ގަތަރު، ދޯހާ (ނޮވެމްބަރު 25) - މި ފަހަރުގެ ވޯލްޑް ކަޕްގެ ކުރިން ފީފާ އިން ރެފްރީންނަށް ބޭއްވި ސެޝަންތަކަށް ފަހު، މުބާރާތުގެ މެޗުތަކުގައި ޕެނަލްޓީ ދިނުމުގައި އަމަލުކުރާ އުސޫލެއް ނޫނީ ގަވާއިދެއް އޮޅުންފިލުވަން އިނގިރޭސި އެފްއޭ އިން ފީފާ އަށް ރިޕޯޓެއް ފޮނުވައިފި އެވެ.
މި ފަހަރުގެ ވޯލްޑް ކަޕް ފެށުމުގެ ކުރިން ފީފާގެ ރެފްރީސް ކޮމިޓީ ޗެއާމަން، ޕިއެރްލުއީޖީ ކޮލީނާ ވަނީ ރެފްރީން ރިފްރެޝާ ކޯހެއް ކުރިއަށް ގެންގޮސްފަ އެވެ.
އެ ކޯހުގެ ތެރޭގައި ދެއްކި ވީޑިއޯ ކްލިޕެއްގައި ކޮލީނާ ވަނީ މި ފަހަރު، ވޯލްޑް ކަޕްގައި އޭރިއާތެރެއިން ވާ ފައުލުތައް ބެލުމުގައި އިތުރަށް ސަމާލުވާނެ ގޮތްތަކެއް ކިޔައިދީފަ އެވެ. އެ ގޮތުން ރެފްރީންނަށް އޮޅުންފިލުވައިދިނުމުގެ ގޮތުން ކޮލީނާ ދެއްކި ވީޑިއޯއެއްގައި އިންގްލެންޑުން މީގެ ކުރިން މެޗެއްގައި ޖެހި ގޯލެއް ދައްކާފައިވެ އެވެ.
އެ ގޯލަކީ އިންގްލެންޑްގެ ހެރީ މެގުއާ ކޯނަރަކުން ބޮލުން ޖެހި ގޯލެއްގެ ވީޑިއޯ އެވެ. މެގުއާ އަށް ބޯޅައިގައި ޖައްސަން ފަސޭހަވަނީ އެ މެޗުގައި އިންގްލެންޑްގެ މެދުތެރެއަށް ކުޅުނު ކަލްވިން ފިލިޕްސް އިދިކޮޅު ކުޅުންތެރިޔާ އަށް ހުރަސް އަޅައި މެގުއާ އަށް ޖާގަ ހޯދައިދޭން މަސައްކަތް ކުރުމުންނެވެ.
ކޮލީނާ ވަނީ، މި ފަަހަރުގެ ވޯލްޑް ކަޕްގައި ދިމާވާ އެ ފަދަ ހާލަތްތަކުގައި ފައުލު ދޭން ޖެހޭނެ ކަމަށް ބުނެފަ އެވެ.
އިންގްލެންޑުން ވަނީ އެ ކަންކަން އޮޅުންފިލުވަން ފީފާ އަށް ރިޕޯޓެއް ހުށަހަޅައިފަ އެވެ.
ޕެނަލްޓީ ދިނުމުގައި މި ފަހަރުގެ ވޯލްޑް ކަޕްގައި ފައުލު ގުނަނީ ކިހިނެއްތޯ ސާފުކޮށްދޭން އިންގްލެންޑުން އެދިފައިވަނީ މި ފަހަރުގެ ވޯލްޑް ކަޕްގައި އިންގްލެންޑުން ކުޅުނު ފުރަތަމަ މެޗުގައި އިރާން އަތުން 6-2 އިން މޮޅުވިއިރު އެ މެޗުގައި ދިމާވި ކަމެއްގެ ސަބަބުންނެވެ.
އެ މެޗުގައި އިރާންގެ ޑިފެންޑަރުން މެގުއާ އަށް އޭރިއާތެރެއިން ކުރި ފައުލަކަށް ޕެނަލްޓީ ދީފައިނުވެ އެވެ. އިންގްލެންޑްގެ ކޯޗު ސައުތުގޭޓް ވަނީ ފައުލު ދިނުމުގައި އިންސާފުވެރި އުސޫލެއް އޮންނަން ޖެހޭ ކަމަށް ބުނެފަ އެވެ.
"އަހަރެމެން ރިޕޯޓެއް ލައިފިން. އެކަމަކު، ފީފާ އިން ޖަވާބެއް ނާދޭ،" މިރޭ އެމެރިކާއާ ދެކޮޅަށް އިންގްލެންޑުން ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި އިންގްލެންޑްގެ ކޯޗު ގަރެތު ސައުތުގޭޓް ބުންޏެވެ.
"ދަނޑުގެ އެއް ދިމާލަކުން ފައުލުދޭ ހާލަތްތައް، އަނެއް ދިމާލަކުން ފައުލަކަށް ނުވެސްވޭ،"
އިރާން މެޗުގައި އަނިޔާވި އިންގްލެންޑްގެ ކެޕްޓަން، ހެރީ ކޭންގެ ކުޑަހުޅަށް ލިބިފައިވާ އަނިޔާގެ ތަފްސީލް ދެނެގަންނަން ހެދި ޓެސްޓްތަކަށް ފަހު، ކޭން އަށް އެމެރިކާ މެޗުގައި ކުޅެވޭނެކަން ވަނީ ކަށަވަރުވެފަ އެވެ.
އިންގްލެންޑާއި އެމެރިކާ ކުޅޭ މެޗު ފަށާނީ މިރޭ ރާއްޖެ ގަޑިން 12 ޖަހާއިރު އެވެ.
