މިއުނިކް (ނޮވެމްބަރު 4) - ފައިގެ ކުޑަހުޅަށް ލިބުނު އަނިޔާގެ ސަބަބުން ޖަރުމަނުގެ އާރްބީ ލައިޕްޒިގަށް ކުޅެމުން އަންނަ ފޯވާޑް ޓިމޯ ވާނާ އަށް ވެސް މި މަހު ގަތަރުގައި ފަށާ ވޯލްޑް ކަޕްގައި ނުކުޅެވޭނެކަން ކަށަވަރުވެއްޖެ އެވެ.
ބުދަ ދުވަހުގެރޭ ޗެމްޕިއަންސް ލީގުގައި ލައިޕްޒިގުން 4-0 އިން ޔޫކްރެއިންގެ ޝަހުތަރު ޑޮނެސްކް އަތުން މޮޅުވި މެޗުގައި އަނިޔާއާ ހެދި ވާނާ ބަދަލުކުރި އެވެ. އަނިޔާގެ ތަފްސީލް ދެނެގަން ހެދި ޓެސްޓްތަކުން އެނގުނީ ވާތު ފައިގެ ކުޑަހުޅަށް ލިބިފައިވާ، އަނިޔާ ސީރިއަސް ކަމެވެ.
ލައިޕްޒިގުން ނެރެނު ބަޔާނެއްގައި ބުނެފައިވަނީ މި އަހަރުގެ ނިޔަލަށް ވާނާ އަށް އެނބުރި ދަނޑަށް ނާދެވޭނެ ކަމަށެެވެ. މާނަ އަކީ މި މަހު 20 ވަނަ ދުވަހު ގަތަރުގައި ފަށާ ފީފާ ވޯލްޑް ކަޕްގައި އަނިޔާގެ ސަބަބުން ވާނާ އަށް ބައިވެރިނުވެވޭނެކަމެވެ.
ވާނާ، 26، ވަނީ ޖަރުމަނު ގައުމީ ޓީމަށް މިހާތަނަށް ކުުޅުނު 55 މެޗުން 24 ގޯލު ޖަހައިފަ އެވެ. އޭގެ ތެރެއިން ފަސް ގޯލު ޖެހީ ވޯލްޑް ކަޕް ކޮލިފައިންގަ އެވެ.
ޖަރުމަނުގެ ކޯޗު ހަންސީ ފްލިކް ބުނީ ވާނާ އަށް އަނިޔާވުމަކީ ޓީމަށް ލިބިގެންދިޔަ ވަރަށް ބޮޑު ގެއްލުމެއް ކަމަށެވެ. އަދި މި ފަހަރުގެ ވޯލްޑް ކަޕަށް ޖަރުމަނު ޓީމު އެކުލަވާލުމުގެ މަޝްވަރާތަކުގެ ތެރެއިން، ވާނާ ބޭނުންކުރަން ވަރަށް ބޮޑަށް ރޭވި ކަމަށެވެ. އެކަމަކު، މިހާރު ވާނާ ނުލައި ކުޅެން ޖެހުމުން އެހެން ގޮތެއް ހޯދާނެ ކަމަށް ފްލިކް ވަނީ ބުނެފަ އެވެ.
"އަހަރެން ފުރަތަމަ ކަމަކަށް އެދެނީ ޓިމޯ (ވާނޭ) ފިޓްވެގެން އެނބުރި ދަނޑަށް އަންނަން،" ފްލިކް ބުންޏެވެ.
މި ސީޒަނުގައި ޗެލްސީ ދޫކޮށް އަލުން ލައިޕްޒިގަށް ވާނާ ބަދަލުވީ 55 މިލިއަން ޑޮލަރުގެ ޑީލެއްގެ ދަށުންނެވެ. މި ސީޒަނުގެ ހުރިހާ މުބާރާތެއްގައި ވާނާ ވަނީ ލައިޕްޒިގަށް ޖުމްލަ ނުވަ ގޯލު ޖަހައިދީފަ އެވެ.
ވާނާގެ ބަދަލުގައި ޖަރުމަނު ޓީމަށް ނަގާނެ ކަމަށް ބެލެވެނީ ޑޯޓްމަންޑަށް ކުޅެމުން އަންނަ ޒުވާން ފޯވާޑް، ކަރިމް އަޑޭމީ ނޫނީ ވާޑާ ބްރެމެންގައި މި ވަގުތު ރަނގަޅު ކުޅުމެއް ދައްކަމުން އަންނަ ފޯވާޑް، ނިކްލަސް ފެއުލްކްރޫގް އެވެ.
ވޯލްޑް ކަޕަށް ޖަރުމަނުގެ ސްކޮޑު ފައިނަލްކުރާނެ ސީދާ ތާރީހެއް އަދި ބުނެފައިނުވާއިރު، މުހިންމު ބައެއް ކުޅުންތެރިންގެ ފިޓްނަސް އަކީ ކޯޗު ފްލިކަށް އޮތް ބޮލުގެ ރިހުމެކެވެ. އެ ގޮތުން، ލެރޯއި ސާނޭ އަންނަނީ ކަކުލަށް ލިބުނު އަނިޔާ އަކަށް ފަރުވާ ހޯދަމުންނެވެ. އަދި ޖަރުމަނުގެ ކީޕަރު މެނުއަލް ނޯޔާ ވެސް މިދިޔަ މަހު އަށް ވަނަ ދުވަހުން ފެށިގެން ކުޅުމާ ދުރުގައި ހުރީ ކޮނޑަށް ލިބިފައިވާ އަނިޔާއެއްގެ ސަބަބުންނެވެ.
