ޓިއުރިން (ނޮވެމްބަރު 14) - ފޯވަޑް މޮއިސް ކީންގެ ދެ ލަނޑާއެކު އިޓާލިއަން ލީގުގައި ރޭ ލާޒިއޯ އަތުން 3-0 އިން އަމިއްލަ ދަނޑުގައި މޮޅުވެ، ޔުވެންޓަސް ތާވަލްގެ ތިން ވަނަ އަށް ޖެހިލައިފިއެވެ.
މި މެޗުން މޮޅުވެ ލާޒިއޯ ފަހަތަށް ޖައްސާލުމަށް ފަހު ޔުވެންޓަސް 31 ޕޮއިންޓާ އެކު ތިން ވަނަ އަށް ޖެހިލިއިރު، މިއީ ލީގުގައި ޔުވެންޓާސް ޖެހިޖެހިގެން މޮޅުވި ހަ ވަނަ މެޗެވެ. އެކަމަކު، ޔުވެންޓަސް އޮތީ ތާވަލްގެ އެއް ވަނައިގައި އޮތް ނަޕޯލީ އަށް ވުރެން 10 ޕޮއިންޓް ފަހަތުގަ އެވެ.
މެޗުގެ ފުރަތަމަ ލަނޑު 43 ވަނަ މިނިޓުގައި ކާމިޔާބުކޮށްދިނީ އިޓަލީގެ ފޯވާޑް، މޮއިސް ކީން އެވެ. އަދި މެޗުގެ 54 ވަނަ މިނިޓުގައި އޭނާ ވަނީ އުތުރު ލަނޑެއް ޖަހައިފަ އެވެ. މެޗު ނިމެން ގާތްވެފައި ވަނިކޮށް ޔުވެންޓަސްގެ ތިން ވަނަ ލަނޑު ޖެހީ، ޕޮލެންޑްގެ އަރްކަޑިއުޒް މިލިޗް އެވެ.
މެޗަށް ފަހު ވާހަކަދައްކަމުން ޔުވެންޓަސްގެ ކޯޗު މެސިމިލިއާނޯ އެލެގްރީ ބުނީ ތާވަލްގެ އެއް ވަނައިގައި އޮތް ނަޕޯލީއާ ދެެމެދު އޮތް ފަރަތު ބޮޑުވިޔަސް، ސީޒަން ފެށުނު ގޮތަށް ބަލާއިރު ތިން ވަނަ އަށް އެރުުމަކީ ވަރަށް ބޮޑު ކުރިއެރުމެއް ކަމަށެވެ.
"މީގެ ހަ މެޗު ކުރިން އެއްވެސް މީހަކު ގަބޫލެއް ނުކުރޭ ޔުވެންޓަސް ތިން ވަނަ އަށް އަރާފާނެ ކަމަށް. އެހެންވީމަ މިއީ ބޮޑު ކުރިއެރުމެއް،" އެލެގްރީ ބުންޏެވެ.
"މިހާރު އަހަރަމެން ޖެހޭނީ މި ބްރޭކްގެ ބޭނުން ރަނގަޅަށް ހިފައި، ދެން އޮތް މެޗުތަކަށް ރަނގަޅަށް ތައްޔާރުވާން."
އިޓާލިއަން ލީގުގައި ރޭ އަމިއްލަ ދަނޑުގައި ފިއޮރެންޓީނާ އަތުން 1-0 އިން މޮޅުވެ، އެންމެ ފަހުގެ ޗެމްޕިއަން އޭސީ މިލާން ވަނީ ތާވަލްގެ އެއް ވަނައިގައި އޮތް ނަޕޯލީގެ ލީޑު 8 ޕޮއިންޓަށް ކުޑަކޮށްފަ އެވެ.
މެޗުގެ ދެ ވަނަ މިނިޓުގައި މިލާންގެ ރަފައެލް ލެއާއޯ އެ ޓީމަށް ލީޑު ހޯދައިދީފައިވަނިކޮށް، ފިއޮރެންޓީނާ އިން އެއްވަރުކުރީ 28 ވަނަ މިނިޓުގައި އެންޓޮނިން ބަރަކް ޖެހި ލަނޑުންނެވެ. މިލާނަށް މެޗުން ތިން ޕޮއިންޓް ލިބުނީ މެޗުގެ ފަހު މިނިޓުކޮޅުގެ ތެރޭގައި ފިއޮރެންޓީނާގެ ޑިފެންޑަރު ނިކޮލާ މިލެންކޮވިޗް އަތުން ބައިކޮޅަށް ވަތް ލަނޑަކުންނެވެ.
އިޓާލިއަން ލީގުގައި ރޭ އެޓަލާންޓާ އަތުން އިންޓަ މިލާން މޮޅުވީ 3-2 އިންނެވެ. އަޑެމޯލާ ލުކްމަންގެ ޕެނަލްޓީން އެޓަލަންޓާ އިން ލީޑުނެގި މި މެޗުގައި އިންޓަ އަށް އެއްވަރުކޮށްދިނީ އެޑިން ޖެކޯ އެވެ. ދެ ވަނަ ހާފުގައި ޖެކޯ އިތުރު ގޯލެއް ޖަހައި، އިންޓަ އަށް ކުރިހޯދައިދީފައިވަނިކޮށް، އެ ޓީމުގެ ތިން ވަނަ ލަނޑަކީ އެޓަލަންޓާގެ ހޯސޭ ލުއިސް ޕަލޮމީނޯ އަތުން ބައިކޮޅަށް ވަން ގޯލެކެވެ. ޕަލޮމީނޯ ވަނީ ފަހުން އެޓަލަންޓާ އަށް ގޯލެއް ޖަހައިދީ، އުންމީދެއް ހޯދައިދީފަ އެވެ. އެކަމަކު، އިތުރު ގޯލެއް ނުޖެހި، އެޓަލަންޓާ މެޗުން ބަލިވީ އެވެ.
