މެޑްރިޑް (އޮކްޓޫބަރު 31) - ސްޕެނިޝް ލީގުގައި މިރޭ ޖިރޯނާ އިން 1-1 އިން ރެއާލް މެޑްރިޑާ އެއްވަރުކުރި މެޗުގައި އެ ޓީމުގެ މިޑްފީލްޑަރު ޓޯނީ ކްރޫސް އަށް ފުޓްބޯޅަ ކެރިއަރުގައި ފުރަތަމަ ފަހަރަށް ރަތް ކާޑެއް ދައްކައިފި އެވެ.
މެޗުގެ އިތުރު ވަގުތުގައި ކްރޫސް، 32، ކުރި ފައުލަކަށް ވަނީ ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ. މިއީ ކްރޫސްގެ ފުޓްބޯޅަ ކެރިއަރުގެ 776 ވަނަ މެޗެވެ. އެ ގޮތުން، 2007 ވަނަ އަހަރު ފެށި ޕްރޮފެޝަނަލް ކެރިއަރުގައި ކްރޫސަށް މިއަދާ ހަމައަށް ރަތް ކާޑެއް ދައްކާފައިނުވެ އެވެ.
ޖިރޯނާއާ އެއްވަރުވެ، ޕޮއިންޓް ގެއްލުނަސް ރެއާލް އޮތީ ލީގުގެ އެއް ވަނައިގައި އެއް ޕޮއިންޓުގެ ލީޑަކާ އެކު އެވެ. ރެއާލަށް 12 މެޗުން 32 ޕޮއިންޓް ލިބިފައިވާއިރު، ދެ ވަނައިގައި އޮތް ބާސެލޯނާ އަށް 12 މެޗުން ވަނީ 31 ޕޮއިންޓް ލިބިފަ އެެވެ.
ދާދި ފަހުން ބެލޮންޑިއޯ އެވޯޑް ހާސިލްކުރި ކަރިމް ބެންޒެމާ މިރޭގެ މެޗުގައި ވެސް ފަލަމަސްގަނޑަށް ލިބިފައިވާ އަނިޔާ އިން އެއްކޮށް ރަނގަޅުނުވާތީ ނުކުޅެ އެވެ.
މިރޭގެ މެޗުގައި ރެއާލަށް މެޗުގެ 22 ވަނަ މިިނިޓްގައި ލީޑުނަގައިދޭން އޭރިއާތެރެއިން ރޮޑްރީގޯ ޖެހި ބޯޅަ ބޭރުވީ ދަނޑީގައި ޖެހިފަ އެވެ. މެޗުގެ 38 ވަނަ މިނިޓްގައި ޖިރޯނާގެ ޔަންގެލް ހެރާރާ ޖެހި ބާރު ބޯޅަ ވެސް ވަނީ ހުރަސްދަނޑިއަށް އަމާޒުވެފަ އެވެ.
ލަނޑެއް ޖަހަން ރެއާލުން ކުރި މަސައްކަތް ކާމިޔާބުވީ މެޗުގެ 70 ވަނަ މިނިޓްގަ އެވެ. އޭރިއާތެރެއިން ފެޑެރީކޯ ވަލްވޭޑޭ ހުރަސްކޮށްލި ބޯޅަ ވިނީޝިއުސް ޖޫނިއާ ވަނީ ހުސްކޮށް އަރައި ގޯލަށް ބޯޅަ ފޮނުވާލައިފަ އެެވެ.
އޭގެ 10 މިނިޓް ފަހުން ޖިރޯނާ އިން އެއްވަރުކުރީ ކްރިސްޓިއަން ސްޓުއާނީ ޖެހި ޕެނަލްޓީންނެވެ. މިއީ ހިލޭ ޖެހުމެއްގައި ރެއާލްގެ އޭރިއާތެރެއިން އެ ޓީމުގެ މާކޯ އަސެންސިއޯ އަތުގައި ބޯޅަ ޖެހުމުން ވީޑިއޯ އެސިސްޓަންޓް ރެފްރީ (ވީއޭއާރް) ބަލާފައި ރެފްރީ ދިން ޕެނަލްޓީ އެކެވެ.
އަލުން ރެއާލަށް ލީޑުނަގައިދޭން ރޮޑްރީގޯ ޖެހި ގޯލެއް ބަލައިނުގަންނަން ރެފްރީ ނިންމީ ޖިރޯނާގެ ކީޕަރު ޕައޮލޯ ގަޒަނީގާ އަތުގައި ބޯޅައިގެ ކޮންޓްރޯލް އޮއްވައި، ރޮޑްރީގޯ ބޯޅަ ފޮނުވާލުމުންނެވެ. މި ގޮތަށް ނިންމީ ވީއޭއާރް އިން ބަލައި ޔަގީންކުރުމަށް ފަހު އެވެ.
ސްޕެނިޝް ލީގުގެ މި ފަހަރުގެ ސީޒަނުގައި ރެއާލް އަދި ބަލިވެފައިނުވެ އެވެ. އެކަމަކު، އެ ޓީމު އަތުން ދެ މެޗެއްގައި ޕޮއިންޓް ގެއްލިފައި ވަނީ އަމިއްލަ ދަނޑުގައި އެއްވަރުވެގެންނެވެ. ޖިރޯނާގެ ކުރިން ރެއާލް އަތުން ޕޮއިންޓް ހޯދީ އޮސަސޫނާ އެވެ.
