަހަރުގެ ވޯލްޑް ކަޕްގެ މެޗެއްގައި ގޯލު ޖެހުމަށް ފަހު ރޮނާލްޑޯ އުފާފާޅުކުރަނީ.
ރޮނާލްޑޯ ކުރިން ޕްރިޑިކްޓް ކުރީ ބްރެޒިލާއި ފްރާންސްގެ ފައިނަލަކަށެވެ. އެކަމަކު، ބްރެޒިލް ވަނީ ކަޓައިފަ އެވެ. މިހާރު އޮތީ ކްރޮއޭޝިއާ އާއި އާޖެންޓީނާގެ އިތުރުން ފްރާންސާއި މޮރޮކޯ އެވެ.
މިހާރު އޮތްގޮތުން ފްރާންސާއި ބްރެޒިލްގެ ފައިނަލެއް ފެނުމުގެ އެއްވެސް ފުރުސަތެއް ނެތެވެ. ރޮނާލްޑޯ ބުނީ ތަފާތުކޮށް ފެންނަނީ ފްރާންސް ކަމަށެވެ.
"މެޗަކަށް ފަހު މެޗެއް ފްރާންސް އެ އަންނަނީ ޓީމު ރޫހުގައި ވަރުގަދަކަން ސާބިތުކޮށްދީ ނަތީޖާ ނެރެމުން. އެންމެ ވަރުގަދަ ފޭވަރިޓެއްގެ ގޮތުގައި އަހަންނަށް ފެންނަނީ އެ މީހުން، ތަށި ދިފާއުކުރެވޭނެ ކޮލިޓީ އެބަފެނޭ،" 2002 ވަނަ އަހަރުގެ ވޯލްޑް ކަޕް ފައިނަލުގައި ޖަރުމަނު ބަލިކުރި ގޯލުތައް ޖެހި ރޮނާލްޑޯ ބުންޏެވެ.
"ހަގީގަތުގައި އަހަރެން ވަރަށް ބޭނުން މޮރޮކޯ އިން މިި ތަށި ހޯދަން، އެކަމަކު، އެކަން ވާނެހެނެއް ހިއެއްނުވޭ، ފްރާންސް މި ފެންނަނީ ހުރިހާ ގޮތަކުން ވެސް ތައްޔާރުވެފައި އޮތްތަން،"
މި ފަހަރުގެ ވޯލްޑް ކަޕްގެ އެންމެ ގިނަ ގޯލު ޖަހައިގެން ލަނޑު ލިސްޓުގެ ކުރީގައި އޮތް ފްރާންސްގެ ކީލިއަން އެމްބާޕޭ އަށް ވެސް ރޮނާލްޑޯ ވަނީ ތައުރީފުކޮށްފަ އެވެ. އަދި އާދަޔާހިލާފު ނަތީޖާތަކެއް ނެރެ، މޮރޮކޯ އިން އެފްރިކާ ފުޓްބޯޅަ އަށް ހޯދައިދިން ރީތި ނަމަށް ވެސް ރޮނާލްޑޯ ވަނީ މަރުހަބާ ކިޔައިފަ އެވެ.
