އަޑެލެއިޑް، އޮސްޓްރޭލިއާ (ނޮވެމްބަރު 2) - އޮސްޓްރޭލިއާގައި މިހާރު ކުރިއަށްދާ ޓީ20 ކްރިކެޓް ވޯލްޑް ކަޕްގައި ބަންގްލަދޭޝް އަތުން ހަނި ގޮތަކަށް ފަސް ލަނޑުން މޮޅުވެ، އިންޑިއާ މުބާރާތުގެ ސެމީ ފައިނަލާ ގާތަށް ޖެހިލިއިރު، އިންޑިއާގެ ތަރި ވިރާތު ކޯލީ، ވޯލްޑް ކަޕްގެ ރެކޯޑެއް ގާއިމްކޮށްފި އެވެ.
ޓޮސް ދިމާވުމުން ބަންގްލަދޭޝް އިން މި މެޗުގައި ނިންމީ ފީލްޑް ކުރުމަށެވެ. އިންޑިއާ އިން ކުޅެން އަރައި، 20 އޯވަރު ހަމަވިއިރު، ހަ ކުޅުންތެރިން ނުބައިވެގެން ވަނީ 184 ލަނޑު ހަދައިފަ އެވެ. ކުޅެން ނުކުމެ، އިންޑިއާގެ ފުރަތަމަ ބެޓްސްމަނުންގެ ތެރެއިން އެންމެ ރަނގަޅު ކުޅުމެއް ދެއްކީ، 32 ބޯޅައިން ފަސް ލަނޑު ހެދި ކޭއެލް ރާހުލް އެވެ. އިންޑިއާގެ ކެޕްޓަން، ރޯހިތު ޝަރްމާ އަށް މި މެޗުގައި ވެސް ރަނގަޅު ކުޅުމެއް ނުދެއްކުނެވެ. އޭނާ ނުބައިވިއިރު، އަށް ބޯޅައިން ހެދުނީ ދެ ލަނޑެވެ.
އިންޑިއާ އިން މި މެޗުގައި ވެސް ވިދާލީ ނުބައިނުވެ، 44 ބޯޅައިން 64 ލަނޑު ހެދި ވިރާތު އެވެ. ވިރާތުގެ މިއަދުގެ ސްކޯއާ އެކު އޭނާ ވެފައިވަނީ ޓީ20 ވޯލްޑް ކަޕް ތާރީހުގައި އެންމެ ގިނަ ލަނޑު އެއްކުރި ކުޅުންތެރިޔާ އަށެވެ.
މީގެ ކުރިން ޓީ20 ވޯލްޑް ކަޕްގައި އެންމެ ގިނަ ލަނޑު އެއްކުރުމުގެ ރެކޯޑް އޮތީ ލަންކާގެ ކުރީގެ ކެޕްޓަން މަހޭލާ ޖަޔަވަރްދަނޭ އަތުގަ އެވެ. އޭނާ ރެކޯޑް ހެދީ، 2014 ވަނަ އަހަރުގަ އެވެ. އެއީ 31 މެޗުގައި ޖުމްލަ 1016 ލަނޑު އެއްކޮށްގެންނެވެ. ވިރާތު ވަނީ 23 އިނިންގްސް ކުޅެގެން، 1062 ލަނޑު އެއްކޮށް ރެކޯޑް މުގުރާލައިފަ އެވެ.
މި މެޗުގައި ވެސް އިންޑިއާގެ ސޫރްޔާކުމާރު ޔާދަވް އެވްރެޖް ގޮތެއްގައި ރަނގަޅު ކުޅުމެއް ދެއްކި އެވެ. އޭނާ ނުބައިވީ 16 ބޯޅައިން 30 ލަނޑު އެއްކުރި ފަހުންނެވެ.
ޖަވާބުގައި ކުޅެން އަރައި، ބަންގްލަދޭޝް އިން ރަނގަޅު ފޯމެއްގައި ކުޅެމުން އަންނަނިކޮށް، ހަތް ވަނަ އޯވަރުގައި ވިއްސާރައިގެ ސަބަބުން މެޗު ހުއްޓާލަން ޖެހުނެވެ.
ވިއްސާރައިގެ ސަބަބުން ގެއްލުނު ވަގުތަށް ބެލުމަށް ފަހު، ބަންގްލަދޭޝް މެޗުން މޮޅުވާން ހޯދަން ޖެހޭ ސްކޯ، ޑަކްވާތު ލެވިސް-ސްޓާން މެތަޑުން ބަލައި، 151 ލަނޑަށް ކުޑަކުރި އެވެ. އެ ޓާގެޓަށް ވާސިލްވާން ބަންގްލަދޭޝް އިން ކުރި މަސައްކަތުގައި ފަހު އޯވަރަށް ދިޔައިރު މޮޅުވާން އެ ޓީމު ބޭނުންވަނީ އެންމެ 20 ލަނޑެވެ. އެ އޯވަރުގައި ބަންގްލަދޭޝްގެ ނުުރުލް ހަސަން ވަނީ ހަޔަކަށާއި ހަތަރަކަށް ބޯޅަ ޖަހައި، އެ ޓީމަށް އުންމީދެއް ދީފަ އެވެ. އެކަމަކު، އިންޑިއާގެ އުކުންތެރިޔާ، އަރްޝްދީޕް ސިންގް ވަނީ ތަފާތު ދައްކައި، އިންޑިއާ އަށް މުހިންމު މޮޅެއް ހޯދައިދީފަ އެވެ.
މި މެޗުގައި އަރްޝްދީޕްގެ އިތުރުން އިންޑިއާގެ ހަރްޑިކް ޕާންޑްޔާ ވަނީ ދެ ވިކެޓް ނަގައިފަ އެވެ.
"ސުޕަ 12" ގައުމު ވާދަކުރާ ބުރުގެ ގްރޫޕް ބީގެ އެއް ވަނައިގައި އިންޑިއާ އޮތީ ހަތަރު މެޗުން ހަ ޕޮއިންޓާ އެކު އެވެ. ދެ ވަނައިގައި އޮތް ދެކުނު އެފްރިކާ އަށް ތިން މެޗުން ފަސް ޕޮއިންޓް ލިބިފައިވާއިރު، ތިން ވަނައިގައި އޮތް ބަންގްލަދޭޝް އަށް ވަނީ ހަތަރު މެޗުން ހަތަރު ޕޮއިންޓް ލިބިފަ އެެވެ. އަދި ހަތަރެއްގައި އޮތް ޒިމްބާބްވޭ އަށް ވަނީ ހަތަރު މެޗުން ތިން ޕޮއިންޓް ލިބިފަ އެވެ.
ފަސް ވަނައިގައި އޮތް ޕާކިސްތާނަށް ތިން މެޗުން ދެ ޕޮއިންޓް ލިބުނުއިރު، ފުލުގައި އޮތް ނެދަލެންޑްސް އަށް ހަތަރު މެޗުން ދެ ޕޮއިންޓް ލިބުމުން އެ ޓީމު ވަނީ ކަޓައިފަ އެވެ. ނެދަލެންޑްސް ވަނީ މިއަދު ކުޅުނު މެޗުން ޒިމްބާބްވޭ އަތުން ފަސް ވިކެޓުން މޮޅުވެފަ އެވެ. އެކަމަކު، ގަދަ ދެ ޓީމުގެ ތެރޭގައި ހިމެނޭނެ ގޮތެއް ނެތުމުން އެ ޓީމު ކެޓީ އެވެ.
ގްރޫޕްގެ ފަހު މެޗުގައި އިންޑިއާ އިން އާދިއްތަ ދުވަހު ޒިމްބާބްވޭ ބަލިކޮށްގެން ސެމީ ފައިނަލުގެ ޖާގަ ހޯދޭނެ އެވެ.
