އަމްސްޓެޑަމް، ނެދަލެންޑްސް (އޮކްޓޫބަރު 26) - ޓީމުގެ މިވަގުތުގެ ހާލަތަށް ބަލާއިރު މިރޭ އަޔެކްސް އަތުން ރަނގަޅު ނަތީޖާއެއް ހޯދައި، ޔުއެފާ ޗެމްޕިއަންސް ލީގުގެ ދެ ވަނަ ބުރުގެ ޖާގައެއް ވީހާވެސް އަވަހަށް ހޯދުން މުހިންމު ކަމަށް ލިވަޕޫލްގެ ކޯޗު ޔާގަން ކްލޮޕް ބުނެފި އެވެ.
ޔުއެފާ ޗެމްޕިއަންސް ލީގުގައި މިރޭ އަޔެކްސްއާ ދެކޮޅަށް ލިވަޕޫލް ނުކުންނައިރު ދެ ވަނަ ބުރުގެ ޖާގައެއް ހޯދަން އެޓީމަށް ބޭނުންވަނީ އެންމެ ޕޮއިންޓެކެވެ. އެ ޓީމަށް ހަތަރު މެޗުން ނުވަ ޕޮއިންޓް ލިބިފައި އޮތްއިރު ތިންވަނައިގައި އަޔެކްސް އޮތީ ހަތަރު މެޗުން ތިން ޕޮއިންޓް ހޯދައިގެންނެވެ.
މިރޭ އަޔަކްސް މެޗުން ޕޮއިންޓެއް ލިބުނަސް ލިވަޕޫލަށް ދެ ވަނަ ބުރުން ޖާގަ ލިބޭނެ އެވެ. އަޔަކްސް މޮޅުވެއްޖެނަމަ ދެ ވަނަ ބުރުގެ ފަހު ޖާގަ ލިބޭނެ ޓީމެއް މި ގްރޫޕުން އިނގޭނީ ގްރޫޕް ސްޓޭޖުގެ ފަހު މެޗުންނެވެ. މި ގްރޫޕުން ނަޕޯލީ ވަނީ ދެ ވަނަ ބުރުގެ ޖާގަ ޔަގީންކޮށްފަ އެވެ.
މިރޭގެ މެޗަށް ނުކުންނައިރު ލިވަޕޫލަށް އޮތް އެންމެ ބޮޑު ހިތްހަމަޖެހުމަކީ އަނިޔާގެ ސަބަބުން ކުޅުމާއި ދުރުގައި ހުރި ފޯވާޑް ޑާވިން ނުނޭޒް އާއި ފްރާންސްގެ ޑިފެންޑަރު އިބްރާހިމާ ކޮނާޓޭ ފިޓުވެފައިވުމެވެ.
މިދިޔަ ހަފްތާގައި ވެސްޓް ހޭމް އަތުން ލިވަޕޫލް މޮޅުވި މެޗުގައި ކުޅުމަށް ފަހު ނޫނޭޒްގެ ފަލަމަސްގަނޑަށް ލިބުނު އަނިޔާގެ ސަބަބުން ހުރީ ކުޅުމާއި ދުރުގަ އެވެ. އެންމެ ފަހުން ލީގުގައި ނޮޓިމްހަމް ފޮރެސްޓް އަތުން ލިވަޕޫލް ބަލިވި މެޗުގައި ވެސް ނުނޭޒް ނުކުޅެ އެވެ.
ކްލޮޕް ބުނީ ޓީމުގެ ހާލަތަށް ބަލާއިރު އަނިޔާއިން އެނބުރި އަންނަ ކޮންމެ ކުޅުންތެރިއަކާ އެކު ހިތްހަމަޖެހުމުގެ ނޭވާއެއްލެވޭ ކަމަށެވެ. ނަމަވެސް އެއީ އޭނާ އިތުރަށް ޓީމާ މެދު ސަމާލުވާން ޖެހޭ ކަމެއްގެ ގޮތުގައި ކްލޮޕް ސިފަކުރި އެވެ.
"ދެ ކުޅުންތެރިން އެނބުރި މިއައީ. އެކަމަކު، އަހަންނަށް ބޮޑު ރިސްކެއް ނަގާފައި ދެ ކުޅުންތެރިން އެގާރައަށް ލައިގެން ނެތް ކުޅެވެން. އަނެއްކާ އިންޖަރީވެއްޖެއްޔާ ހާތަލު މާ ބޮޑަށް ގޯސްވާނެ" ކްލޮޕް ބުންޏެވެ.
ކްލޮޕް ބުނީ މިއީ ލިވަޕޫލަށް ވަރަށް ބޮޑަށް ބަދުނަސީބު ސީޒަނެއް ކަމަށެވެ. ކުޅުންތެރިން ފިޓުވެ ކުޅުމުގެ ތެރެއަށް އަންނައިރު އަނެއްކާ އެހެން ކުޅުންތެރިއަކަށް އަނިޔާވާކަން ކްލޮޕް ފާހަގަކުރި އެވެ.
އެހެންކަމުން މިވަގުތުގެ ހާލަތަށް ބަލާއިރު ވީހާވެސް އަވަހަށް ލިވަޕޫލަށް ޗެމްޕިއަންސް ލީގުގެ ދެ ވަނަ ބުރުގެ ޖާގަ ޔަގީންވުމަކީ ކްލޮޕް އަށް ހަމަޖެހުމުގެ ނޭވާއެއް ލިބޭނެ ކަމެކެވެ.
ކްލޮޕް ބުނީ އެއް ފެންވަރެއްގައި ޓީމަށް ނުކުޅެވި ރަނގަޅު ނަތީޖާތަކެއް ނުނެރެވޭ މައިގަނޑު ސަބަބަކީ ވެސް އަނިޔާގެ މައްސަލަތައް ކަމަށެވެ. ނަތީޖާތައް ދަށްވުމާއި އެހެނިހެން ކަންކަމުގެ ވާހަކަ އަހާ ކޮންމެ ފަހަރަކުވެސް އޭނާ އަށް ދެވެން އޮތީ އެންމެ ޖަވާބެއް ކަމަށް ކްލޮޕް ވަނީ ބުނެފަ އެވެ.
އަޔަކްސްގެ ކޯޗު އަލްފްރެޑް ޝްރޫޑާ ބުނީ ލިވަޕޫލްގެ ލީގު ފޯމަކީ ޗެމްޕިއަންސް ލީގު މެޗުތަކަށް އަސަރުކުރާނެ ކަމެއްގެ ގޮތުގައި އޭނާ ނުދެކޭ ކަމަށެވެ.
