ދޯހާ، ގަތަރު (ނޮވެމްބަރު 30) - ފީފާ ވޯލްޑް ކަޕް ފުޓްބޯޅަ މުބާރާތުގައި މިރޭ ޓިއުނީޝިއާ އިން 1-0 އިން އެންމެ ފަހުގެ ޗެމްޕިއަން، ފްރާންސް ބަލިކުރިއިރު، ޑެންމާކް އަތުން 1-0 އިން މޮޅުވެ، އޮސްޓްރޭލިއާ އިން 16 އަހަރަށް ފަހު ވޯލްޑް ކަޕްގެ ގަދަ 16 ބުރުން ފުރުސަތު ހޯދައިފި އެވެ.
ގްރޫޕް ޑީގެ މެޗުތައް ނިމުނުއިރު، އެއް ވަނަ ހޯދީ ހަ ޕޮއިންޓް ލިބުނު ފްރާންސް އެވެ. ދެ ވަނަ އަށް ދިޔަ އޮސްޓްރޭލިއާ އަށް ވެސް ވަނީ ހަ ޕޮއިންޓް ލިބިފަ އެވެ. ޓިއުނީޝިއާ ނިންމާލީ ހަތަރު ޕޮއިންޓާ އެކު، ތިން ވަނައިގަ އެވެ. އެންމެ ފުލަށް ދިޔަ، ޑެންމާކަށް ލިބުނީ ޕޮއިންޓެކެވެ.
ފްރާންސް އިން މިރޭގެ މެޗަށް ނުކުތްއިރު ވެސް ގަދަ 16 ބުރުގެ ޖާގައެއް އޮތީ ޔަގީންވެފަ އެވެ. އެހެންވެ، އެ ޓީމުން ނުކުތީ ފުރަތަމަ އެގާރަ އަށް ނުވަ ބަދަލެއް ގެނެސްގެންނެވެ. ޓިއުނީޝިއާ އަށް މި މެޗުގައި ޖަހައިދިން ހަމައެކަނި ގޯލު ޖެހީ އެ ޓީމުގެ ތަރި ވަހްބީ ކަޒްރީ އެވެ. މެޗުގެ 58 ވަނަ މިނިޓްގައި ކަޒްރީ މި ލަނޑު ޖެހީ ފްރާންސްގެ ދެ ކުޅުންތެރިން ކައިރިން ދެމިގަތުމަށް ފަހު ގޯލުގެ ދުރު ކަނަށް ބޯޅަ ފޮނުވާލައިގެންނެވެ.
މެޗުގައި ނަތީޖާއެއް ހޯދަން ފްރާންސް އިން ވަނީ ބަދަލަކަށް އެ ޓީމުގެ ފުރަތަމަ އެގާރައިގައި އާންމުކޮށް ކުޅޭ ކުޅުންތެރިން ކުޅެން އަރުވައިފަ އެވެ. އެ ގޮތުން ކީލިއަން އެމްބާޕޭ، ކުޅެން ނުކުމެ ރަނގަޅު ހަމަލާތަކެއް ފޮނުވާލައިފަ އެވެ. އެމްބާޕޭގެ ޝޮޓްތައް ހުއްޓުވުމުގައި ޓިއުނިޝީއާގެ ކީޕަރު އައިމަން ޑާމެން ވަނީ މޮޅު ކުޅުމެއް ދައްކައިފަ އެވެ.
ފްރާންސް އިން މި މެޗުގައި ގޯލެއް ޖެހި އެވެ. އިތުރު ވަގުތުގެ ފަހު މިނިޓްގައި އެންޓޮއިން ގްރީޒްމަން ޖެހި ގޯލު ފުރަތަމަ ބަލައިގަތް ކަމަށް ބެލެވުނުއިރު، ފްރާންސް ކުޅުންތެރިން ވަރަށް ބޮޑަށް އުފާފާޅުކުރި އެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމީ ގޯލެއް ނޫން ކަމަށެވެ. މެޗުން މޮޅުވުުމުގެ އުފާފާޅުކުރުންތަކެއް ޓިއުނީޝިއާ ކުޅުންތެރިން އެހާ ބޮޑަށް ނުބޭއްވީ އަނެއް ބުރުން ފުރުސަތު ނުލިބޭތީ އެވެ.
މިރޭގެ ނަތީޖާއާ އެކު ޓިއުނީޝިއާ އިން އެ ގައުމުގެ ފުޓްބޯޅަ ތާރީހުގައި ފުރަތަމަ ފަހަރަށް ފްރާންްސް ބަލިކުރިއިރު، މިއީ ވޯލްޑް ކަޕްގައި ޓިއުނީޝިއާ އިން ހޯދި ތިން ވަނަ މޮޅެވެ.
އޮސްޓްރޭލިއާގެ ލެކީ ގޯލަށް ބޯޅަ ފޮނުވާލަނީ.
ގްރޫޕް ޑީގެ އަނެއް މެޗުގައި އޮސްޓްރޭލިއާ އިން މިރޭ ޑެންމާކްގެ މައްޗަށް ކުރި ހޯދިއިރު، މެޗުގެ ހަމައެކަނި ގޯލު ޖެހީ 60 ވަނަ މިނިޓްގައި މެތިއު ލެކީ އެވެ. ޑެންމާކް ޑިފެންސް ފަހަތަށް އައި ބޯޅައެއް ހޯދައި، ލެކީ ވަނީ އޭރިއާތެރެއަށް ބޯޅަ ހިފައިގެން ވަދެ، ތިރިތިރިން ގޯލުގެ ދުރު ކަނަށް ފޮނުވާލައިފަ އެވެ. މިއީ ލެކީ އޮސްޓްރޭލިއާ ގައުމީ ޓީމަށް ޖަހައިދިން 14 ވަނަ ގޯލެވެ.
ޑެންމާކުން ނަތީޖާ ހަމަހަމަ ކުރެވޭތޯ ކުރި ގިނަ މަސައްކަތްތައް ނާކާމިޔާބުވީ އޮސްޓްރޭލިއާގެ ގޯލުގައި ހުރި ކީޕަރު މެޓް ރަޔާންގެ ހުށިޔާރުކަމުންނެވެ. ޑެންމާކްގެ ގިނަ އެޓޭކްތައް ހުއްޓުވުމުގައި ރަޔާން އިސް ދައުރެއް އަދާކުރި އެެވެ.
އެންމެ ފަހުން ބޭއްވި ވޯލްޑް ކަޕްގައި ޑެންމާކް ވަނީ ގަދަ 16 ބުރުގައި ކުޅެފަ އެވެ. އަދި އެންމެ ފަހުން ޔޫރޯ ފުޓްބޯޅަ މުބާރާތުގެ ސެމީ ފައިނަލަށް ވެސް ދަތުރުކުރި އެވެ. އެކަމަކު، މި ފަހަރުގެ ވޯލްޑް ކަޕްގައި މޮޅެއް ނުލިބި މި ވަނީ ގްރޫޕް ސްޓޭޖުން ކަޓައިފަ އެވެ.
އޮސްޓްރޭލިއާ އިން އެންމެ ފަހުން ވޯލްޑް ކަޕްގެ ނޮކައުޓް ބުރުގައި ކުޅެފައިވަނީ 2006 ވަަނަ އަހަރު ޖަރުމަނުގައި ބޭއްވި ވޯލްޑް ކަޕްގަ އެވެ.
