ދޯހާ، ގަތަރު (ނޮވެމްބަރު 30) - މި ފަހަރުގެ ވޯލްޑް ކަޕް ފުޓްބޯޅަ މުބާރާތުގައި ނެދަލެންޑްސްގެ ތަރި ކޯޑީ ގަކްޕޯ ދައްކަމުން އަންނަ ކުޅުމުގެ ސަބަބުން އޭނާ ވިއްކާލަން ކިޔާ އަގު ޕީއެސްވީ އައިންދޯވަން އިން ބޮޑު ކޮށްފައިވާ ކަމަށް ރިޕޯޓްތައް ބުނެފި އެވެ.
ގަކްޕޯ، 23، ވަނީ މި ފަހަރުގެ ވޯލްޑް ކަޕްގައި މިހާތަނަށް ނެދަލެންޑްސް ކުޅުނު ތިން މެޗުގައި ވެސް ގޯލު ޖަހައިފަ އެވެ. ނެދަލެންޑްސް ތާރީހުގައި ވެސް ޖެހިޖެހިގެން ވޯލްޑް ކަޕްގެ ތިން މެޗުގައި ގޯލު ޖެހުނު ކުޅުންތެރިންނަކީ 1974 ވަަނަ އަހަރުގެ ވޯލްޑް ކަޕްގައި ގޯލުތައް ޖެހި ޔޯހަން ނީސްކެންސް، 1998 ވަނަ އަހަރުގެ ވޯލްޑް ކަޕްގައި ގޯލުތައް ޖެހި ޑެނިސް ބާކެމްޕްގެ އިތުރުން 2010 ވަނަ އަހަރުގެ ވޯލްޑް ކަޕްގައި ލަނޑުތައް ޖެހި ވެސްލީ ސްނައިޑާ އެވެ.
ޕީއެސްވީގެ ކެޕްޓަންކަން ކުރަމުން އަންނަ ގަކްޕޯ ވަނީ މި ސީޒަނުގައި އެ ޓީމަށް 32 މެޗުން 18 ލަނޑު ޖަހައި، 18 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
ވޯލްޑް ކަޕްގެ ކުރިން ވެސް ގިނަ ކްލަބްތަކުން ވަނީ ގަކްޕޯގެ ޓްރާންސްފާގެ މަޝްވަރާތައް ޕީއެސްވީއާ އެކު ކުރިއަށްގެންގޮސްފަ އެވެ. އޭރު، ޕީއެސްޖީން ގަކްޕޯ ވިއްކާލަން ކިޔާ އަގު އުޅުނީ 60 މިލިއަން ޑޮލަރުގަ އެވެ. އެކަމަކު، ވޯލްޑް ކަޕްގައި ގަކްޕޯ ދައްކަމުން އަންނަ ކުޅުމުގެ ސަބަބުން ގަކްޕޯގެ އަގު 80 މިލިއަން ޑޮލަރަށް ވުރެ އިތުރުވާނެ ކަމަށް ނެދަލެންޑްސްގެ މީޑިއާ ރިޕޯޓްތައް ބުނެފި އެވެ.
އަންނަ ޖެނުއަރީ މަހުގެ ޓްރާންސްފާ ބާޒާރުގައި ގަކްޕޯ ކްލަބް ބަދަލުކުރާނެ ކަމަށް ބެލެވޭ ކަމަށް ޕީއެސްވީގެ އޮފިޝަލަކު ވެސް މީޑިއާގައި ބުނެފަ އެވެ. އަދި ވޯލްޑް ކަޕްގެ ތެރެއިން މީޑިއާގެ ސުވާލަކަށް ޖަވާބު ދެމުން ގަކްޕޯ ވެސް ވަނީ ޖެނުއަރީ ޓްރާންސްފާގައި ކްލަބް ބަދަލުކޮށްފާނެ ކަމުގެ އިޝާރާތެއް ދީފަ އެވެ.
"މި ވަގުތު އަހަރެން ފޯކަސް މި ކުރަނީ ވޯލްޑް ކަޕަށް، ހިނގާ ޖެނުއަރީ ޓްރާންސްފާގައި ވާގޮތެއް ބަލަމާ. އަހަރެން ލަދެއް ނުގަނޭ ނޫނީ ހާހެއް ނުވޭ ޓްރާންސްފާގެ ހުށަހެޅުންތައް ލިބޭ ވާހަކަތަކަށް ޖަވާބު ދޭން، ފުޓްބޯޅައިގައި މިކަންކަން އަބަދުވެސް ހިނގާނެ،" ގަކްޕޯ ބުންޏެވެ.
ނެދަލެންޑްސް ގައުމީ ޓީމުގެ ކުޅުންތެރިން އަންނަނީ ގަކްޕޯގެ ކުޅުމަށް ތައުރީފް ކުރަމުންނެވެ. އެ ގޮތުން ނެދަލެންޑްސްގެ ކެޕްޓަން، ވާޖިލް ވެން ޑައިކްގެ އިތުރުން ނޭތަން އަކޭ އަދި މެމްފިސް ޑިޕާއި ވަނީ ގަކްޕޯ އަކީ ނެދަލެންޑްސްގެ އިތުރުން ކްލަބް ލެވަލްގައި ވެސް މުސްތަގުބަލުގައި ވިދާލާނެ ކުޅުންތެރިއެއް ކަމަށް ބުނެފަ އެވެ.
ގަކްޕޯ ގަންނަން މަސައްކަތް ކުރާ ކްލަބްތަކުގެ ތެރޭގައި މެންޗެސްޓާ ޔުނައިޓެޑް، ބަޔާން މިއުނިކް، އިންޓަ މިލާން އަދި ލިވަޕޫލް ހިމެނޭ ކަމަށް ރިޕޯޓްތައް ބުނެ އެވެ.
