ދޯހާ، ގަތަރު (ނޮވެމްބަރު 5) - މި މަހު 20 ވަނަ ދުވަހު ފަށާ ފީފާ ވޯލްޑް ކަޕްގެ ގްރޫޕް ސްޓޭޖުގެ މެޗުތައް ނިމުމުން މެޗު ޓިކެޓް ނެތަސް އެކި ގައުމުތަކުގެ ފުޓްބޯޅަ ސަޕޯޓަރުންނަށް ގަތަރަށް ދެވޭގޮތަށް ހަމަޖައްސައިފި އެވެ.
މީގެ ކުރިން ގަތަރުގެ އިންތިޒާމްތައް ހަަމަޖެހިފައި އޮތްގޮތުން މެޗު ޓިކެޓް ނެތްނަމަ އެކި ގައުމުތަކުގެ ފުޓްބޯޅަ ސަޕޯޓަރުންނަށް ގަތަރަށް ވޯލްޑް ކަޕް ދުވަސްވަރުގައި ނުދެވޭނެ އެވެ. އެކަމަކު، ފީފާއާ މަޝްވަރާ ކުރުމަށް ފަހު ގަތަރުގެ ވޯލްޑް ކަޕް ކޮމިޓީން ވަނީ އެ ގައުމުގެ އިންޓީރިއާ މިނިސްޓްރީއާ ވާހަކަ ދައްކައިގެން އުސޫލަށް ބަދަލެއް ގެންނަން ނިންމައިފަ އެވެ.
މަޝްވަރާތަކަށް ފަހު ގަތަރުގެ އިންޓީރިއާ މިނިސްޓްރީން ބުނީ ޑިސެމްބަރު މަހުގެ ދެ ވަނަ ދުވަހުން ފެށިގެން (ގްރޫޕް ސްޓޭޖުގެ މެޗުތައް ނިމުމުން) ފުޓްބޯޅަ ސަޕޯޓަރުންނަށް ގަތަރު އޮންނާނީ ހުޅުވާލާފައި ކަމަށާއި މެޗު ޓިކެޓް ނެތް ނަމަވެސް އެ ގައުމަށް އެތެރެވުމުގައި އިތުރު ހުރަހެއް ކުރިމަތިނުވާނެ ކަމަށެވެ.
"ފުޓްބޯޅައިގެ މި އުފާވެރި މާހައުލު ގަތަރަށް އައިސް ތަޖުރިބާ ކޮށްލުމުގެ ފުރުސަތު ސަޕޯޓަރުންނަށް ދޭން ޖެހޭ،" ގަތަރުގެ އިންޓީރިއާ މިނިސްޓްރީގެ ތަރުޖަމާނު، ޖަބްރު ހަމޫދު ވިދާޅުވި އެވެ.
އެކަމަކު، ގަތަރަށް އެތެރެވުމުގައި ފުރިހަމަވާން ޖެހޭ ވިސާ އާއި އެެހެނިހެން ކަންކަން އުސޫލުގެ ތެރެއިން ހަމަޖައްސަން ގަތަރުގެ ސަރުކާރުން އެދެ އެވެ. އެ ގޮތުން، ގަތަރަށް ވޯލްޑް ކަޕްގެ ކަންކަމާ ގުޅިގެން އެތެެރެވާ އެންމެން އަތުގައި "ހައްޔާ ކާޑް" އެޕްލިކޭޝަންގެ ރަޖިސްޓްރޭޝަން ފުރިހަމަވެފައި އޮންނަން ޖެހޭނެ އެވެ.
"ހައްޔާ ކާޑް" އަކީ ސަޕޯޓަރުންގެ އައިޑީ ރަޖިސްޓްރީ ކުރުމަށާއި ސަޕޯޓަރުން މޮނިޓާ ކުރުމަށް ތައްޔާރުކޮށްފައިވާ ޑިޖިޓަލް އެޕްލިކޭޝަން އެކެވެ. މީގެ އެހީގައި ދަތުރުފަތުރުކުރުމާއި އެހެނިހެން ކަންކަމަށް ފަސޭހަވެގެންދާނެ އެވެ. މީގެ އިތުރުން "ހައްޔާ ކާޑް" އާ އެކު ސަޕޯޓަރުންނަށް ސިއްހީ އެހީތެރިކަން ހޯދުމުގައި ވެސް ފަސޭހަވާނެ ކަމަށް ގަތަރުގެ ހެލްތު މިނިސްޓްރީން ވަނީ ބުނެފަ އެވެ.
ވޯލްޑް ކަޕާ ދިމާކޮށް ގަތަރުން ވަނީ މި މަހު އެއް ވަނަ ދުވަހުން ފެށިގެން އެ ގައުމުން އަޅާފައިވާ ކޮވިޑް-19ގެ ރައްކާތެރިކަމުގެ ފިޔަވަޅުތަކަށް ވެސް ބަދަލުތަކެއް ގެނެސްފަ އެވެ. އެގޮތުން މިހާރު ގަތަރަށް ދަތުރުކުރާ މީހުން ނެގެޓިވް ޕީސީއާރް ޓެސްޓެއް ގެންދަން ނުޖެހޭއިރު، ގަތަރުގެ ހެލްތު ޕޯޓަލެއް ކަމަށްވާ އެއްތެރާޒްގައި ވެސް ރަޖިސްޓްރީވާން ނުޖެހޭނެ އެވެ.
