މިލާން (ނޮވެމްބަރު 16) - ގަތަރުގައި އަންނަ ހަފްތާގައި ފަށާ ފީފާ ވޯލްޑް ކަޕްގައި ގިނަ ބަޔަކު ހައިރާންކޮށްލާނެ ފަދަ ނަތީޖާއެއް ނެރެވޭނެ އެއް ޓީމަކީ ސާބިއާ ކަމަށް ބްރެޒިލްގެ ކުރީގެ މިޑްފީލްޑަރު ކަކާ ބުނެފި އެވެ.
މި ފަހަރުގެ ވޯލްޑް ކަޕްގެ ފޭވަރިޓުންގެ ގޮތުގައި ކަކާ ނެގި ތިން ޓީމަކީ ބްރެޒިލްގެ އިތުރުން އެންމެ ފަހުގެ ޗެމްޕިއަން، ފްރާންސާއި މި ފަހަރުގެ ވޯލްޑް ކަޕާ ކުރިމަތިލާއިރު، އެންމެ ފޯމުގައި އޮތް ޓީމު ކަމަށްވާ އާޖެންޓީނާ އެވެ.
"ބްރެޒިލް އަކީ އަހަންނަށް އެންމެ ބޮޑަށް ނެގޭނެ ފޭވަރިޓް ޓީމަކީ، އެ މީހުން ވަރަށް ރަނގަޅަށް ކުރި ކަމެއް އެއީ ކޯޗު ޓީޓޭއާ މި ޓީމު ހަވާލުކުރުން، ވަރަށް ރަނގަޅު ގްރޫޕެއް މި އޮތީ، ތަޖުރިބާ ހުރި ކުޅުންތެރިންނާއި ޒުވާން ހުނަރުވެރި ކުޅުންތެރިން އެބަތިބި، ބްރެޒިލުން މި މަސައްކަތް ކުރަމުން އަންނަ ގޮތް ވެސް ރަނގަޅު،" ކަކާ ބުންޏެވެ.
"ދެން ޗެމްޕިއަންކަން ހޯދިދާނެ ކަމަށް ބެލެވޭ ދެ ގައުމު އެއީ، އާޖެންޓީނާ އާއި ފްރާންސް، ދެން، އަހަރެންގެ ނަޒަރުގައި ސަޕްރައިޒް ޓީމަކަށް ވެދާނެ ސާބިއާ،"
ކަކާ ބުނީ އޭނާ ސާބިއާގެ ނަން ބުނުމުން ގިނަ ބަޔަކަށް ހައިރާންކަމެއް ލިބޭނެ ކަމަށާއި އެކަމަކު، އެ ޓީމުގެ ނަން ފާހަގަކުރަން ޖެހުނީ ސަަބަބުތަކެއް ވެސް އޮތުމުން ކަމަށެވެ.
އެ ގޮތުން ސާބިއާގެ ސްކޮޑަށް ބަލާއިރު، ޔޫރަޕްގެ ވަރުގަދަ ލީގުތަކުގެ ބޮޑެތި ޓީމުތަކުގައި މި ވަގުތު ވެސް އިސް ރޯލެއް އަދާކޮށް މޮޅަށް ކުޅެމުން އަންނަ ކުޅުންތެރިން ހިމެނޭކަން ކަކާ ފާހަގަކުރި އެވެ.
"ސާބިއާ އެ އައީ ޕޯޗުގަލް ފަދަ ތަރިން ހިމެނޭ ޓީމެއް ފަހަތަށް ޖައްސާލާފައި، ކޮލިފައިން ގްރޫޕް ކާމިޔާބު ކޮށްގެން، ހަގީގަތުގައި މިއީ ވިސްނާލުން ރަނގަޅު ކަންކަން، ދެން، ސާބިއާގައި އެ ތިބި ކުޅުންތެރިންނަށް ބަލާލިޔަސް ކޮލިޓީ ފެނޭ،" 2007 ވަނަ އަހަރު ބެލޮންޑިއޯ އެވޯޑް ހޯދި ކަކާ ބުންޏެވެ.
ކަކާ އަކީ ބްރެޒިލުން 2002 ވަނަ އަހަރު ދެކުނު ކޮރެއާ އާއި ޖަޕާންގައި ބޭއްވި ވޯލްޑް ކަޕް ކާމިޔާބުކުރި ޓީމުގައި ހިމެނުނު ކުޅުންތެރިއެކެވެ. އޭގެ ފަހުން، ކަކާ ވަނީ 2006 ވަނަ އަހަރު ޖަރުމަނުގައި ބޭއްވި ފީފާ ވޯލްޑް ކަޕާއި 2010 ވަނަ އަހަރު ދެކުނު އެފްރިކާގައި ހޯސްޓްކުރި ވޯލްޑް ކަޕްގައި ބްރެޒިލަށް ކުޅެފަ އެވެ.
