ނޭޕަލްސް (ނޮވެމްބަރު 13) - އިޓާލިއަން ލީގުގައި ރޭ އުދިނޭޒީ އަތުން 3-2 އިން މޮޅުވެ، ތާވަލްގެ އެއް ވަނައިގައި އޮތް ނަޕޯލީގެ ލީޑު 11 ޕޮއިންޓަށް ފުޅާކޮށްފި އެވެ.
ނަޕޯލީގެ ސްޓޭޑިއޯ މަރާޑޯނާގައި ކުޅުނު މެޗުގެ ފުރަތަމަ ހާފުގައި ނަޕޯލީން ދެ ލަނޑުގެ ލީޑެއް ނެގީ ނައިޖީރިއާގެ ފޯވަޑް ވިކްޓާ އޮސީމެން އާއި ޕިއޮޓްރޭ ޒިއެލިންސްކީ ޖެހި ދެ ލަނޑުންނެވެ. އަދި މެޗުގެ 58 ވަނަ މިނިޓުގައި ނަޕޯލީގެ އެލިފް އެލްމާސް ވަނީ އެ ޓީމުގެ ތިން ވަނަ ލަނޑު ޖަހައިފަ އެވެ.
ތިން ލަނޑުގެ ލީޑަކާ އެކު ނަޕޯލީ ހަމަޖެހިލި ނަމަވެސް، މެޗުގެ ފަހު ދިހަ މިނިޓުގައި އުދިނޭޒީން ވަނީ އެ ޓީމުގެ ހާސްކޮށްލައިފަ އެވެ. މެޗުގެ 79 ވަނަ މިނިޓުގައި ލީޖާ ނެސްޓޮރޮވްސްކީ ޖެހި ލަނޑާއި 82 ވަނަ މިނިޓުގައި ލަޒާރް ސަމަރްޒިކް ޖެހި ދެ ލަނޑާ އެކު، ނަޕޯލީން ފަރަގުކުޑަކުރި އެވެ.
މިއީ ނަޕޯލީ އިޓާލިއަން ލީގުގައި ޖެހިޖެހިގެން މޮޅުވި 11 ވަނަ މެޗެވެ. އަދި މި މޮޅާ އެކު ތާވަލްގެ ދެ ވަނައިގައި އޮތް ލާޒިއޯ އާއި ތިން ވަނައިގައި އޮތް އޭސީ މިލާންގެ މައްޗަށް އެ ޓީމުން ވަނީ 11 ޕޮއިންޓްގެ ލީޑެއް ހޯދައިފަ އެވެ.
އިޓާލިއަން ލީގުގައި މިރޭ ލާޒިއޯ އާއި މިލާން ކުޅޭ މެޗުތައް އޮތްއިރު، ނަޕޯލީ މި ވަގުތު ހޯދާފައިވާ 11 ޕޮއިންޓްގެ ފަރަގު ކުޑަވެދާނެ އެވެ. އެހެން ނަމަވެސް، އިޓާލިއަން ލީގުގައި މިރޭ ކުޅޭ މެޗުތަކަށް ފަހު ވޯލްޑް ކަޕަށް ލީގު މެދުކަނޑާލާއިރު، ނަޕޯލީ އޮންނާނީ އެންމެ މަދުވެގެން އަށް ޕޮއިންޓްގެ ލީޑަކާއެކު އެވެ.
އިޓާލިއަން ލީގުގައި މި ސީޒަންގައި އަދި ނަޕޯލީ ބަލިނުވާއިރު، މިހާތަނަށް ކުޅުނު 15 މެޗުން އެ ޓީމަށް ގެއްލިފައިވަނީ އެންމެ ހަތަރު ޕޮއިންޓެވެ.
މެޗަށް ފަހު ވާހަކަދައްކަމުން ނަޕޯލީގެ ކޯޗު ލޫސިއާނޯ ސްޕަލެޓީ ބުނީ ތިން ލަނޑުގެ ލީޑެއް ލިބުމާއެކު ނަޕޯލީގެ ކުޅުންތެރިންނަށް މެޗު ފަސޭހަކޮށްލެވުނީ ކަމަށެވެ. އެކަމަކު މެޗުން ތިން ޕޮއިންޓް ހޯދުމަށް ކުޅުންތެރިން ކުރި މަސައްކަތް ފާހަގަކުރާކަމަށެވެ.
"ހޯދާ ކޮންމެ މޮޅަކީ ވެސް ވަރަށް ބުރަ މަސައްކަތުން ހޯދާ މޮޅެއް. މި މެޗުގެ ފަހު 15 މިނިޓުގައި ޓީމުން ދެއްކި ހިތްވަރު ފާހަގަކުރަންޖެހޭ. ތިން ލަނޑުގެ ލީޑެއް ނެގުނީމަ ކުޅުންތެރިންނަށޤ ތަންކޮޅެއް ފަސޭހަކޮށްލެވުނީ،" ސްޕަލެޓީ ބުންޏެވެ.
އިޓާލިއަން ލީގުގައި މިރޭ ޔުވެންޓަސް އާއި ލާޒިއޯ ބައްދަލުކުރާއިރު، މިލާންއާ ދެކޮޅަށް ނުކުންނާނީ ފިއޮރެންޓނާއެވެ. އެޓަލާންޓާ އާއި އިންޓަ ބައްދަލުކުރާއިރު، ރޯމާ ނުކުންނާނީ ޓޯރީނޯއާ ދެކޮޅަށެވެ.
