ލަންޑަން (ނޮވެމްބަރު 10) - ވޯލްޑް ކަޕަށް އިންގްލެންޑްގެ ކޯޗު ގަރެތު ސައުތު ގޭޓް ނެގި ސްކޮޑް މިރޭ އިއުލާންކުރިއިރު، ލެސްޓާ ސިޓީގެ މިޑްފީލްޑަރު ޖޭމްސް މެޑިސަން އާއި ލިވަޕޫލްގެ ފުލްބެކް ޓްރެންޓް އަލެކްސަންޑަ އާނޯލްޑަށް ވަނީ ވޯލްޑް ކަޕްގެ ސްކޮޑުން ޖާގަ ދީފަ.
މެޑިސަން މީގެ ކުރިން އިންގްލެންޑްގެ ގައުމީ ޓީމަށް ކުޅުނީ އެންމެ ފަހަރަކު އެވެ. އެއީ މީގެ ތިން ވަރަކަށް އަހަރު ކުރިން ޔޫރޯގެ ކޮލިފައިންގައި މޮންޓެނީގްރޯއާ ދެކޮޅަށް ކުޅުނު މެޗުގަ އެވެ. އެންމެ ފަހުން އިންގްލެންޑުން ނޭޝަންސް ލީގުގައި ކުޅުނު މެޗުތަކުގެ ސްކޮޑުން ފަހު ވަގުތު އާނޯލްޑް ބާކީވިއިރު، ކުރިން ބެލެވިފައި އޮތީ އޭނާ އަށް މި ފަހަރުގެ ވޯލްޑް ކަޕް ސްކޮޑުން ޖާގަ ނުލިބޭނެ ކަމަށެވެ.
މެޑިސަން މި ސީޒަންގައި ހުރީ ރަނގަޅު ފޯމެއްގައެވެ. ލެސްޓާ އަށް މި ސީޒަންގައި އޭނާ ކުޅުނު ޕްރިމިއާ ލީގުގެ 12 މެޗުތައި އޭނާ ވަނީ ހަ ލަނޑު ޖަހައި ހަތަރު ލަނޑު ޖަހަން ފުރުސަތު ހޯދައިދީފަ އެވެ.
"މެޑިސަން ދަނީ ވަރަށް ރަނގަޅު ކުޅުމެއް ދައްކަމުން،" ސައުތުގޭޓް ބުންޏެެވެ. "މި ސްކޮޑުން އޭނާ އަށް ޖާގައެއް ހައްގު."
ސައުތުގޭޓް ވޯލްޑް ކަޕަށް ނެގި 26 ކުޅުންތެރިންގެ ސްކޮޑް މިރޭ އިއުލާންކުރިއިރު، ފިޓްނަސްއާމެދު ސުވާލު އުފެދިފައިވާ ބައެއް ކުޅުންތެރިން ވެސް ސްކޮޑުގައި ހިމެނެއެވެ. އޭގެ ތެރޭގައި މެންޗެސްޓާ ސިޓީގެ ކައިލް ވޯކާ އާއި ކަލްވިން ފިލިޕްސް ހިމެނެ އެވެ. ލީޑްސް ޔުނައިޓެޑުން ސިޓީ އަށް ބަދަލުވެ، ފިލިޕްސް އަދި ކުޅުނީ އެންމެ މެޗެކެވެ. އަދި ވޯކާ އަންނަނީ އޮޕަރޭޝަނަކަށް ފަހު ފިޓްނަސް އަށް މަސައްކަތް ކުރަމުންނެވެ.
މީގެ އިތުރުން މެންޗެސްޓާ ޔުނައިޓަޑްގެ ކެޕްޓަން ހެރީ މެގުއާ ވެސް ވަނީ ސްކޮޑުގައި ހިމަނައިފަ އެވެ. ފޯމު ދަށްވެ، ޔުނައިޓަޑްގެ ފުރަތަމަ 11 އިން މި ސީޒަންގައި މެގުއާ އަށް ވަނީ ޖާގަ ގެއްލިފަ އެވެ. އޭސީ މިލާންގެ ފިކާޔޯ ޓޮމޯރީ އާއި ރޯމާ އަށް ކުޅޭ ކްރިސް ސްމޯލިންގެ ބަދަލުގައި މެގުއާ ޓީމަށް ނެގީ އޭނާއާ މެދު ވަރަށް ބޮޑު ޔަގީންކަމެއް އޮތުމުން ކަމަށް ސައުތުގޭޓް ވަނީ ބުނެފަ އެވެ.
އިންގްލެންޑްގެ މެޗެއްގެ ތެރެއިން ސައުގުގޭޓް (ކ) އާއި މެގުއާ ވާހަކަ ދައްކަނީ.
"މެގުއާ އަކީ އަހަރެމެންގެ އެންމެ ރަނގަޅު އެއް ޑިފެންޑަރު،" ސައުތުގޭޓް ބުންޏެވެ.
އިންގްލެންޑް ޓީމުން ވެސް އަނިޔާއާ ހެދި މުހިންމު ކުޅުންތެރިންނަށް ފުރުސަތު ގެއްލިފައިވެ އެވެ. އޭގެ ތެރޭގައި ޗެލްސީގެ ދެ ފުލްބެކުން ކަމަށްވާ ރީސް ޖޭމްސް އާއި ބެން ޗިލްވެލް ހިމެނެ އެވެ. ދެ ކުޅުންތެރިންނަށް ވެސް އަނިޔާވީ މި މަސް ތެރޭގަ އެެވެ.
ފޯވަޑްލައިންގައި އިންގްލެންޑްގެ ކެޕްޓަން ހެރީ ކޭންއާ އެކު ދެން ސްކޮޑަށް ނެގި ކުޅުންތެރިންގެ ތެރޭގަައި ޔުނައިޓަޑްގެ މާކަސް ރަޝްފޯޑާއި ނިއުކާސަލްގެ ކަލުމް ވިލްސަން ހިމެނެ އެެވެ.
ވޯލްޑް ކަޕްގެ ގުރޫޕް ބީގައި އިންގްލެންޑާއެކު އޮތީ އީރާނާއި ވޭލްސް އަދި އެމެރިކާއެވެ. އިންގްލެންޑް ކުޅޭ ފުރަތަމަ މެޗުގައި މި މަހުގެ 21 ވަނަ ދުވަހު ނުކުންނާނީ އީރާނާ ދެކޮޅަށެވެ.
އިންގްލެންޑްގެ ވޯލްޑް ކަޕް ސްކޮޑް:
ގޯލްކީޕަރުން: ޖޯޑަން ޕިކްފަޑް (އެވަޓަން)، ނިކް ޕޯޕް (ނިއުކާސަލް ޔުނައިޓަޑް)، އާރޮން ރަމަސްޑޭލް (އާސެނަލް)
ޑިފެންޑަރުން: ހެރީ މެގުއާ (މެންޗެސްޓާ ޔުނައިޓެޑް)، ލޫކް ޝޯ(މެންޗެސްޓާ ޔުނައިޓަޑް)، އެރިކް ޑަޔާ (ޓޮޓެންހަމް ހޮޓްސްޕާ)، ޖޯން ސްޓޯންސް (މެންޗެސްޓާ ސިޓީ)، ކައިލް ވޯކާ (މެންޗެސްޓާ ސިޓީ)، ކިއެރަން ޓްރިޕިއާ (ނިއުކާސަލް ޔުނައިޓަޑް)، ކޯނާ ކޯޑީ (އެވަޓަން)، ބެން ވައިޓް (އާސެނަލް)، ޓްރެންޓް އެލެކްސަންޑާ އާނޯލްޑް (ލިވަޕޫލް)
މިޑްފީލްޑަރުން: ޖޫޑް ބެލިންހަމް (ބޮރޫޝިއާ ޑޯޓްމަންޑް)، މޭސަން މައުންޓް (ޗެލްސީ)، ކޯނާ ގެލެގާ (ޗެލްސީ)، ޑެކްލަން ރައިސް (ވެސްޓް ހޭމް)، ޖޯޑަން ހެންޑަސަން (ލިވަޕޫލް)، ކަލްވިން ފިިލިޕްސް (މެންޗެސްޓާ ސިޓީ)
ފޯވަޑުން: ޖޭމްސް މެޑިސަން (ލެސްޓާ)، ފިލް ފޯޑަން (މެންޗެސްޓާ ސިޓީ)، ޖެކް ގްރީލިޝް (މެންޗެސްޓާ ސިޓީ)، ހެރީ ކޭން (ޓޮޓެންހަމް ހޮޓްސްޕާ)، ބުކާޔޯ ސާކާ (އާސެނަލް)، ރަހީމް ސްޓާލިން (ޗެލްސީ)، މާކަސް ރަޝްފޯޑް (މެންޗެސްޓާ ޔުނައިޓަޑް)
