ރޯމް (ނޮވެމްބަރު 1) - އިޓާލިއަން ލީގުގައި ވެރޯނާއާ އަތުން ރޭ ރޯމާ، 3-1 އިން މޮޅުކޮށްދޭން ބެންޗުން އަރައި ތަފާތު ދެއްކި 18 އަހަރުގެ ކްރިސްޓިއަން ވޮލްޕާޓޯ އަށް ހިތްވަރު ލިބުނީ އެ ޓީމުގެ ކޯޗު ހޯސޭ މޮރީނިއޯގެ ފަރާތުން ކަމަށް ބުނެފި އެވެ.
ރޯމާ އަށް ލީޑުނަގައިދޭން ރޭ މެޗުގެ 18 ވަނަ މިނިޓްގައި އެ ޓީމުގެ ޓަމީ އަބްރަހަމް އަށް ލިބުނު ފުރުސަތުން ވެރޯނާ ކީޕަރު ލޮރެންޒޯ މޮންޓީޕޯ ކައިރިން ނައްޓާފައި ޖެހި ބޯޅަ ބޭރުވީ ދަނޑީގައި ޖެހިފަ އެވެ. މެޗުގެ 26 ވަނަ މިނިޓްގައި ވެރޯނާ އިން ލީޑުނެގީ އޭރިއާތެރެއިން ޕަވެލް ޑަވިޑޯވިޗް ޖެހި ގޯލުންނެވެ. މި ގޯލު ޖެހިތާ 10 މިނިޓް ފަހުން، މެޗުގެ 36 ވަނަ މިނިޓްގައި ޑަވިޑޯވިޗް އަށް ވަނީ ސީދާ ރަތް ކާޑެއް ދައްކައިފަ އެވެ. މިއީ ނިކޯލޯ ޒަނިއޯލޯ އަށް ކުރި ނުރައްކާތެރި ފައުލަކަށް ޑަވިޑޯވިޗަށް ދެއްކި ރަތް ކާޑެކެވެ.
ފުރަތަމަ ހާފުގެ އިތުރު ވަގުުތުގެ ގޮތުގައި ދެއްކި ހަތަރު މިނިޓްގެ ތެރެއިން ފަހު މިނިޓްގައި ރޯމާ އަށް އެއްވަރުކޮށްދިނީ ޒަނިއޯލޯ އެވެ. އޭރިއާތެރެއިން އަބްރަހަމް ޖެހި ބޯޅަ ދަނޑީގައި ޖެހިފައި ނުކުތްވަގުތު ޒަނިއޯލީ ވަނީ ގޯލަށް ބޯޅަ ފޮނުވާލައިފަ އެވެ.
އެއް ކުޅުންތެރިއަކު މަދުކޮށް ކުޅުނު ވެރޯނާ އަތުން ރޯމާ މޮޅުކޮށްދޭން އެންމެ ބޮޑު ރޯލެއް ކުޅުނީ މެޗުގެ 57 ވަނަ މިނިޓްގައި ކުޅެން އެރި ވޮލްޕާޓޯ އެވެ. މެޗުގެ 88 ވަނަ މިނިޓްގައި ވޮލްޕާޓޯ ވަނީ ނަމާންޏާ މަޓިޗް ނެގި ހުރަހަކުން އޭރިއާ ރޮނގުކައިރިން ގޯލުގެ ތިރީ ކަނަށް ބޯޅަ ފޮނުވާލައިފަ އެވެ. އަދި އިތުރު ވަގުތުގެ ދެ ވަނަ މިނިޓްގައި ސްޓެފަން އެލްޝަރާވީ ރޯމާގެ ދެ ވަނަ ގޯލު ޖެހީ ވޮލްޕާޓޯ ދިން ބޯޅައަކުންނެވެ.
މެޗަށް ފަހު ވޮލްޕާޓޯ ބުނީ ބަދަލަކަށް ކުޅެން އެރުވިއިރު، އޭނާ ހުރީ ރަނގަޅަށް ވޯމްއަޕް ވެސް ނުވެ ކަމަށާއި އެކަމަކު، ޔަގީންކަން ލިބުނީ ކޯޗު މޮރީނިއޯ ދެއްކި ވާހަކަތަކުގެ ސަބަބުން ކަމަށެވެ.
"ވޯމްއަޕް ނުވެ ހުއްޓައިވެސް ކޯޗުގެ ވާހަކައިން އެނގުނު އަހަންނާ މެދު އޭނާ އުންމީދުތަކެއް ކޮށް އިތުބާރުކުރާކަން. އެއީ ޒުވާން ކުޅުންތެރިއަކަށް މެޗެއްގައި އަރާއިރު އެންމެ ބޭނުންވާނެ ކަމަކީ، ކޯޗު (މޮރީނިއޯ)ގެ ވާހަކަތަކުން އިތުބާރު ލިބުނު،" އޮސްޓްރޭލިއާ އަށް އުފަން ވޮލްޕާޓޯ ބުންޏެވެ.
ރޭގެ މެޗަކީ އިޓަލީގެ އުމުރުފުރާ ގައުމީ ޓީމަށް ކުޅޭ ވޮލްޕާޓޯ އަށް ރޯމާގެ ލީގު މެޗަކުން ފުރުސަތު ލިބުނު ފުރަތަމަ ފަހަރެވެ.
ރޭގެ މޮޅާ އެކު ރޯމާ ވަނީ ލީގުގެ ހަތަރު ވަނަ އަށް ޖެހިލައިފަ އެވެ. އެއީ 12 މެޗުން 25 ޕޮއިންޓް ހޯދައިގެންނެވެ. ރޯމާ އަށް ވުރެން ކުރީގައި އޮތީ 12 މެޗުން 26 ޕޮއިންޓާ އެކު ތިން ވަނައިގައި އޮތް އޭސީ މިލާނާއި 12 މެޗުން 27 ޕޮއިންޓާ އެކު ދެ ވަނައިގައި އޮތް އެޓަލަންޓާގެ އިތުރުން، 12 މެޗުން 32 ޕޮއިންޓް ހޯދައިގެން އެއް ވަނަ މަގާމުގައި އޮތް ނަޕޯލީ އެވެ.
