ޓީމްތަކަށް ގިނަ މެޗުތަކެއް ލިބޭ ގޮތަށް އުއްމީދީ ބަދަލުތަކަކާ އެކު 28 ވަނަ އެމްބީއޭ ޗެމްޕިއަންޝިޕްގެ ކުޅުން ފަށައިފި އެވެ.
ޒުވާނުންގެ މަރުކަޒުގެ އެތެރޭ ކޯޓުގައި އިއްޔެ ފެށި މުބާރާތުގެ ފިރިހެން ޑިވިޝަންގައި 12 ޓީމު އަދި އަންހެން ޑިވިޝަންގައި ހަ ޓީމަކުން ވާދަކުރެ އެވެ. ފިރިހެން ޑިވިޝަންގެ ފުރަތަމަ ބުރުގައި ހުރިހާ ޓީމެއް ވަނީ ހަތަރު ގްރޫޕަކަށް ބަހާލައިފަ އެވެ. އަންހެން ޓީމްތައް ބަހާލާފައިވަނީ ދެ ގްރޫޕަކަށެވެ.
ފިރިހެން ޑިވިޝަންގެ ގްރޫޕް ސްޓޭޖުން އެންމެ އެއް ވަނަ ހޯދާ ހަތަރު ޓީމާއި ދެ ވަނަ އަށްދާ ޓީމްތަކުގެ ތެރެއިން އެންމެ ރަނގަޅު ނަތީޖާ ހޯދާ ޓީމް ކޮލިފައިވާނީ އެމްބީއޭ ޗެމްޕިއަންޝިޕުގެ ފައިނަލް ބުރަށެވެ. ގްރޫޕް ސްޓޭޖުގެ ދެ ވަނަ އަށް ދާ ޓީމްތަކުގެ ތެރެއިން ބާކީ ހުރި ޓީމުތަކާއި ތިން ވަނަ އަށް ދިޔަ ޓީމްތަކުން އެންމެ ރަނގަޅު ނަތީޖާ ހޯދާ ޓީމް ކޮލިފައިވާނީ މި ފަހަރު އަލަށް ތައާރަފްކުރި ޝީލްޑް ބުރަށެވެ.
ޝީލްޑް ބުރުގައި ފަސް ޓީމް ވާދަކުރާއިރު، ފަހު ޖާގަ ލިބޭނީ ބާކީ އޮތް ތިން ޓީމްގެ މެޗުގައި ޕްލޭ އޮފް މެޗުތަކެއް ކުޅެ ކުރި ހޯދާ ޓީމަކަށެވެ.
މިފަހަރުގެ މުބާރާތުގެ އެންމެ ހާއްސަ ކަމަކީ ރާއްޖޭގެ ކުޅިވަރުގެ ބައްޕަ ކަމަށްވާ މަރުހޫމް ޒާހިރު ނަސީރު މެމޯރިއަލް ޗެމްޕިއަންޝިޕްގެ ނަމުގައި މި މުބާރާތް ކުރިއަށް ގެންދިޔުމެވެ.
އެމްބީއޭ ޗެމްޕިއަންޝިޕުގެ ފުރަތަމަ މެޗުގައި ވާދަކުރީ ޗެމްޕިއަން ޓީރެކްސް ބީސީ އާއި ރެޕްޓާސް ބީސީ އެވެ. މި މެޗު 95-51ގެ ސްކޯ އަކުން ކާމިޔާބުކުރީ ޓީރެކްސް އެވެ. މެޗުގެ ފުރަތަމަ ތިން ކުއާޓާގައި ތަފާތު މޮޅު ކުޅުމެއް ދައްކައި ޓީރެކްސް އިން ބޮޑު ލީޑެއް ނެގިއިރު، ފަހު ކުއާޓާގައި ރެޕްޓާސް އިން ރަނގަޅު ކުޅުމެއް ދެއްކި އެވެ.
މެޗުގެ މޮޅު ކުޅުންތެރިޔާގެ މަގާމް ހޯދި ޓީރެކްސް އިސްމާއިލް ވިލްދާން ޔޫސުފް އެޓީމަށް 15 ޕޮއިންޓް ހޯދައިދިންއިރު، މުހައްމަދު ޚުވައިލިދު އަލީ 22 ޕޮއިންޓް ހޯދައިދިނެވެ. ދެ ކުޅުންތެރިންގެ ތެރެއިން ޝޫޓިން އެފިސިއެންސީ އަށް ބަލާއިރު ކުރި ލިބެނީ ވިލްދާން އަށެވެ.
ރެޕްޓާސް ޓީމުން އެންމެ ރަނގަޅަށް ކުޅުނީ 16 ޕޮއިންޓް އެއްކޮށްދިން މަފާޒު މުހައްމަދު އާއި 14 ޕޮއިންޓް ހޯދައިދިން ކެޕްޓަން މުހައްމަދު އިވާން ޒާހިރު އެވެ. އަހުމަދު ރާއިދު ސަލީމް ވެސް އެ ޓީމަށް 13 ޕޮއިންޓް ހޯދައިދިނެވެ.
މުބާރާތުގެ ދެ ވަނަ މެޗުގައި ރެޑްވިންގްސް އިން ވަނީ 50 ޕޮއިންޓުގެ ތަފާތަކުން ޓަލޮންސް ބީސީ ބަލިކޮށްފަ އެވެ. މިދިޔަ ގައުމީ މުބާރާތުގެ ފައިނަލުގައި ވާދަކުރި ރެޑްވިންގްސް އިން އެމްބީއޭ ޗެމްޕިއަންޝިޕުގެ ފުރަތަމަ މެޗުގެ ކަމިޔާބުކުރީ 90-40 އިންނެވެ.
މެޗުގެ މޮޅު ކުޅުންތެރިޔާގެ މަގާމް ހޯދީ ރެޑްވިންގްސްގެ މުހައްމަދު ޒީދާން ނައީމް އެވެ. އެ ޓީމަށް މެޗުގައި އެންމެ ގިނަ ޕޮއިންޓް އެއްކޮށްދިނީ 17 ޕޮއިންޓް ހޯދައިދިން މުހައްމަދު ރިޝްވާން އެވެ. ކެޕްޓަން މުހައްމަދު އަޝްމަލް އަހުމަދު 16 ޕޮއިންޓް ހޯދައިދިންއިރު، ބެންޗުން އަރައި ލިބުނު ވަގުތުކޮޅުގަިއ ޝިރުފާން އަހުމަދުވެސް 10 ޕޮއިންޓް ހޯދައިދިނެވެ.
ޓަލޮޮންސް ބީސީ އަށް އެންމެ ރަނގަޅު ކުޅުމެއް ދައްކައިދިނީ 11 ޕޮއިންޓް ހޯދައިދިން އަލީ ޖައިޝަމް އާއި 10 ޕޮއިންޓް ހޯދައިދިން އަލާން އިރުފާން އެވެ.
މުބާރާތުގައި މިއަދުވެސް ދެ މެޗެއް ކުޅޭނެ އެވެ. ހަވީރު ކުޅޭ މެޗުގައި ކިންގްސް ބީސީ އާއި ސްޕާޓަންސް ވާދަކުރާއިރު، ރޭގަނޑު ކުޅޭ މެޗުގައި ވާދަކުރާނީ ދަ ބައުސް އާއި ސްޓިންގާސް ބީސީ އެވެ.
