ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މިހާރު ކުރިއަށްދާ މަޝްރޫއުތަކުގެ ތެރޭގައި ހިމެނިގެން ހުޅުމާލޭގައި މިހާރު އަޅަމުންދާ ބައެއް ފްލެޓްތަކަށް އަންނަ މެއި މަހުގެ ތެރޭގައި މީހުން ވެއްދޭ ވަރު ވާނެ ކަމަށް ހައުސިން މިނިސްޓްރީގެ ސީނިއާ އެކްޒެކެޓިވް ޑިރެކްޓަރު މުހައްމަދު އާރިފް މިއަދު ވިދާޅުވެއްޖެ އެވެ.
ހުޅުމާލޭގެ ދެ ފިޔަވަހީގައި މިހާރު ކުރިއަށްދާ މަޝްރޫއުތަކުގެ ތަފުސީލު ދިނުމަށް ހައުސިން މިނިސްޓްރީ، އެފްޑީސީ އަދި އެޗްޑީސީ ގުޅިގެން ބޭއްވި އިވެންޓެއްގައި ނޫސްވެރިންނަށް މައުލޫމާތު ދެއްވަމުން އަރީފް ވިދާޅުވީ އެމަޝްރޫއު ކުރިއަށްދަނީ އެކި ސްޓޭޖްތަކަށް ބަހާލައިގެން ކަމަށާއި އަންނަ އަހަރުގެ މެއި މަހަށް ބައެއް ޓަވަރުތައް ނިމޭނެ ކަމުގެ ޔަގީންކަން ކޮންޓްރެކްޓަރުން ދޭ ކަމަށެވެ.
"މީގެ ކުރީ ސަރުކާރުތަކުގައި ވެރިކަމުގެ ފަހު އަހަރާއި ހަމައަށް ދިޔައިމަ ނޫނީ [ބޯހިޔާ ވަހިކަމުގެ މަޝްރޫއުތަކުގެ] ބިންގާ އެޅުނުތަނެއް ވެސް ފެނިފައެއް ނުވޭ، ނަމަވެސް އަޅުގަނޑުމެން 2020 ވަނަ އަހަރުން ފެށިގެން މިދަނީ ބޯހިޔާވަހިކަމުގެ މަޝްރޫއުތައް ހިންގަމުން،" އަރީފް ވިދާޅުވި އެވެ.
ހުޅުމާލެ ދެވަނަ ފިޔަވަހީގައި މިހާރު އަޅަމުންދާ ފުލެޓް ޓަވަރެއްގެ މަސައްކަތް ކުރިއަށްދަނީ -- ފޮޓޮ: މުހައްމަދު ޝާބިން / އަދަދު
ސަރުކާރުގެ ގެދޮރުވެރިޔާ މަޝްރޫއުގެ ދަށުން މިހާރު ހުޅުމާލޭގައި ދަނީ ޖުމްލަ 4000 ފުލެޓު އެޅުމުގެ މަސައްކަތް ކުރަމުންނެވެ. އެގޮތުން އެ މަޝްރޫއު ވަކި ދެ ޕްރޮޖެކްޓަކަށް ބަހާލައި 4000 ފުލެޓު ޖުމްލަ 32 ޓަވަރަކަށް ވަނީ ބަހާލައިފަ އެވެ. ހުޅުމާލޭގެ ދެ ވަނަ ފިޔަވަހީގައި އަޅާ މި ފްލެޓުތަކުގެ މަސައްކަތް ކުރިއަށް ގެންދަނީ އިންޑިއާގެ ދެ ކުންފުންޏެއް ކަމަށްވާ ޖޭއެމްސީ އަދި އެންބީސީސީ އިންނެވެ.
އެ މަޝްރޫއުގެ ދަށުން އަޅާ ޓަވަރުތަކަކީ 17 އަދި 18 ފަންގިފިލާގެ ޓަވަރުތަކެކެވެ. ކޮންމެ ޓަވަރެއްގެ ފުރަތަމަ ފަންގިފިލާ ޕާކިންއަށް އަދި ދެ ވަނަ ފަންގިފިލާ ކޮމާޝަލް ބޭނުންތަކަށް ދޫކުރެވޭއިރު ދެން ހުރި ކޮންމެ ފަންގިފިލާއެއްގައި ދޭއް ނުވަތަ ތިން ކޮޓަރީގެ އަށް ހައުސިން ޔުނިޓް ހުންނާނެ އެވެ. ކޮންމެ ޓަވަރަކަށް އަންދާޒާކުރެވޭ އާބާދީ 750 ގައި ހުރިއިރު ކޮންމެ ޓަވަރެއްގައި ތިން ލިފްޓު ހުންނާނެ އެވެ.
ޖޭއެމްސީ ހައުސިން ޕްރޮޖެކްޓް
ޖޭއެމްސީ ޕްރޮޖެކްޓުގެ ދަށުުން ހުޅުމާލެ ދެ ވަނަ ފިޔަވަހީގައި އަޅާ 16 ޓަވަރުގައި ޖުމްލަ 2000 ފުލެޓު އެޅުމުގެ މަސައްކަތް މިހާރު ދަނީ ކުރަމުންނެވެ. އެގޮތުން ޕްރޮޖެކްޓުގެ ޖުމްލަ މަސައްކަތުގެ 16 ޕަސެންޓު ނިމިފައިވާ ކަމަށް އެފްޑީސީގެ ބިޒްނަސް ޑިވެލޮޕްމަންޓު މެނޭޖަރު އަހުމަދު ޝަމޫލް އަބްދުﷲ މިއަދު ވިދާޅުވި އެވެ. އެ ހުރިހާ ޓަވަރެއްގެ މަސައްކަތްވެސް މިހާރު ކުރަމުންދާއިރު އެންމެ ބޮޑަށް މަސައްކަތް ގޮސްފައިވާ ޓަވަރުގެ 25 އިންސައްތަ މަސައްކަތް ވަނީ ނިމިފަ އެވެ.
އިންޑިއާގެ އެކްޒިމް ބޭންކުގެ އެހީގައި އަޅާ މި ފްލެޓުތަށް އެޅުމަށް އެއްބަސްވުމުގައި ސޮއިކުރީ މާޗް 8، 2021 ގަ އެވެ. އަމަލީ މަސައްކަތް ޑިސެމްބަރު 8، 2021 ގައި ފެށިއިރު އެ ޕްރޮޖެކްޓަށް ޖުމްލަ 137 މިލިއަން އެމެރިކާ ޑޮލަރު ހަރަދުވާނެ އެވެ.
އެންބީސީސީ ހައުސިން ޕްރޮޖެކްޓް
އެންބީސީސީ ޕްރޮޖެކްޓުގެ ދަށުންވެސް އެޅިގެންދާނީ ޖުމްލަ 16 ޓަވަރެއްގައި އެޅޭ 2000 ފުލެޓެވެ. ހުޅުމާލޭ ދެ ވަނަ ފިޔަވަހީގައި އަޅާ އެއޓަވަރުތަކުގެ 13.5 އިންސައްތަ ނިމިފައިވާކަމަށް ޝަމޫލް މިއަދު ވިދާޅުވި އެވެ. އެންބީސީސީ ގެ 16 ޓަވަރުގެ ތެރެއިން ތިން ޓަވަރެއް ފިޔަވާ އެހެން ހުރިހާ ޓަވަރެއްގެ މަސައްކަތް މިހާރު ދަނީ ކުރެވެމުންނެވެ. އެންމެ ބޮޑަށް ކުރިއަށް ގޮސްފައިވާ ޓަވަރުގެ މަސައްކަތުގެ 15.3 އިންސައްތަ ވަނީ ނިމިފަ އެވެ.
މި ޕްރޮޖެކްޓަކީވެސް އިންޑިއާގެ އެގްޒިމް ބޭންކުގެ އެހީގެ ދަށުން ހިންގޭ ޕްރޮޖެކްޓެކެވެ. ޖުމްލަ 130 މިލިއަން އެމެރިކާ ޑޮލަރު ހޭދަވާ މި މަޝްރޫއުގެ މަސައްކަތް ފެށީ މި އަހަރުގެ ޖަނަވަރީ މަހުގެ 18 ގަ އެވެ.
އެފްޑީސީއިން މައުލޫމާތު ދިން ގޮތުގައި މި މަޝްރޫއުގެ ޖުމްލަ މަސައްކަތް ނިމޭނެ ކަމަށް ބެލެވެނީ 2024 ވަނަ އަހަރުގެ ތެރޭގަ އެވެ.
