މެންޗެސްޓާ (ނޮވެމްބަރު 14) - މެންޗެސްޓާ ޔުނައިޓެޑުން ވަނީ އޭނާ އަށް އޮޅުވާލާފައި ކަމަށާއި "ގަދަކަމުން" ޔުނައިޓެޑުން އޭނާ ބޭރުކުރަން މަސައްކަތްކުރާ ބަޔަކު ވެސް އެބަތިބި ކަމަށް އެ ޓީމުގެ ތަރި ކްރިސްޓިއާނޯ ރޮނާލްޑޯ ބުނެފި އެވެ.
ވޯލްޑް ކަޕަށް އިނގިރޭސި ޕްރިމިއާ ލީގު މެދުކަނޑާލިއިރު، ކުޅުނު ފަހު މެޗުގައި ރޭ ޔުނައިޓެޑުން ވަނީ ފުލަމް ދަނޑުގައި 2-1 އިން މޮޅުވެފަ އެވެ. އެ މެޗު ނިމުނުތާ ހަތަރު ވަރަކަށް ގަޑިއިރު ތެރޭގައި ޓޯކްޓީވީގެ ޕިއާސް މޯގަން އަށް މީގެ ކުރިން ރޮނާލްޑޯ ދިން އިންޓަވިއުއެއްގެ މަންޒަރުތަކެއް ވަނީ ދައްކާލައިފަ އެވެ. ރޮނާލްޑޯ ވަނީ އެ އިންޓަވިއުގައި ޔުނައިޓެޑާއި އެ ޓީމުގެ ކޯޗު އެރިކް ޓެން ހާގަށް ވަރަށް ބޮޑަށް ފާޑުކިޔައިފަ އެވެ.
މި ސީޒަން ފެއްޓުމުގެ ކުރިން ރޮނާލްޑޯ، 37، ޔުނައިޓެޑް ދޫކޮށްދާން ބޭނުންވި ނަމަވެސް އެކަން އެގޮތަށް ނުހިނގި އެވެ. އެކަމަކު، އޭރުވެސް ރޮނާލްޑޯ ވަނީ އޭނާގެ މުސްތަގުބަލާ ގުޅޭގޮތުން މީޑިއާގައި ގިނައިން ހުރީ "ދޮގު" ވާހަކަތަކެއް ކަމަށާއި ހަގީގަތް ހާމަކުރާނެ ކަމަށެވެ.
ރޮނާލްޑޯ އެ ފާހަގަކުރި ހަގީގަތް ހާމަކުރުމަކީ ޓޯކްޓީވީގެ މި އިންޓަވިއު އެވެ.
"ޔުނައިޓެޑުން އަހަރެން ބޭރުކުރަން މަސައްކަތް ކުރަނީ ހަމައެކަނި ޓެން ހާގްއެއް ނޫން. އަދި އެބައުޅޭ މި ކްލަބްގެ ދެތިން މީހެއް އެކަން ބޭނުންވާ، (ޔުނައިޓެޑުން) އަހަންނަށް ވަނީ އޮޅުވާލާފައި،" ރޮނާލްޑޯ ބުންޏެވެ. "އަހަރެން އެކަންކަމެއް ބަލަން ބޭނުމެއް ނޫން، އަހަރެން ބޭނުންވަނީ މީހުންނަށް ހަގީގަތް އެނގެން،"
ރޮނާލްޑޯ ބުނީ އޭނާއާ ދެކޮޅަށް ޔުނައިޓެޑްގައި މަސައްކަތްކުރި މީހުން މިދިޔަ ސީޒަނުގައި ވެސް ތިބި ކަމަށާއި، 2013 ވަނަ އަހަރު އެލެކްސް ފާގަަސަން ދިޔަ ފަހުން ކްލަބްގައި ގިނަ ކަންކަން ދަނީ ގޯހުން ކަމަށެވެ.
ޓެން ހާގަށް އިހުތިރާމެއް ނުކުރަން: ރޮނާލްޑޯ
ޔުނައިޓެޑްގެ ކޯޗުކަމާ ޓެން ހާގް ހަވާލުވެ، ޕްރީ ސީޒަނުގައި ރޮނާލްޑޯ ބައިވެރިނުވާތީ އޭނާ އަށް ގިނަ ސުވާލުތަކެއް އަމާޒުވި އެވެ. އަދި ޕްރީ ސީޒަނުގައި ރޮނާލްޑޯ ބައިވެރިވާން ފަށައި، ޔުނައިޓެޑުން ރަޔޯ ވަޔެކާނޯއާ ދެކޮޅަށް ކުޅުނު މެޗުގެ ފުރަތަމަ ހާފު ނިމުމުން ރޮނާލްޑޯ ދަނޑުން ދިޔަ މައްސަލައިގައި ވެސް އޭނާ އާއި ޓެން ހާގް މެދުގައި ހިތްހަމަނުޖެހުންތަކެއް އުފެދުނެވެ.
ދާދި ފަހުން އިނގިރޭސި ޕްރިމިއާ ލީގުގައި ޓޮޓެންހަމާ ދެކޮޅަށް ޔުނައިޓެޑް ކުޅުނު މެޗުގެ ފަހުކޮޅުގައި ރޮނާލްޑޯ ވަނީ ދަނޑުން ގޮސްފަ އެވެ. އެ މެޗަށް ފަހު ޓެން ހާގް ބުނީ، "ރޮނާލްޑޯ މެޗަށް އަރަން ދެކޮޅު ހެދި" ކަމަށެވެ. އެހެންވެ، ޗެލްސީ މެޗުގެ ސްކޮޑުން ރޮނާލްޑޯ ބާކީކޮށް އަދަބު ދިނެވެ.
ޔުނައިޓެޑުން މި މަހު ހަ ވަނަ ދުވަހު އެސްޓަން ވިލާ އަތުން 3-1 އިން ބަލިވި މެޗުގައި ޔުނައިޓެޑްގެ ކެޕްޓަންކަން ކުރީ ރޮނާލްޑޯ އެވެ. އެއީ ޔުނައިޓެޑް ޖޯޒީގައި ރޮނާލްޑޯ އެންމެ ފަހުން ފެނުނު މެޗެވެ.
އެސްޓަން ވިލާ މެޗަށް ފަހު ޓެން ހާގް ބުނީ ރޮނާލްޑޯ އަތަށް ބޭންޑް ދޭން ނިންމީ ތިން ކުޅުންތެރިއަކާ އެ ޒިންމާ ހަވާލުކުރަން ބެލިއިރު، އެކަން ކުރެވެން ނެތުމެވެ. ރޮނާލްޑޯ އަށް ވުރެ ކުރީގައި ކެޕްޓަން ލިސްޓުގައި ހިމެނެނީ ހެރީ މެގުއާ، ބްރޫނޯ ފެނާންޑޭސްގެ އިތުރުން މި ފަހަރު ޔުނައިޓެޑާ ގުޅުނު ކަސެމީރޯ ކަމަށް ޓެން ހާގް ވަނީ ބުނެފަ އެވެ.
"އަހަރެން އޭނަ (ޓެން ހާގް) އަށް އިހުތިރާމެއް ނުކުރަން، އެއީ އޭނަ (ޓެން ހާގް) ވެސް އަހަންނަށް އިހުތިރާމެއް ނުކުރޭ. އަހަންނަށް އިހުތިރާމް ނުކުރާ މީހަކަށް އަހަރެންނެއް ވެސް އިހުތިރާމެއް ނުކުރާނަން،" ރޮނާލްޑޯ ބުންޏެވެ.
ޔުވެންޓަސް ދޫކޮށް މިދިޔަ އަހަރު ރޮނާލްޑޯ ފުރަތަމަ ގުޅެން އުޅުނީ މެންޗެސްޓާ ސިޓީއާ އެވެ. އެކަމަކު، އެ ޑީލް ކުރިއަށް ނުދިޔައީ ޔުނައިޓެޑްގެ ކުރީގެ ކުޅުންތެރިންނާއި ކޯޗު ފާގަސަންގެ އެދުމުގެ މަތިން ރޮނާލްޑޯ ފަހު ވަގުތު އަލުން ޔުނައިޓެޑަށް ސޮއިކުރަން ނިންމުމުންނެވެ.
ރޮނާލްޑޯ ބުނީ ފާގަސަން އަށް ފަހު ޔުނައިޓެޑަށް ކާމިޔާބު ނުލިބޭ ސަބަބުތައް ބައިވަރުކަމަށާއި އެކަންކަން ރަނގަޅުކުރަން މަސައްކަތް ނުކުރާ ކަމަށެެވެ. އަދި އޭނާއާ މެދު ކަންތައްތައް ޔުނައިޓެޑުން ކުރާ ގޮތުގެ ހަގީގަތް އެންމެ ރަނގަޅަށް ޔުނައިޓެޑާ ގުޅުން ހުރި އެންމެނަށް އެނގެން ޖެހޭ ކަމަށް ރޮނާލްޑޯ ވަނީ ބުނެފަ އެވެ.
ޔުނައިޓެޑްގައި ރޮނާލްޑޯއާ އެކު ކުޅުނު ވޭން ރޫނީ އަށް ވެސް ވަނީ ބަހުގެ ހަމަލާތަކެއް ފޮނުވާލައިފަ އެވެ. ރޮނާލްޑޯ ބުނީ އޭނާއާ މެދު ރޫނީ އެހާ ހިތްހަމަނުޖެހޭ ސަަބަބެއް ނޭނގޭ ކަމަށެވެ. ޔަގީނުން ވެސް އެނގެން އޮތް ކަމަކީ ރޫނީ އެ ހުރީ ކެރިއަރު ނިންމާލައިގެން ކަމަށެެވެ. އަދި ރޮނާލްޑޯ އަދިވެސް ކުޅެމުން އަންނާތީ އެ ކަމާ ރޫނީ ހިތްހަމަނުޖެހެނީ ކަމަށް ރޮނާލްޑޯ ވަނީ ބުނެފަ އެވެ.
"އަހަންނެއް ނޫޅެން އަހަރެން މި ހުރީ ރޫނީ އަށް ވުރެ ރީއްޗަށޭ ބުނަން، އެކަމަކު، ޔަގީނުން ވެސް އެއީ ތެދެއް،"
ޓޯކްޓީވީ އަށް ރޮނާލްޑޯ ދިން މި އިންޓަވިއު އެއްކޮށް ދައްކަން ނިންމާފައިވަނީ އަންނަ ބުދަ ދުވަހާއި ބުރާސްފަތި ދުވަހުގަ އެވެ.
