މިއުނިކް (ނޮވެމްބަރު 9) - ޖަރުމަނު ލީގުގައި ރޭ ބަޔާން މިއުނިކުން 6-1 އިން ވާޑާ ބްރެމެން އަތުން ބޮޑު މޮޅެއް ހޯދި މެޗުގައި ބަޔާންގެ ސެނެގާލް ފޯވާޑް، ސަޑިއޯ މާނޭ އަށް އަނިޔާވެގެން ބަދަލުކޮށްފި އެވެ.
މި ފަހަރު ލިވަޕޫލް ދޫކޮށް ބަޔާނަށް ބަދަލުވި މާނޭ ރޭގެ މެޗުގެ 20 ވަނަ މިނިޓްގައި ބަދަލުކުރިއިރު، ބަޔާން އޮތީ އެއްވަރުވެފަ އެވެ. މާނޭ ޖެހި ޝޮޓެއް ބްރެމެން ކުޅުންތެރިއަކު ބޮލުން ޖައްސާލި ބޯޅަ އޭރިއާތެރެއިން ހޯދައި، ޖަމާލް މުސިއާލާ ވަނީ ފަސް ވަނަ މިނިޓްގައި ބަޔާނަށް ލީޑުނަގައިދީފަ އެވެ. އެކަމަކު، އޭގެ ހަތަރު މިނިޓް ފަހުން ބަޔާން އޭރިއާތެރެއިން، އެންތޮނީ ޖުންގް ވަނީ ގޯލުގެ ތިރީ ކަނަށް ބޯޅަ ފޮނުވާލައި، ބްރެމެން އަށް އެއްވަރުކޮށްދީފަ އެވެ.
މެޗުގެ 15 ވަނަ މިނިޓްގައި މާނޭގެ ކަކުލަށް އަނިޔާވެގެން ދަނޑުމަތީގައި ފަރުވާ ހޯދުމަށް ފަހު އޭނާ ފަހުން ބަދަލުކުރަން ނިންމީ އިތުރަށް ނުކުޅެވޭނެތީވެ އެވެ. މާނޭ އަށް އަނިޔާވިއިރު، ފީފާ ވޯލްޑް ކަޕްގައި މާނޭ، ހިމެނޭ ސެނެގާލް ޓީމުން ކުޅޭ ފުރަތަމަ މެޗުގައި ނެދަލެންޑްސްއާ ދެކޮޅަށް ކުޅޭ މެޗަށް ބާކީ އޮތީ 13 ދުވަހެވެ.
ބަޔާންގެ ކޯޗު ހޫލިއަން ނާގަލްސްމަން، ރޭގެ މެޗަށް ފަހު ބުނީ މާނޭގެ އަނިޔާއާ ބެހޭގޮތުން މި ވަގުތަށް ސީދާ އެއްޗެއް ބުނަން ނޭނގޭނެ ކަމަށެވެ. އަދި މާނޭގެ އަނިޔާގެ ތަފްސީލް ދެނެގަންނަން ޓެސްޓްތަކެއް ހަދައި، ސެނެގާލް ޓީމާ ހިއްސާކުރާނެ ކަމަށް ވެސް ނާގަލްސްމަން ވަނީ ބުނެފަ އެވެ.
"ކަކުލަށް ލިބުނު އަނިޔާއެއްވީމަ ސީދާ އެއްޗެއް ބުނެވޭނީ ޓެސްޓްތަކެއް ހަދައިގެން. އެކަމަކު، ފެންނަ ފެނުމަށް އެހާ ގޯސް އިންޖަރީއެއް ކަމަށް ނުބެެލެވޭ،" ނާގަލްސްމަން ބުންޏެވެ.
މާނޭގެ ބަދަލުގައި ރޭގެ މެޗުގައި ކުޅެން އެރީ ލެރޯއި ސާނޭ އެވެ. ސާނޭ އަކީ ވެސް ދާދި ފަހުން ކަކުލުގެ އަނިޔާއަކާ ހެދި ކުޅުމާ ދުރަށް ދާން ޖެހުނު ކުޅުންތެރިއެކެވެ.
ބަޔާނުން ރޭގެ މެޗުގައި ޖެހި އަނެއް ފަސް ގޯލުގެ ތެރެއިން ތިން ގޯލު ކާމިޔާބުކޮށް، ސާޖް ގްނަބްރީ ވަނީ ހެޓްރިކެއް ހަދައިފަ އެވެ. އަނެއް ދެ ގޯލު ޖެހީ ލެއޯން ގޮރެޓްޒްކާ އާއި ބަދަލަކަށް ދެ ވަނަ ހާފުގައި ކުޅެންއެރި މަތީސް ޓެލް އެވެ.
މި މެޗުގައި ބަޔާނަށް ލިބުނު ޕެނަލްޓީ އަކުން އެރިކް މެކްސިމް ޗޮޕޫ-މޯޓިން ފޮނުވާލި ބޯޅަ ބްރެމެން ކީޕަރު ޖިރީ ޕަވްލެންކާ ވަނީ މަތަކޮށްފަ އެވެ.
ލީގުގައި ރޭ ޑޯޓްމަންޑް ކުޅުނު މެޗުން ވަނީ 2-0 އިން ވުލްފްސްބާގް އަތުން ބަލިވެފަ އެވެ.
ބަޔާން، ޖަރުމަނު ލީގުގެ އެއް ވަނައިގައި އޮތީ 14 މެޗުން 31 ޕޮއިންޓް ހޯދައިގެންނެވެ. ދެ ވަނައިގައި އޮތް ފްރެއިބާގަށް 13 މެޗުން ވަނީ 27 ޕޮއިންޓް ލިބިފަ އެވެ. ތިން ވަނައިގައި އޮތް ޔޫނިއަން ބާލިން އަށް 13 މެޗުން 26 ޕޮއިންޓް ލިބިފައިވާއިރު، ހަތަރު ވަނައިގައި އޮތް ޑޯޓްމަންޑަށް 14 މެޗުން ހޯދުނީ 25 ޕޮއިންޓެވެ.
