ދޯހާ، ގަތަރު (ޑިސެމްބަރު 9) - ބްރެޒިލް ކުޅުންތެރިން ކޮންމެ ގޯލެއް ޖެހުމަށް ފަހު އުފާފާޅުކުރުމުގެ ގޮތުން ނެށުން އެއީ ގޯސްކަމެއްގެ ގޮތުގައި ފާހަގަކޮށް އެ ވާހަކަ ދައްކާ މީހުން އެ ގޮތަށް ކަންތައް ކުރަނީ ބްރެޒިލްގެ ފުޓްބޯޅައިގެ ސަގާފަތާއި ދެން ހުރި ކަންކަން ނޭނގޭތީ ކަމަށް ބްރެޒިލްގެ ކޯޗު ޓީޓޭ ބުނެފި އެވެ.
ގަތަރުގައި މިހާރު ކުރިއަށްދާ ފީފާ ވޯލްޑް ކަޕްގެ ގަދަ 16 ބުރުގައި ބްރެޒިލުން 4-1 ދެކުނު ކޮރެއާ ބަލިކުރި މެޗުގައި ބްރެޒިލުން ޖެހި ގޯލެއްގެ އުފާފާޅުކުރުމުގެ ތެރެއިން ޓީޓޭ ވެސް ވަނީ އެ ޓީމުގެ ނެށުމެއްގައި ބައިވެރިވެފަ އެވެ.
ބްރެޒިލުން ކޮންމެ ގޯލެއް ޖަހާފައި އުފާފާޅުކުރާއިރު، ނަށާތީ އެންމެ ބޮޑަށް ހިތްހަމަ ނުޖެހުން ފާޅުކުރީ އަޔަލެންޑާއި މެންޗެސްޓާ ޔުނައިޓެޑްގެ ލެޖެންޑް، ރޯއީ ކީން އެވެ. ކީން ބުނީ ކޮންމެ ގޯލެއް ޖަހާފައި އުފާފާޅުކުރާއިރު ނެށުމަކީ "އިހުތިރާމް ކުޑަ އަމަލެއް" ކަމަށެވެ.
"މިއީ އަހަރެންގެ އަމިއްލަ ޓީމެއް ނޫން، މިއީ ބްރެޒިލްގެ އެންމެންގެ ހައްގު އޮތް ބްރެޒިލަށް ނިސްބަތްވާ ޓީމެއް. މި ޓީމު ރޭވުމުގެ ޒިންމާ މި ވަގުތު މި އޮތީ އަހަރެންގެ ބޮލުގައި އެޅިފައި. އަހަރެން މައާފަށް އެދެން، ބްރެޒިލް ފުޓްބޯޅައިގެ ކަންކަން ހިނގާ ގޮތާއި ސަގާފަތް ނޭނގޭ މީހުންނަށް. އެ މީހުންނަށް ކަންކަން ނޭނގޭތީ ދައްކާ ވާހަކަ އެއީ،" ރޯއީ ކީންގެ ވާހަކަތަކަށް އިޝާރާތްކޮށް ދޭނެ ޖަވާބަކީ ކޮބައިތޯ ނޫސްވެރިއަކު ސުވާލުކުރުމުން ޓީޓޭ ބުންޏެވެ.
ބްރެޒިލްގެ ކޯޗު ޓީޓޭ: ލަނޑު ޖެހުމަށް ފަހު އުފާފާޅުކުރާއިރު ނެށުމަކީ ބްރެޒިލްގެ ފުޓްބޯޅައިގެ ސަގާފަތުގެ ތެރެއިން އައިސްފައިވާ ކަމެއް ކަމަށް ވަނީ ބުނެފައި.
ޓީޓޭ، 61، ބުނީ ދެކުނު ކޮރެއާ މެޗުގައި ބްރެޒިލުން ޖެހި އެއް ގޯލުގެ އުފާފާޅުކުރުމުގައި އޭނާ ބައިވެރިވީ ކުޅުންތެރިންގެ ކޮންމެ ކަމެއްގައި ވެސް ޓީމުގެ އެއްބައިވަންތަކަން ދައްކުވައިދޭން ބޭނުންވާތީ ކަމަށެވެ.
"އަހަރެންގެ އުމުރަކީ 61 އަހަރު. މީގެއިން ގިނަ ކުޅުންތެރިންނަކީ ގާތްގަނޑަކަށް އަހަރެންގެ ކާފަދަރިންގެ އުމުރު، އެހެންވީމަ އެ މީހުންނާ ގާތް ގުޅުމެއް އޮތްކަން ދައްކުވައިދޭ ކޮންމެ ކަމެއްގައި އަހަރެން ބައިވެރިވާނަން. މިއީ ޓީމެއް،" ޓީޓޭ ބުންޏެވެ.
"ނަށަން ޖެހިއްޖިއްޔާ އަދިވެސް ނަށާ ގޮތަށް މި ހުރީ، އެކަމަކު، އަހަރެން ކުޅުންތެރިން ގާތުގައި އެދޭނަން އަހަރެން ފޮރުވިފައި ހުންނަ ގޮތަކަށް އެކަން ކުރަން،"
ފަސް ފަހަރު ވޯލްޑް ކަޕްގެ ޗެމްޕިއަންކަން ހޯދާފައިވާ ބްރެޒިލުން އެންމެ ފަހުން ވޯލްޑް ކަޕްގެ ތަށި އުފުލާލީ 2002 ވަނަ އަހަރު ދެކުނު ކޮރެއާ އާއި ޖަޕާންގައި ބޭއްވި މުބާރާތުގަ އެވެ. އެއީ އޭޝިއާގައި ހޯސްޓްކުރި ފުރަތަމަ ވޯލްޑް ކަޕް އެވެ.
އޭޝިއާގެ ގައުމަކުން ބާއްވާ ދެ ވަނަ ވޯލްޑް ކަޕަކީ މިހާރު ގަތަރުގައި ކުރިއަށްދާ މުބާރާތެވެ. ބްރެޒިލަކީ މި ފަހަރުގެ އެއް ފޭވަރިޓެވެ.
ޓީޓޭ ބުނީ ބްރެޒިލަށް ވޯލްޑް ކަޕްގެ ޗެމްޕިއަންކަން ނުލިބި 20 އަހަރު ވެފައިވާއިރު، މިއީ އެކަން ނިމުމަކަށް ގެންނަން މިހާރު އޮތް ޖީލަށް ލިބޭ ފުރުސަތެއް ކަމަށެވެ.
ބްރެޒިލާއި ކްރޮއޭޝިއާ ބައްދަލުކުރާ ކުއާޓާ ފައިނަލް މެޗު ފަށާނީ ރާއްޖެ ގަޑިން މިރޭ 8 ޖަހާއިރު އެވެ.
