ދޯހާ، ގަތަރު (ޑިސެމްބަރު 5) - ފީފާ ވޯލްޑް ކަޕްގެ ދެ ވަނަ ބުރުގައި ދެކުނު ކޮރެއާއާ ދެކޮޅަށް ނުކުންނަ މެޗަށް ބްރެޒިލްގެ ތަރި ނޭމާ ފިޓުވުމަކީ މި މެޗަށް ނުކުންނައިރު, ރަނގަޅު ނަތީޖާއެއް ނެރެވޭނެކަމުގެ އިތުބާރު ބޮޑަށް އޮތް ކަމެއް ކަމަށް ކޯޗު ޓީޓޭ ބުނެފި އެވެ.
ވޯލްޑް ކަޕްގެ ދެ ވަނަ ބުރުގައި ވާދަކުރާ ބްރެޒިލް ވަނީ އެ ޓީމު ހިމެނުނު ގްރޫޕްގެ އެއް ވަނަ ހޯދައިފަ އެވެ. ދެކުނު ކޮރެއާ އިން ދެ ވަނަ ބުރުގެ ޖާގަ ހޯދީ ފަހު މެޗުގައި ޕޯޗުގަލް އަތުން މޮޅުވެ، ޕޮއިންޓުގެ ގޮތުން އުރުގުއޭ އާ އެއްވަރުވެ، ފައިދާ ގޯލަށް ބަލާއިރު ވެސް އެއްވަރުވެ، ޖެހި ގޯލަށް ބަލާއިރު ކުރި ލިބިގެންނެވެ.
ބްރެޒިލް ގްރޫޕް ސްޓޭޖުގައި ކުޅުނު ފުރަތަމަ މެޗުގެ ފަހު ކޮޅު އަނިޔާގެ ސަބަބުން ބަދަލުކުރަން ޖެހުނު ނޭމާ ފަހު ދެ މެޗުގައި ކުޅެފަ އެއް ނުވެ އެވެ. ފައިގެ ކުޑަ ހުޅަށް ލިބުނު އަނިޔާއަށް ފަރުވާ ހޯދުމަށްފަހު މިހާރު އޭނާ ވަނީ ފަރިތަކުރުންތަކުގައި ބައިވެރިވާން ފަށާފަ އެވެ.
ނޭމާއާ ބެހޭގޮތުބް ވާހަކަދައްކަމުން ކޯޗު ޓީޓޭ ބުނީ ނޭމާ ހުރީ އެއްކޮށް މިހާރު ފިޓުކޮށްކަމަށާއި، މި މެޗުގައި ނޭމާ ފެންނާނެ ކަމަށެވެ.
ނޭމާގެ އިތުރުން ފަހު ދެ މެޗުގައި ނުކުޅެވުނު ޑިފެންޑަރު ޑަނީލޯ ވެސް ހުރީ ފިޓުކޮށެވެ. ނަމަވެސް މިދިޔަ މެޗުގައި ކުޅުނު ފޯވާޑް ގަބްރިއެލް ޖީސޫސް އާއި ޑިފެންޑަރު އަލެކްސް ޓެލޭސް އަށް އަނިޔާވެ މި މުބާރާތުގައި ކުޅުމުގެ ފުރުސަތުވަނީ އެއްކޮށް ގެއްލިފަ އެވެ.
ޖީސޫސް ފަހު މެޗަށް ކުޅެން ނެރުނުއިރު އޭނާ ހުރީ އަނިޔާގައި ކަމަށް ބުނެ މީޑީޔާ ތަކުން އަންނަނީ ހަބަރު ފަތުރަމުންނެވެ. ނަމަވެސް ކޯޗު ޓީޓޭ ވަނީ މިއީ ދޮގު ހަބަރުތަކެއް ކަމަށް ބުނެފަ އެވެ.
"ޖީސޫސްގެ އަނިޔާއާ ގުޅޭގޮތުން އެ ދައްކަނީ ހުސް ދޮގު ވާހަކަ. އޭނާ ފިޓުކޮށް ހުރީމަ އެ މެޗަށް އެރުވީ. އަނެއްކޮޅުން އަހަރެން ގަބޫލުކުރަނީ މި ޓީމްގެ މެޑިކަލް ޓީމަކީ ފެންވަރު ހުރި ޓީމެއް ކަމަށް. އެމީހުން އަހަންނަށް ދޮގު މައުލޫމާތެއް ނުދޭނެ" ކޯޗު ޓީޓޭ ބުންޏެވެ.
ދެކުނު ކޮރެއާ ޓީމާ ގުޅޭގޮތުން ކޯޗު ޓީޓޭ ބުނީ ޕޯޗުގަލް އަތުން ހޯދި މޮޅާ އެކު ދެކުނު ކޮރެއާ ޓީމުގެ ފެންވަރު ފެނިފައިވާ ކަމަށެވެ.
ބްރެޒިލުން ދެކުނު ކޮރެއާ އަށް ފުރިހަމަ އަށް އިހުތިރާމް ކުރާނެކަން ފާހަގަކޮށް ޓީޓޭ ބުނީ މެޗުގައި ދެ ޓީމަށް ވެސް އޮތީ ހަމަހަމަ ފުރުސަތެއް ކަމަށް ގަބޫލުކުރާ ކަމަށެވެ، މިހާތަނަށް މި ވޯލްޑް ކަޕްގައި ނުކުމެފައިވާ ނަތީޖާތަކަށް ބަލާއިރު އެއްވެސް ޓީމަކަށް މެޗަށް ނުކުތުމުގެ ކުރިން މޮޅުވުމުގެ ޔަގީންކަމެއް ނުދެވޭނެ ކަމަށް ޓީޓޭ ވަނީ ބުނެފަ އެވެ.
ބްރެޒިލާއި ދެކުނު ކޮރެއާ ކުޅޭ މެޗު ފަށާނީ މިރޭ 12 ޖަހާއިރު އެވެ.
