ދޯހާ، ގަތަރު (ނޮވެމްބަރު 24) - ފީފާ ވޯލްޑް ކަޕް ފުޓްބޯޅަ މުބާރާތުގައި ކްރިސްޓިއާނޯ ރޮނާލްޑޯ ޖެހި ރެކޯޑް ގޯލާ އެކު، ޕޯޗުގަލް އިން މިރޭ 3-2 އިން ގާނާ ބަލިކޮށްފި އެވެ.
މި މެޗުގައި ރޮނާލްޑޯ، 37، ޖެހި ޕެނަލްޓީއާ އެކު އޭނާ ވެފައިވަނީ ވޯލްޑް ކަޕްގެ ތަފާތު ފަސް މުބާރާތެއްގައި ލަނޑު ޖެހި ފުރަތަަމަ ކުޅުންތެރިޔާ އަށެވެ. މި ފަހަރުގެ ވޯލްޑް ކަޕްގެ އިތުރުން، ރޮނާލްޑޯ ލަނޑު ޖަހާފައިވަނީ ޖަރުމަނުގައި 2006 ވަނަ އަހަރު ބޭއްވި މުބާރާތާއި 2010 ވަނަ އަހަރު ދެކުނު އެފްރިކާގައި ބޭއްވި މުބާރާތާއި 2014 ވަނަ އަހަރު ބްރެޒިލްގައި ބޭއްވި މުބާރާތުގެ އިތުރުން، 2018 ވަނަ އަހަރު ރަޝިއާގައި ބޭއްވި ވޯލްޑް ކަޕްގަ އެވެ.
ސްޓޭޑިއަމް 974 ގައި މިރޭ ކުޅުނު މެޗުގެ ދެ ވަނަ ހާފުގައި ޕޯޗުގަލް އިން ލީޑުނެގީ ރޮނާލްޑޯ، މެޗުގެ 65 ވަނަ މިނިޓްގައި ޖެހި ޕެނަލްޓީންނެވެ. މިއީ ރޮނާލްޑޯ އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ.
ޕޯޗުގަލްގެ އޮޓާވިއޯ (ކ) ކައިރިން ބޯޅަ ހޯދަން އުޅުމުގެ ތެރޭގައި ގާނާގެ ކެޕްޓަން އަޔޫ ވެއްޓެނީ.---
ގާނާ އިން ވަނީ ކުޅުން ރަނގަޅުކޮށް، މެޗުގެ 73 ވަނަ މިނިޓްގައި ނަތީޖާ ހަމަހަމަކޮށްފަ އެވެ. އޭރިއާތެރެއިން، ގާނާގެ މުހައްމަދު ކުޑޫސް ހުރަސްކޮށްލި ބޯޅަ ޕޯޗުގަލްގެ ޑަނީލޯ ފެރޭރާ ފައިގައި ޖެހިފައި ގޯލު ކުރިމައްޗަށް އައި ވަގުތު އަޔޫ ވަނީ ގޯލަށް ބޯޅަ ވައްދާލައިފަ އެވެ.
ޕޯޗުގަލް އަށް ދެ ވަނަ ފަހަރަށް ލީޑުނަގައިިދިނީ މެޗުގެ 78 ވަނަ މިނިޓްގައި ޔާއޯ ފެލިކްސް އެވެ. މިއީ ބްރޫނޯ ފެނާންޑޭސް ދިން ބޯޅައަކުން އޭރިއާތެރެއިން ފެލިކްސް ޖެހި މޮޅު ގޯލެކެވެ. އޭގެ ދެ މިނިޓް ފަހުން، ކައުންޓަ އެޓޭކްގައި ޕޯޗުގަލްގެ ތިން ވަނަ ގޯލު ޖެހީ ރަފައެލް ލެއާއޯ އެވެ. ބަދަލަކަށް ކުޅެން އެރިތާ، މާގިނައިރެއްނުވެ، ލެއާއޯ ޖެހި ބޯޅަ އަމާޒުވީ ގޯލުގެ ދުރު ކަނަށެވެ.
ގާނާ އިން ވަނީ މެޗުގެ 89 ވަނަ މިނިޓްގައި އޮސްމާން ބުކާރީ ޖެހި ގޯލުން އުންމީދެއް ހޯދައިފަ އެވެ. އަދި މެޗުގެ އިތުރު ވަގުތުގެ ގޮތުގައި ދެއްކި އަށް މިނިޓްގެ އިތުރުން ކުޅުނު ވަގުތުގެ ތެރޭގައި ގާނާ އަށް އިތުރު ގޯލެއް ޖަހައި، އެއްވަރުކުރަން ވެސް ފުރުސަތު ލިބުނެވެ. ޕޯޗުގަލްގެ ކީޕަރު ޑިއޯގޯ ކޮސްޓާ ހެދި ގޯހެއްގެ ފައިދާ ނަގައި ގާނާގެ އިނާކީ ވިލިއަމްސް އަށް ގޯލަށް ބޯޅަ ފޮނުވާނުލެވުނީ އޭނާ ވެއްޓުނީމަ އެވެ.
