ފީފާ ވޯލްޑް ކަޕް ފުޓްބޯޅަ މުބާރާތުގެގެ ތާރީހުގައި އެންމެ އާދަޔާހިލާފު ހެއާ ސްޓައިލެއް ފެނުނީ 2002 ވަނަ އަހަރު ދެކުނު ކޮރެއާ އާއި ޖަޕާންގައި ބޭއްވި ވޯލްޑް ކަޕްގައި ބްރެޒިލްގެ ލުއިސް ރޮނާލްޑޯ ނަޒާރިއޯގެ ފަރާތުންނެވެ. އެ މުބާރާތް ނިމުނުތާ 20 އަހަރު ފަހުން ރޮނާލްޑޯ ވަނީ ދާދި ފަހުން، އެ ހެއާ ސްޓައިލް އިހުތިޔާރުކުރި ސަބަބު ބުނެދީ މައާފަށް ވެސް އެދިފަ އެވެ.
ބޮލުގެ މަތީގައި އިސްތަށި ކޮޅެއް ހުންނަ ގޮތަށް ބޯކޮށައިގެން ރޮނާލްޑޯ އެ ފަހަރުގެ ގޯލްޑް ކަޕަށް ނުކުތްއިރު، އަދިވެސް އެ ހެއާ ސްޓައިލް ގިނަ ބަޔެއްގެ މެދުގައި މަގުބޫލެވެ. މި ފަހަރުގެ ވޯލްްޑް ކަޕްގައި ވެސް ބްރެޒިލްގެ ބައެއް ސަޕޯޓަރުން ރޮނާލްޑޯގެ އެ ހެއާ ސްޓައިލް ބޭނުން އެބަކުރެ އެވެ. އެއީ ރޮނާލްޑޯގެ ޓްރޭޑްމާކް ހެއާ ސްޓައިލެއް ގޮތަށް މިހާރު އޮތީ މަޝްހޫރުވެފަ އެވެ.
2002 ވަނަ އަހަރުގެ ވޯލްޑް ކަޕް މެޗެއްގެ ކުރިން ރޮނާލްޑޯ: އެ ފަހަރު ރޮނާލްޑޯގެ ހެއާ ސްޓައިލަކީ އަދިވެސް ގިނަ ސަޕޯޓަރުން އޭނާ އަށް ހާއްސަކޮށްގެން ބޭނުންކުރާ ހެއާ ސްޓައިލެއް.
ރޮނާލްޑޯ ބުނީ ހަގީގަތަކީ އެ ހެއާ ސްޓައިލަކީ އޭނާ އަށް ވެސް ކަމުދާތީ ކުރި ކަމެއް ނޫން ކަމަށެވެ.
"އެ ގޮތަށް ބޯކޮށި ހުރިހާ ކުދިންގެ މަންމަ އިންގެ ކިބައިން އަހަރެން މައާފަށް އެދެން. ހަގީގަތަކީ އެ ކުދިންނަށް ހީވެދާނެ މިއީ އަހަރެން ވެސް ވަރަށް ކަމުގޮސްގެން ބޯކޮށި ގޮތެއް ހެން. ހަގީގަތަކީ މި ހެއާ ސްޓައިލަކީ އަހަންނަށް ވެސް އެހާ ކަމުދިޔަ ގޮތެއް ނޫން،" ރޮނާލްޑޯ ބުންޏެވެ.
ބްރެޒިލާ އެކު ވޯލްޑް ކަޕްގެ ޗެމްޕިއަންކަން، 1994 އާއި 2002 ވަނަ އަހަރު ހޯދި ރޮނާލްޑޯ ވަނީ 2002 ވަނަ އަހަރުގެ މުބާރާތުގައި އެ ގޮތަށް ހެއާ ސްޓައިލް ހަދަން ނިންމި ސަބަބު ވެސް ބުނެދީފަ އެވެ.
"އަހަންނާ އެއް ޓީމަށް ކުޅުނު ގިނަ ކުޅުންތެރިން ކުރި ސުވާލެއް އެއީ، އެ ހެއާ ސްޓައިލް އަހަންނަށް ކަމުދިޔަތޯ، ހަގީގަތަކީ، އަހަންނަށް އެ ހެއާސްޓައިލް ހަދަން މަޖުބޫރުވީ، އެހެން ވިސްނުމެއް އައިސްގެން. އަހަރެންގެ އެ ހެއާކަޓް ފެނިފައި ނޫސްވެރިންނާއި އެންމެން ދެއްކީ އަހަރެންގެ ހެއާ ކަޓްގެ ވާހަކަ. އޭރު އަހަރެން ވެފައި ހުރި އަނިޔާގެ ވާހަކަ އެއް ގޮތަކަށް ވެސް ނުދެއްކި،" ކެރިއަރުގައި ބޮޑު ދެ އަނިޔާގެ މައްސަލަ ކުރިމަތިވި ރޮނާލްޑޯ ބުންޏެވެ.
ފީފާ އާއި ގަތަރު ފުޓްބޯޅަ ފެޑެރޭޝަނުގެ ހާއްސަ ދައުވަތަކަށް ރޮނާލްޑޯ މި ވަގުތު ހުރީ ގަތަރުގަ އެވެ. މި ފަހަރުގެ ވޯލްޑް ކަޕް އިސްތިހާރު ކުރުމާއި ފޯރިގަދަ ކުރުމުގެ ބޭނުމުގައި ގަތަރުން ވަނީ ކޮންމެ ގައުމެއްގެ ވެސް ފުޓްބޯޅަ ލެޖެންޑުންނަށް ދައުވަތުދީފަ އެވެ.
