ދޯހާ (ނޮވެމްބަރު 27) - އަނިޔާއާ ހެދި، މި ފަހަރުގެ ވޯލްޑް ކަޕް ފުޓްބޯޅަ މުބާރާތުގެ ގްރޫޕް ސްޓޭޖުގައި ދެން ނުފެންނާނެކަން ޔަގީންވެފައިވާ ބްރެޒިލްގެ ތަރި ނޭމާ ނެތްތަން ޒުވާން ފޯވަޑް ރޮޑްރިގޯ އަށް ފޫބެއްދޭނެ ކަމަށް ގަބޫލްކުރާ ކަމަށް ބްރެޒިލްގެ މިޑްފީލްޑަރު ކަސިމޭރޯ ބުނެފި އެވެ.
ބްރެޒިލް ވޯލްޑް ކަޕްގައި ކުޅުނު ފުރަތަމަ މެޗުގައި ސާބިއާއާ ދެކޮޅަށް ކުޅެނިކޮށް ނޭމާ އަށް އަނިޔާވެ، އޭނާ އަށް ވަނީ ގުރޫޕް ސްޓޭޖުގައި ބާކީ އޮތް ދެ މެޗު ގެއްލިފަ އެވެ. އެހެންކަމުން، މާދަމާ ރޭ ސްވިޓްޒަލޭންޑާ ދެކޮޅަށް ބްރެޒިލް ކުޅޭ މެޗުގައި ނޭމާ ނުފެންނާނެ އެވެ.
ނޭމާ ނެތްތަން ފޫބެއްދުމަށް ބްރެޒިލްގެ ކޯޗު ޓީޓޭ ބޭނުންކުރާނީ ރެއާލް މެޑްރިޑަށް ކުޅެމުންދާ ފޯވަޑް ރޮޑްރިގޯ ،21، ކަމަށް ބެލެވެއެވެ. މެންޗެސްޓާ ޔުނައިޓެޑަށް ކުޅެމުންދާ މިޑްފީލްޑަރު ކަސިމޭރޯ ބުނީ ރޮޑްރިގޯ އަކީ ތަރިއެއް ކަމަށާއި ނޭމާ ނެތްތަން އޭނާ އަށް ފޫބެއްދޭނެ ކަމަށެވެ.
"ރޮޑްރިގޯ އަކީ ތަރިއެއް. އޭނާ ކުޅޭތަން ބަލާލުމަކީ ވަރަށް ބޮޑު ހިތްހަމަޖެހުމެއް،" ކަސިމޭރޯ ބުންޏެވެ.
ސާބިއާއާ ދެކޮޅަށް ބްރެޒިލް ކުޅުނު މެޗުގެ ތެރެއިން ރޮޑްރީގޯ ބޯޅަ ފޮނުވާލަނީ
އާންމުކޮށް ރޮޑްރިގޯ ކުޅެނީ ވިންގަށް ނުވަތަ ސެންޓަ ފޯވަޑަށެވެ. އެކަމަކު، އޭނާ އަކީ ނޭމާ ކުޅޭ މަގާމަށް ވެސް ކުޅެވޭނެ ކުޅުންތެރިއެއް ކަމަށް ރޮޑްރިގޯގެ ކޯޗުން ވަނީ ކުރިން ބުނެފަ އެވެ.
ކަސިމޭރޯ ބުނީ ނޭމާ ނުކުޅޭ ވާހަކަދައްކަން ފަށައިފިނަމަ ހުއްޓަން އުނދަގޫވާނެ ކަމަށާއި ނޭމާ ނެތްތަން ފޫބެއްދޭނެ ކުޅުންތެރިން ބްރެޒިލްގައި އެބަތިބި ކަމަށެވެ.
"މި ޓީމުގައި ތިބި ކުޅުންތެރިންގެ ފެންވަރަށް ވިސްނާލީމަ ބައެއް ފަހަރު އިދިކޅުން ނުކުންނަ ޓީމަށް ވެސް ހަމްދަރުދީވޭ،" ކަސިމޭރޯ ބުންޏެވެ.
ކުރިން ރެއާލް މެޑްރިޑަށް ކުޅުނު ކަސިމޭރޯ ވަނީ ވެސްޓް ހޭމަށް ކުޅޭ ބްރެޒިލްގެ މިޑްފީލްޑަރު ލޫކަސް ޕަކްއެޓާ އަށް ވެސް ތައުރީފްކޮށްފިއެވެ.
"އެންމެ ބޮޑު ކުރިއެރުމެއް ހޯދި ކުޅުންތެރިޔަކީ ޕަކްއެޓާ. އެއީ ޒަމާނީ ކުޅުންތެރިއެއް. މެދުތެރެއަށް ވެސް ފޯލްސް ނައިންއަކަށް ވެސް އޭނާ ކުޅޭ. އޭނާއާ އެއްކޮށް ކުޅުމަކީ ޝަރަފެއް،" ކަސިމޭރޯ ބުންޏެވެ.
