ބީނޯޒް އެރީޒް (ނޮވެމްބަރު 11) - ވޯލްޑް ކަޕަށް އާޖެންޓީނާގެ ކޯޗު ލިއޮނެލް ސްކަލޯނީ ނެގި 26 ކުޅުންތެރިންގެ ސްކޮޑް މިރޭ އިއުލާނު ކުރިއިރު، ޕައޮލޯ ޑިބާލާ އާއި އެންހެލް ޑިމާރިއާ ސްކޮޑުގައި ހިމަނައިފި އެވެ.
ރޯމާގެ ޑިބާލާ އާއި ޔުވެންޓަސްގެ ޑި މާރިއާ އަށް އަނިޔާގެ މައްސަލަތަކެއް މިދިޔަ މަހު ކުރިމަތިވިއިރު، މި ދެ ކުޅުންތެރިންނަށް ވޯލްޑް ކަޕްގައި ކުޅެވިދާނެކަމާ މެދު ސުވާލު އުފެދުނެވެ.
ކުޅުމާ ދުރުގައި މަހެއްހާ ދުވަހު ޑިބާލާ އާއި ޑި މާރިއާ ހޭދަކުރި ނަމަވެސް، މި ދެ ކުޅުންތެރިންނަށް ވެސް ސްކަލޯނީ މި ފުރުސަތު ދިނީ ވޯލްޑް ކަޕަށް ފިޓުވާނެކަން ޔަގީންވުމާ އެކު އެވެ.
އެހެން ނަމަވެސް، ވިޔަރެއާލަށް ކުޅެމުންދާ މިޑްފީލްޑަރު ޖިއޮވާނީ ލޮ ސެލްސޯ އަށް ވަނީ އަނިޔާގެ ސަބަބުން ވޯލްޑް ކަޕްގެ ސްކޮޑުން ފުރުސަތު ގެއްލިފަ އެވެ. ލޮ ސެލްސޯގެ ފަލަ މަސްގަނޑަށް ލިބިފައިވާ އަނިޔާ ރަނގަޅުވާނީ ސާޖަރީއެއް ހަަދައިގެން ކަމަށްވާތީ، އޭނާ އަށް ސްކޮޑުން ފުރުސަތު ދެވޭކަށް ނެތެވެ.
މި ފަހަރުގެ ވޯލްޑް ކަޕްގައި ވެސް އާޖެންޓީނާ ލީޑުކުރާނީ ކެޕްޓަން ލިއޮނަލް މެސީއެވެ. މިއީ މެސީ ވޯލްޑް ކަޕްގައި ކުޅޭ ފަސް ވަނަ ފަހަރެވެ. އަދި މިއީ މެސީގެ ފަހު ވޯލްޑް ކަޕް ކަމަށް އޭނާ ވެސް ވަނީ އިއުލާނުކޮށްފަ އެވެ.
"ސްކޮޑުގައި ހިމެނޭ ކޮންމެ ކުޅުންތެރިއެއް ވެސް ގައުމީ ޓީމުގެ ޖޯޒީ ލާނީ ފަހުރުވެރިކަމާ އެކު،" ސްކަލޯނީ ބުންޏެވެ.
ވޯލްޑް ކަޕަށް ކުރިމަތިލާއިރު އާޖެންޓީނާ އޮތީ ރަނގަޅު ފޯމެއްގަ އެވެ. އާޖެންޓީނާ ބަލިނުވެ ޖެހިޖެހިގެން 35 މެޗު ހަމަކޮށްފައިވާއިރު، މިދިޔަ އަހަރުގެ ކޮޕާ އެމެރިކާ މުބާރާތް ވެސް ކާމިޔާބުކުރިއެވެ.
ލެޖެންޑް ޑިއޭގޯ މެރަޑޯނާގެ ޖާދުލާ އެކު، 1986 ވަނަ އަހަރު އާޖެންޓީނާ އިން ވޯލްޑް ކަޕް ކާމިޔާބުކުރި ފަހުން އެ ގައުމަށް އަދި މި މުބާރާތް ކާމިޔާބެއް ނުކުރެވެ އެވެ. އޭގެ ފަހުން 1990 ވަނަ އަހަރާއި 2014 ވަނަ އަހަރު ވޯލްޑް ކަޕްގެ ފައިނަލްގައި ކުޅުނެވެ.
ދެ ފަހަރު ވޯލްޑް ކަޕް ކާމިޔާބުކޮށްފައިވާ އާޖެންޓީނާ މި ފަހަރުގެ މުބާރާތުގައި ލައްވާލީ ގުރޫޕް ސީގަ އެވެ. މި ގުރޫޕްގައި ދެން އޮތީ ސައުދީ އަރަބިއްޔާ އާއި ޕޮލެންޑް އަދި މެކްސިކޯ އެވެ.
އާޖެންޓީނާގެ ވޯލްޑް ކަޕް ސްކޮޑް:
ގޯލްކީޕަރުން: ފްރަންކޯ އަރްމާނީ (ރިވާ ޕްލޭޓް)، އެމިލިއާނޯ މާޓިނޭޒް (އެސްޓަން ވިލާ)، ޖެރޯނިމޯ ރޫލީ (ވިޔަރެއާލް)
ޑިފެންޑަރުން: ގޮންޒާލޯ މޮންޓިއެލް (ސެވިއްޔާ)، ނަހުއެލް މޮލީނާ (އެތުލެޓިކޯ މެޑްރިޑް)، ޖެރްމާން ޕެޒެއްލާ (ރެއާލް ބެޓިސް)، ކްރިސްޓިއަން ރޮމޭރޯ (ޓޮޓެންހަމް ހޮޓްސްޕާސް)، ނިކޮލަސް އޮޓަމެންޑީ (ބެންފީކާ)، ލިސަންދުރޯ މާޓިނޭޒް (މެންޗެސްޓާ ޔުނައިޓަޑް)، ނިކޮލަސް ޓަގްލިއާފިކޯ (ލިޔޯން)، މާކޮސް އަކުންޔާ (ސެވިއްޔާ)، ހުއާން ފޮއިތު (ވިޔަރެއާލް)
މިޑްފީލްޑަރު: ލިއަންދްރޯ ޕަރޭޑެސް (ޔުވެންޓަސް)، ގީޑޯ ރޮޑްރިގޭޒް (ރެއާލް ބެޓިސް)، އެންޒޯ ފެނާންޑޭޒް (ބެންފީކާ)، ރޮޑްރިގޯ ޑެ ޕޯލް (އެތުލެޓިކޯ މެޑްރިޑް)، އެޒެކިއެލް ޕަލާސިއޯސް (ބަޔާ ލޭވަކޫސަން)، އަލެހަންދުރޯ - ޕާޕޫ ގޯމޭޒް (ސެވިއްޔާ)، އެލެސިސް މެކަލިސްޓާ (ބްރައިޓަން)
ފޯވަޑުން: ލިއޮނަލް މެސީ (ޕީއެސްޖީ)، ޕައޮލޯ ޑިބާލާ (ރޯމާ) އެންހެލް ޑިމާރިއާ (ޔުވެންޓަސް) ލައުޓާރޯ މާޓިނޭޒް (އިންޓަ މިލާން)، ހޫލިއަން އަލްވަރޭޒް (މެންޗެސްޓާ ސިޓީ)، ނިކޮލަސް ގޮންޒާލޭޒް (ފިއޮރެންޓީނާ)، ޔަކީން ކޮރޭއާ (އިންޓަ މިލާން)
