ދޯހާ، ގަތަރު (ނޮވެމްބަރު 29) - ކެމަރޫންގެ ކޯޗު ރިގޮބާޓް ސޮންގާއި މައްސަލަ ޖެހި މި ވަގުތު ޓީމުން ބޭރުކޮށްފައިވާ އަންދްރޭ އޮނާނާ ހުރީ ވަގުތީ ސަސްޕެންޝަނެއްގައި ކަމަށާއި، އޭނާ މައާފަށް އެދި ކޯޗުގެ އެންގުންތަކަށް ތަބާވާނަމަ ކުރިއަށް އޮތް މެޗުގައި ފުރުސަތު ދޭނެ ކަމަށް ކޯޗު ސޮންގް ބުނެފި އެވެ.
އޮނާނާގެ ގޯލްކީޕިން ސްޓައިލާ ގުޅޭގޮތުން ޖެހުނު ދެބަސްވުމެއްގައި ވޯލްޑް ކަޕްގެ ގްރޫޕް ސްޓޭޖުގައި އެންމެ ފަހުން ކެމަރޫން ސާބިއާއާ ދެކޮޅަށް ކުޅުނު މެޗުގެ ސްކޮޑުން އޮނާނާ ވަނީ ބޭރުކޮށްލައިފަ އެވެ. މެޗުގައި އޮނާނާގެ ބަދަލުގައި ކުޅެފައިވަނީ ކީޕަރު ޑާވިސް އެޕަސީ އެވެ.
މީޑިއާ ރިޕޯޓްތައް ބުނާ ގޮތުން އޮނާނާ އޭރިއާ ބޭރަށް ނިކުންނަ ނިސްބަތް ގިނަވުމާއި، ފައިން ކުޅޭ ބޯޅަތައް ގިނަވުމުގެ ސަބަބުން ކޯޗު ސޮންގް ވަނީ އެ ގޮތަށް ނުކުޅުމަށް ބުނެފަ އެވެ. އަދި ވީހާވެސް ބޮޑަށް ސޭފްކޮށް ކުޅުމަށް އިރުޝާދު ދިނުމުން އަމިއްލަ ކުޅުމުގެ ސްޓައިލް ބަދަލު ނުކުރާނެ ކަމަށް ބުނެ އޭނާ ކޯޗާ ޒުވާބުކުރީ އެވެ. އެކަމާ ހިތްހަމަނުޖެހިގެން ކޯޗު އޭނާ ސްކޮޑުން ބާކީ ކުރީކަމަށް ރިޕޯޓްތަކުގައިވެ އެވެ.
އޮނާނާގެ މި މައްސަލައާ ގުޅޭގޮތުން ކެމަރޫންގެ ފުޓްބޯޅަ ފެޑެރޭޝަނުންވެސް ވަނީ ބަޔާނެއް ނެރެފަ އެވެ. އެ ބަޔާނުގައި ވާ ގޮތުން އެސޯސިއޭޝަނުން ވަނީ ވަގުތީ ގޮތުން އޮނާނާ ސަސްޕެންޑު ކޮށްފައިވާކަން ހާމަކޮށްފަ އެވެ. އަދި ކޯޗު ސޮންގްގެ ނިންމުމަށް ތާއީދުކޮށްފަ އެވެ.
އެ ފެޑެރޭޝަނުން ބުނީ ޓީމުގެ ތެރޭގައި މަސްލަހަތު ހިފަހައްޓައި ކުޅުންތެރިންގެ ޑިސިޕްލިން ހިފަހައްޓަން ކޯޗު ނިންމާ ނިންމުންތަކަށް ފުރިހަމައަށް ތާއީދުކުރާ ކަމަށާއި، ހުރިހާ ކުޅުންތެރިން ވެސް ހަދާފައިވާ ގަވާއިދުތަކަށް ބޯލަނބަން ޖެހޭނެ ކަމަށެވެ.
ސާބިއާ މެޗަށްފަހު އޮތް ނޫސްވެރިންގެ ބައްދަލުވުމުގައި މިކަމާ ގުޅޭގޮތުން ސުވާލުކުރުމުން ކޯޗު ސޮންގް ބުނީ ވޯލްޑް ކަޕްގައި ކުޅެން އޮނާނާ ބޭނުންވާނަމަ ހަދާފައިވާ ގަވާއިދުތަކަށް ކިޔަމަންވާން ޖެހޭނެކަމަށެވެ.
"ދެބަސްވުމެއް އުފެދިގެން އަހަރެން އޭނާ އެހެރީ އެކަހެރިކޮށްފައި. އޭނާ އެނބުރި އައުން ބިނާ ވަނީ ގަވާއިދަށް އޭނާ ކިޔަމަންވުމާ. އަހަރެން ބުނާ ގޮތަށް އޭނާ އެއްބަސްވާނަމަ އެނބުރި ސްކޮޑަށް އާދެވޭނެ" ކޯޗު ބުންޏެވެ.
ބައެއް މީޑިއާތަކުން ރިޕޯޓުކުރާ ގޮތުން އޮނާނާ ވަނީ މިހާރު ގަތަަރު ދޫކޮށް ގޮސްފަ އެވެ. ނަމަވެސް މި ވާހަކަތައް ކޯޗު ސޮންގް ދޮގުކުރި އެވެ.
އޮނާނާގެ މައްސަލަ ހައްލުކުރުމަށް ޓީމުގައި ތިބި ސީނިއާ ބައެއް ކުޅުންތެރިންނާއި، ކުރީގެ ކުޅުންތެރިން ވެސް މަސައްކަތްކުރި ކަމަށްވެ އެވެ. ނަމަވެސް މި މަސައްކަތްތަކަށް އަލިމަގެއް ނުފެނުނީ އޮނާނާ ގޮތް ދޫކުރަން ބޭނުން ނުވާތީ އެވެ.
