މެންޗެސްޓާ (އޮކްޓޫބަރު 6) - އިނގިރޭސި ޕްރިމިއާ ލީގުގެ ތަށްޓަށް މި ސީޒަނުގައި ވާދަކުރެވޭނެ ހަތް ޓީމެއް އެބައޮތް ކަމަށް އެންމެ ފަހުން ދެ ސީޒަނުގެ ޗެމްޕިއަން، މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ލީގުގައި ރޭ ފަހު ވަގުތު އާލިން ބްރައުޓް ހާލަންޑް ޖެހި ޕެނަލްޓީން 2-1 އިން ފުލަމް ބަލިކޮށް ސިޓީ ވަނީ ލީގުގެ އެއް ވަނަ އަށް ޖެހިލައިފަ އެވެ. އެކަަމަކު، މިއަދު އާސެނަލުން ޗެލްސީ އަތުން މޮޅުވެއްޖެނަމަ އަލުން އެއް ވަނަ އަށް އެރޭނެ އެވެ.
ސިޓީ ލީގު ތާވަލުގެ އެއް ވަނައިގައި އޮތީ 13 މެޗުން 32 ޕޮއިންޓާ އެކު އެވެ. ދެ ވަނައިގައި އޮތް އާސެނަލަށް 12 މެޗުން 31 ޕޮއިންޓް ލިބިފައިވާއިރު، ތިން ވަނައިގައި އޮތް ޓޮޓެންހަމް އަށް 13 މެޗުން 26 ޕޮއިންޓް ލިބިފައިވާއިރު، ހަތަރެއްގައި އޮތް ނިއުކާސަލް ޔުނައިޓެޑަށް ވަނީ 13 މެޗުން 24 ޕޮއިންޓް ލިބިފަ އެވެ. މެންޗެސްޓާ ޔުނައިޓެޑް ފަސް ވަނައިގައި އޮތީ 12 މެޗުން 23 ޕޮއިންޓާ އެކު އެވެ. ހަ ވަނައިގައި އޮތް ބްރައިޓަން އަށް ވަނީ 13 މެޗުން 21 ޕޮއިންޓް ލިބިފަ އެވެ. ހަތް ވަނައިގައި އޮތް ޗެލްސީ އަށް ވަނީ 13 މެޗުން 21 ޕޮއިންޓް ލިބިފަ އެވެ. އަށް ވަނައިގައި އޮތް ބްރައިޓަން އަށް 14 މެޗުން 19 ޕޮއިންޓް ލިބިފައިވާއިރު، ލިވަޕޫލަށް 12 މެޗުން ވަނީ 16 ޕޮއިންޓް ލިބިފަ އެވެ.
"އަހަރެންގެ ނަޒަރުގައި މިއީ ހަތް ވަރަކަށް ޓީމުގެ ވާދަވެރިކަމެއް. ލީގުގެ ރޭހުގައި އާސެނަލް، މެންޗެސްޓާ ސިޓީ، ޗެލްސީ، ނިއުކާސަލް، ޓޮޓެންހަމް، ޔުނައިޓެޑް (މެންޗެސްޓާ ޔުނައިޓެޑް) ދެން ލިވަޕޫލް މި އޮތީ،" ގާޑިއޯލާ ބުންޏެވެ.
ގާޑިއޯލާ ބުނީ ސީޒަން ރަނގަޅަށް ދެބައި ނުވަނިސް ވޯލްޑް ކަޕްގެ ސަބަބުން މި އަންނަ މަހަކަށް ވުރެ ގިނަ ދުވަހުގެ ބްރޭކްގެ ސަބަބުން ގިނަ ކަންތައްތަކެއް ފަހުކޮޅުގައި ބަދަލުވުމުގެ ފުރުސަތު އޮންނާނެ ކަމަށެވެ. އަދި މި ވަގުތު ރަނގަޅު ފޯމެއްގައި އޮތް ޓީމަކަށް ފަހުން ވާނެ ގޮތެއް ބުނަން އަދި ފަސޭހައެއްނުވާނެ ކަމަށް ވެސް ގާޑިއޯލާ ވަނީ ބުނެފަ އެވެ.
