ރައްޔިތުންގެ މަޖިލީހުގެ ގަވާއިދު ކޮމިޓީން ފާސްކޮށް، ޕްލޭނިން މިނިސްޓްރީއަށް ފޮނުވާފައިވާ "ހުޅުމާލެ ޕްލޭނިން އަދި އިމާރާތްކުރުމުގެ ގަވައިދު" ގެޒެޓްކުރަން ހަފުތާއެއް ދިނުމަށް ކޮމިޓީން ނިންމި ނިންމުން ފާހެއް ނުވި އެވެ.
މަޖިލީހުގެ މިއަދުގެ ޖަލްސާގައި މި ރިޕޯޓު ފާސްކުރަން ނެގި ވޯޓުގައި 40 މެންބަރުން ވަނީ ރިޕޯޓާ ދެކޮޅަށް ވޯޓު ދެއްވާފަ އެވެ. މުހުލަތު ދިނުމަށް ފެންނަ ކަމަށް ވޯޓު ދެއްވީ 19 މެންބަރުންނެވެ.
އާ ގާނޫނުއަސާސީއަށް އަމަަލުކުރަން ފެށި އިރު ވަކި ގާނޫނަކަށް ނުފެތޭ ގޮތަށް ހުރި ގަވާއިދުތަކުގެ ބެލެނިވެރިކަން ދިނީ އާއްމު ގަވައިދުތަކުގެ ގާނޫނަށެވެ. އެ ގާނޫނުގައިވާ ގަވައިދުތައް ފާސްކުރުމާއި ބަދަލުތައް ގެނައުމުގެ ޒިންމާ އޮންނަނީ ރައްޔިތުންގެ މަޖިލީހުގެ ގަވައިދު ކޮމިޓީއަށެވެ.
ހުޅުމާލެ ޕްލޭނިން އަދި އިމާރާތްކުރުމުގެ ގަވައިދު ކޮމިޓީން އެކުލަވައިލައި ޕްލޭނިން މިނިސްޓްރީއަށް ފޮނުވީ އެހެންވެ އެވެ. އެ ގަވައިދު އެކުލަވާލައި، ޕްލޭނިން މިނިސްޓްރީއަށް ފޮނުވީ 2018 ވަނަ އަހަރު އެވެ. އެ ގަވައިދު ގެޒެޓްނުކުރާކަން ކޮމިޓީއަށް އެނގިގެން އެ މައްސަލަ ބަލަން ފެށީ 2020 ވަނަ އަހަރު އެވެ.
ކޮމިޓީން އެ މައްސަލަ ދިރާސާކޮށް ނިންމައި މަޖިލީހުގެ ވެބްސައިޓުގައި މިދިޔަ ބުދަ ދުވަހު ޝާއިއުކުރި ރިޕޯޓުގައިވާ ގޮތުން، އެ މައްސަލާގައި ކޮމިޓީން ނިންމީ، ގަވާއިދު ގެޒެޓު ނުކޮށް ހިފަހައްޓާފައި އޮތް އޮތުމަކީ ދުސްތޫރީ އަދި ގާނޫނީ ގޮތުން މިނިސްޓްރީއަށް ކުރެވޭނެ ކަމެއް ނޫން ކަމަށެވެ.
ޕްލޭނިން މިނިސްޓްރީގެ އެ އަމަަލަކީ ގާނޫނު އަސާސީއާއި ގާނޫނީ ގޮތުން ރައްޔިތުންގެ މަޖިލީހަށް އޮންނަ އިހުތިޔާރުތަކާއި ބާރުތަކަށް އިހުތިރާމް ނުކުރުން ކަަމަށް ވެސް އެ ރިޕޯޓްގައި ބުންޏެވެ.
އެހެންވެ، ކޮމިޓީގެ ނިންމުމަކީ އެ ރިޕޯޓް ރައްޔިތުންގެ މަޖިލީހުން ފާސްކުރާތާ ހަތް ދުވަހުގެ ތެރޭގައި ގަވައިދު ގެޒެޓު ކުރަން ފޮނުވަން ޕްލޭނިން މިނިސްޓްރީއަށް އެންގުމަށެވެ.
މި މައްސަލައާ ގުޅިގެން މަޖިލީހުގެ ރައީސް މުހައްމަދު ނަޝީދު ވަނީ ކަންބޮޑުވުން ފާޅުކުރައްވައިފަ އެވެ. ނަޝީދު ވިދާޅުވީ މި ކަމުގައި އަމަލު ކުރަންވީ ގޮތް ގާނޫނުގައި ވަރަށް ސާފުކޮށް އެބައޮތް ކަމަށާއި އެގޮތަށް އަމަލުކުރުން ނޫން ގޮތެއް ސަރުކާރަށް ނެތް ކަމަށެވެ.
"އެގޮތަށް އަމަލު ނުކުރާކަމީ ގާނޫނާ ހިލާފުވުން، އެހެންވީމާ މެންބަރުންނަށް ނިންމެވިދާނެ ޝަރީއަތަށް ވަޑައިގަތުމަށް ވެސް، ނުވަތަ ވަޒީރާ ގުޅޭ ގޮތުން ތިބޭފުޅުން ނިންމަވާ ނިންމެވުމެއް ނިންމުމަށް ވެސް،" އަސްލަމްގެ އިތުބާރު ނެތްކަމުގެ މައްސަލަ ނަގަން ނުސީދާ ކޮށް ލަފާ ދެއްވަމުން ނަޝީދު ވިދާޅުވި އެވެ.
