މި އަހަރުގެ ކްލަބު މޯލްޑިވްސް ކަޕްގެ ގުރޫޕް ސްޓޭޖުން، ދެ ވަނަ ބުރަށް ކޮލިފައިވި ޓީމުތަކުގެ ތެރޭގައި އެންމެ ރަނގަޅު ޑިފެންސް ރެކޯޑަކާއެކު ގަދަ 16 އަށް ކުރިމަތިލަނީ މޯލްޑިވްސް ޕޯޓްސް ލިމިޓެޑް (އެމްޕީއެލް) އެވެ.
ގުރޫޕް ސްޓޭޖުގައި ކުޅުނު ތިން މެޗުން ވެސް އެމްޕީއެލް މޮޅުވިއިރު، އެ ޓީމުން ވަނީ 14 ލަނޑު ޖަހައިފަ އެވެ. ކްލަބު މޯލްޑިވްސްގެ ޗެމްޕިއަންކަން ތިން ފަހަރު ހޯދާފައިވާ އެމްޕީއެލް ކޮޅަށް މުބާރާތުގައި އަދި ލަނޑެއް ނުވަދެ އެވެ. މި މުބާރާތުގައި މިހާތަނަށް ލަނޑެއް ކޮޅަށް ނުވަދެ އޮތް ހަމައެކަނި ޓީމަކީ އެމްޕީއެލް އެވެ. އެހެންކަމުން، މިއީ ދެވަނަ ބުރުގައި މިރޭ މޯލްޑިވިއަންއާ ދެކޮޅަށް ނުކުންނައިރު އެމްޕީއެލް އަށް ލިބޭނެ ވަރަށް ބޮޑު އިތުބާރެކެވެ.
ގުރޫޕް ސްޓޭޖުގައި ކުޅުނު ފުރަތަމަ މެޗުގައި އެމްޕީއެލް އިން ވަނީ އެ ކުންފުންޏާ އެންމެ ގާތުން މަސައްކަތްކުރާ އެއް މުއައްސަސާ ކަމަށްވާ ކަސްޓަމްސްގެ ޓީމު އަތުން 3-0 އިން މޮޅުވެފަ އެވެ. ދެ ވަނަ މެޗުގައި ޔޫތު މިނިސްޓްރީ އަތުން އެމްޕީއެލް މޮޅުވީ 4-0 އިންނެވެ. އަދި ފަހު މެޗުގައި އާސަންދަ އަތުން އެމްޕީއެލް މޮޅުވީ 7-0 އިންނެވެ.
ކްލަބު މޯލްޑިވްސްގެ ތާރީހުގައި އެމްޕީއެލް އަކީ ފާހަގަކޮށްލެވޭ ޓީމެކެވެ. ދެހާސް ހަ ވަނަ އަހަރު އޮތް އެންމެ ފުރަތަމަ ކްލަބު މޯލްޑިވްސް މުބާރާތުގެ ޗެމްޕިއަނުންނަކީ އެމްޕީއެލް އެވެ. އޭގެ ފަހުން 2012 އަދި 2013 ވަނަ އަހަރު އެމްޕީޢެލް މުބާރާތުގެ ޗެމްޕިއަންކަން ހޯދި އެވެ. އަދި ކޮންމެ އަހަރަކު ވެސް މުބާރާތުގެ އެންމެ ވަރުގަދަކޮށް ނުކުންނަ ޓީމެއްގެ ގޮތުގައި އެމްޕީއެލް ފާހަގަކުރެވެ އެވެ.
އެހެން ނަމަވެސް، ފަހުގެ ތާރީހުގައި އެމްޕީއެލް އަށް މި މުބާރާތުގައި އެ ޓީމުން އުންމީދުކުރި ހިސާބަކަށް ނުދެވުނެވެ. އެމްޕީއެލް އިން އެންމެ ފަހުން މި މުބާރާތުގައި ފައިނަލެއްގައި ކުޅުނީ 2017 ވަނަ އަހަރެވެ.
ކުރިން އެސްޓީއޯ އާއި އެމްޕީއެލްގެ ޓީމުން ކްލަބު މޯލްޑިވްސްގައި ވިދާލި ކުޅުންތެރިޔާ އަހުމަދު ވިސާލް (އަންދު)ގެ ކޯޗުކަމުގެ ދަށުން އެމްޕީއެލްގެ ޓީމު ފެންނަނީ ވަރަށް ރޭވުންތެރި، އަދި މަސައްކަތުގެ ރޭޓް ރަނގަޅު ޓީމެއްގެ ގޮތުގަ އެވެ.
ފުޓްސަލްގެ މާ ގިނަ "ތަރިން"ތަކެއް ނެތް ނަމަވެސް އެމްޕީއެލްގައި އޮތީ ރަނގަޅު ސްކޮޑެކެވެ. ފަސްޓް ޑިވިޝަންގައި ފާހަގަކޮށްލެވޭ ޔުނައިޓަޑް ވިކްޓަރީގެ އަލީ ހައިސަމް (ޗުމްޕު) އާއި އަލީ ޝަމާލް އަބްދުﷲ (ޝައްމު) އާއި ޓީސީ ސްޕޯޓްސްގެ މުހައްމަދު ސާދު ނިޒާރު ހިމެނޭ ޓީމުގައި ފުޓްސަލްގެ ދަނޑުގައި ފާހަގަވެފައިވާ ގިނަ ކުޅުންތެރިންތަކެއް އެބަތިއްބެވެ.
ޓީމުގެ ފޯމާއެކު ސަޕޯޓަރުންގެ އިތުބާރު ވެސް ބޮޑު
މި މުބާރާތުގެ ކުރީކޮޅު، އެމްޕީއެލްގެ ސަޕޯޓަރުންގެ ފޯރި ފެނުނީ ތަންކޮޅެއް "ފިނި" ކޮށެވެ. އެކަމަކު، ދެ ވަނަ މެޗާ ހިސާބުން، އެމްޕީއެލް ކުޅޭ މެޗުތަކުގައި އެ ޓީމުގެ ސަޕޯޓަރުންގެ އަޑު ވަނީ ދަނޑުގައި ހިތްޕާލައިފަ އެވެ. ޓީމު ރަނގަޅު ފޯމެއްގައި އޮތުމަކީ، އެ ޓީމުގެ ސަޕޯޓަރުންނަށް ވެސް ލިބޭނެ އިތުބާރެކެވެ. ސަޕޯޓަރުންގެ ތެރޭގައި، އެ ކުންފުނީގެ އިސްވެރިން ވެސް ބެރާއި ދުންމާރި ހިފައިގެން ސަޕޯޓުކުރާ މަންޒަރު ފާއިތުވި މެޗުތަކުގައި ވަނީ ފެނިފަ އެވެ. ގަދަ 16 އަށް ކުރިމަތިލާއިރު، އެމްޕީއެލްގެ ސަޕޯޓަރުންގެ ފޯރި ވެސް ގަދަވާނެ ކަމަށް ބެލެވެ އެވެ.
ގުރޫޕް ސްޓޭޖުގައި ކުޅުނު ތިން މެޗަށްވުރެ، އެމްޕީޢެލް އަށް ގަދަ 16ގެ ބުރުގައި އޮތީ އުނދަގޫ މެޗެކެވެ. މިހާތަނަށް މުބާރާތުގައި އެމްޕީއެލް ކުރިމަތިލާ އެންމެ ބޮޑު އިމްތިހާނެވެ. އަދި ޓީމުގެ ފެންވަރު ވެސް ވަޒަންކޮށްލެވޭނެ މެޗަކަށްވާއިރު، މި މެޗުގެ ފޯރިގަދަވާނެ ކަމަށް ބެލެވެ އެވެ.
މޯލްޑިވިއަންގެ އަމާޒު ކުއާޓާ އަށް
އެމްޕީއެލްގެ އުންމީދުތަކަށް ހުރަސްއަޅައި، ކުއާޓާ ފައިނަލްގެ ޖާގައެއް ހޯދުމުގެ އަޒުމުގައި އެ ޓީމާ ދެކޮޅަށް ނުކުންނަ މޯލްޑިވިއަން އަކީ ވެސް ވަރުގަދަ ޓީމެކެވެ.
މޯލްޑިވިއަން މުބާރާތުގެ ދެ ވަނަ ބުރުން ޖާގަ ހޯދީ ގުރޫޕް ބީގެ ދެވަނަ ޓީމުގެ ގޮތުގަ އެވެ. މޯލްޑިވިއަން މި ގުރޫޕްގައި ކުޅުނު ފުރަތަމަ ދެ މެޗުގައި މީޑިއާ ނެޓާއި ސިޓީ ކައުންސިލް އަތުން މޮޅުވިއިރު، ފަހު މެޗުގައި ބަލިވީ އެންމެ ފަހުގެ ޗެމްޕިއަން، ރޯޑް ރެކްރިއޭޝަން ކްލަބް (އާރްއާރްސީ)ގެ އަތުންނެވެ. ފަހު މެޗަށް ކުރިމަތިލިއިރު ވެސް މޯލްޑިވިއަން އޮތީ ދެ ވަނަ ބުރަށް ދަތުރުކޮށްފަ އެވެ.
ރާއްޖޭގެ ޤައުމީ ޓީމުގެ މިޑްފީލްޑަރު ހަމްޒާ މުހައްމަދު (ހަމްޕު) އާއި ކްލަބު މޯލްޑިވްސްގައި ފާހަގަކޮށްލެވޭ ހުސެއިން އަފްޒަލް (އޮޒިލް) އާއި ކަނޑިތީމު ފުޓްސަލް ޓީމުން ވިދާލި އިބްރާހިމް ނަދާދު ފަދަ ކުޅުންތެރިންނާ އެކު، މޯލްޑިވިއަން އަކީ އެމްޕީއެލްއާ ރަނގަޅު ވާދައެއް ކުރެވޭ ފެންވަރުގެ ޓީމެކެވެ.
މޯލްޑިވިއަން އާއި އެމްޕީއެލްގެ މެޗާއި ކްލަބް އެއާޕޯޓްސް އަދި އެސްޓީއޯ ކުޅޭ މެޗު ފަށާނީ މިރޭ 20:15 ގަ އެވެ.
