ދޯހާ (އޮކްޓޫބަރު 26) - މި އަހަރު ވޯލްޑް ކަޕް ބާއްވާ ގައުމު ކަމަށްވާ ގަތަރަށް އަމާޒުވެފައިވާ ފާޑުކިއުންތަކަށް ގަތަރުގެ އަމީރު ޝޭހް ތަމީމް ބިން ހަމަދު އަލް ތާނީ ރައްދުދެއްވައިފި އެވެ.
ދުނިޔޭގެ އެންމެ މުއްސަނދި އެއް ގައުމު ކަމަށްވާ ގަތަރުގައި އަންނަ މަހު ފަށާ ވޯލްޑް ކަޕަކީ މެދުއިރުމަތީގެ ގައުމެއް ވޯލްޑް ކަޕް ކުޅޭ ފުރަތަމަ ފަހަރެވެ. ގަތަރަށް ވޯލްޑް ކަޕްގެ ހޯސްޓިން ލިބުނު ހިސާބުން ފެށިގެން އެ ގައުމަށް ގިނަ ފާޑުކިއުންތައް ވަނީ އަމާޒުވެފަ އެވެ. އެންމެ ފުރަތަމަ އަމާޒުވި ފާޑުކިއުންތަކަކީ ގަތަރަށް ވޯލްޑް ކަޕްގެ ހޯސްޓްކަން ދިނުމުގައި ކޮރަޕްޝަންގެ އަމަލުތައް ހިނގާފައިވާ ތުހުމަތުތަކާ ގުޅިގެނެވެ. އަދި އޭގެ ފަހުން ގަތަރުގައި އުޅޭ ބިދޭސީ މަސައްކަތްތެރީންގެ ހާލަތާއި ވޯލްޑް ކަޕްގެ ސްޓޭޑިއަމްތައް ހެދުމުގައި އުޅުނު މަސައްކަތްތެރިންނަށް ލާއިންސާނީ ގޮތްތަކަށް އަމަލުކޮށްފައިވާ ބުނެ، ގިނަ ފާޑުކިއުންތަކެއް އަމާޒުވި އެވެ.
ގަތަރު ގާނޫނު ހަދާ ކައުންސިލްގައި ތަގުރީރު ކުރައްވަމުން، ގަތަރުގެ އަމީރު ވިދާޅުވީ ގަތަރަށް ވޯލްޑް ކަޕްގެ ހޯސްޓިން ރައިޓްސް ލިބުނު ހިސާބުން ފެށިގެން ގިނަ ފާޑުކިއުންތަކެއް އަމާޒުވެފައިވާ ކަމަށާއި މީގެ ކުރިން ވޯލްޑް ކަޕް ބޭއްވި އެއްވެސް ގައުމަކަށް "މިވަރަށް ފާޑުކިއުންތައް އަމާޒުނުވާ" ކަމަށެވެ.
އަމީރު ވިދާޅުވީ ފާޑުކިއުންތައް އަމާޒުވިޔަސް، އެންމެ ފުރަތަމަ ފާޑުކިއުންތައް ބަލައިގަނެ، ބައެއް ކަންތައްތައް ރަނގަޅުކުރަން އެހީތެރިވާ ކަމެއްގެ ގޮތުގައި ވެސް ގަބޫލްކުރެއްވި ކަމަށެވެ. އެހެން ނަމަވެސް، މި ފާޑުކިއުންތަކަކީ އެހެން މަގްސަދެއްގައި ކުރާކަމެއްކަން ފަހުން އެނގިވަޑައިގަތް ކަމަށެވެ.
"އެހެން ނަމަވެސް ވަކި ހިސާބަކުން ގަތަރާ ދެކޮޅަށް މިކުރާ ކެމްޕޭންތަކުގައި ދޮގު މައުލޫމާތުތަކާއި ތަފާތުކުރުންތައް ފާހަގަކުރެވި، މި ކަމުގެ ފަހަތުގައި އޮތް ހަގީގީ މަޤްސަދާއި އިހުލާސްތެރިކަމާމެދު ގިނަ މީހުންނަށް ސުވާލު އުފެދުނު،" އަމީރު ވިދާޅުވި އެވެ.
އަންނަ މަހުގެ 20 ވަނަ ދުވަހު ގަތަރުގައި ވޯލްޑް ކަޕް ފަށާއިރު، މި މުބާރާތް ބެލުމަށް އެ ގައުމަށް އެއް މިލިއަނަށްވުރެ ގިނަ މީހުން ޒިޔާރަތްކުރާނެ ކަމަށް ލަފާކުރެވެ އެވެ.
އަމީރު ވިދާޅުވީ ވޯލްޑް ކަޕަކީ ގަތަރުން އިޤްތިސާދީ ކުރިއެރުމާއި ވަސީލަތްތަކާއި ޤައުމެއްގެ ގޮތުގައި ހޯދާފައިވާ ކުރިއެރުންތައް މުޅި ދުނިޔެ އަށް ދައްކާލަން ލިބޭ ފުރުސަތެއް ކަމަށެވެ. -- އޭއެފްޕީ
