މެންޗެސްޓާ (24 އޮކްޓޫބަރު) - މެންޗެސްޓާ ޔުނައިޓެޑަށް ކުޅެމުން އަންނަ ފްރާންސްގެ ޑިފެންޑަރު ރަފައެލް ވަރާން އަށް އަނިޔާވެ އަންނަ މަހު ފަށާ ފީފާ ވޯލްޑް ކަޕް ފުޓްބޯޅަ މުބާރާތުގައި ނުކުޅެވުމުގެ ބިރާ ކުރިމަތިލާން ޖެހިއްޖެ އެވެ.
ވަރާން އަކީ 2018 ގައި ފްރާންސުން ވޯލްޑް ކަޕްގެ ތަށި ދެ ވަނަ ފަހަރަށް ހޯދިއިރު އެ ޓީމުގެ މުހިންމު ކުޅުންތެރިއެކެވެ. އަދި އޭނާ އަކީ ކޯޗު ޑިޑިއޭ ޑެޝޯމްޕްސް ފުރަތަމަ އެގާރައިން ރަސްމީކޮށް ޖާގަ ހޯދަމުން އަންނަ ފްރާންސްގެ އެއް ނަންބަރު ޑިފެންޑަރެވެ.
ވަރާން، 29، އަށް އަނިޔާވީ އެންމެ ފަހުން ލީގުގައި މެންޗެސްޓާ ޔުނައިޓެޑުން ޗެލްސީއާ ދެކޮޅަށް ކުޅެ އެއްވަރުވި މެޗުގަ އެވެ. އެ މެޗުގެ 59 ވަނަ މިނެޓުގައި ލިބުނު އަނިޔާއެއްގެ ސަބަބުން އޭނާ ވަނީ ވަގުތުން ބަދަލުކޮށްފަ އެވެ. ފައިގެ ފަލަމަސްގަނޑަށް އަނިޔާވެ، ވަރާން ދަނޑުން ފޭބީ ރޮމުންނެވެ.
ފުރަތަމަ ބެލެވުނީ ވަރާންގެ ފަޔަށް ލިބުނު އަނިޔާގެ ސަބަބުން އޭނާ ދެ މަހެއްހާ ދުވަސް ކުޅުމާއި ދުރުގައި ހުންނަން ޖެހޭނެ ކަމަށެވެ. ނަމަވެސް އެންމެ ފަހުން ހެދި ޓެސްޓުތަކުން ދައްކާ ގޮތުން ހީކުރި ވަރަށް އަނިޔާ ގޯހެއް ނޫނެވެ. ނަމަވެސް އޭނާ އެނބުރި ކުޅުމުގެ ތެރެއަށް އަންނަން މަދުވެގެން ތިން ހަފްތާ ބޭނުންވާނެ ކަމަށް ޑޮކްޓަރުންނާ ހަވާލާދީ ފްރާންސްގެ ނޫސްތަކުން ބުނެ އެވެ.
ވަރާންގެ ފަލަމަސްގަނޑަށް އަނިޔާވެގެން ދަނޑުމަތީގައި އޮށޯވެގެން: މީގެ ކުރިން ވެސް ވަރާން އަށް އަނިޔާގެ އެކި މައްސަލަތަކެއް ވަނީ ކުރިމަތިވެފައި.
މީޑިއާ ރިޕޯޓްތައް ބުނާ ގޮތުން ވަރާން އަށް އެނބުރި ކުޅުމުގެ ތެރެއަށް އާދެވުނަސް ވޯލްޑް ކަޕްގެ ގްރޫޕް ސްޓޭޖުގައި ފްރާންސް ކުޅޭ ފުރަތަމަ މެޗަށް އޭނާ ފިޓުވުމުގެ ފުރުސަތު ކުޑަ އެވެ. އެހެންކަމުން އޭނާ އަށް ޑެޝޯމްޕްސް ފުރުސަތު ދޭނެތޯ އޮތީ ސުވާލު އުފެދިފަ އެވެ.
ވަރާން އަށް އަނިޔާވެއްޖެ ނަމަ އޭނާގެ މަގާމް ފުރުން ގާތީ މި ވަގުތު އާސެނަލްގައި ރަނގަޅު ކުޅުމެއް ދައްކަމުން އަންނަ ޒުވާން ޑިފެންޑަރު ވިލިއަމް ސަލީބާ ނޫނީ ބަޔާން މިއުނިކްގެ ޑަޔޮޓް އުޕަމެކާނޯ އެވެ.
އެންމެ ފަހުގެ ޗެމްޕިއަން ފްރާންސަކީ ވޯލްޑް ކަޕަށް ނުކުންނައިރު އެންމެ އުނދަގޫ ހާލަތުގައި އޮތް ޓީމެވެ. އެންމެ ފަހުން ކުޅުނު ވޯލްޑް ކަޕްގައި ފްރާންސުން ދުނިޔޭގެ ތަށި އުފުލާލިއިރު، ފްރާންސްގެ މެދުތެރޭގައި މުހިންމު މިޑްފިލްޑަރު އެންގޯލޯ ކާންޓޭ އަށް އަނިޔާވެ، އޭނާ އަށް މުބާރާތުގައި ނުކުޅެވޭ ކަން ޔަގީންވެފައިވާއިރު، މިޑްފިލްޑަރު ޕޮގްބާވެސް އަދި ފިޓެއް ނުވެ އެވެ.
ޕޮގްބާ އަށް ވޯލްޑް ކަޕްގެ ކުރިން ކުޅުމުގެ ތެރެއަށް އާދެވެނޭ ކަމަށް ބެލެވުނު ނަމަވެސް މުބާރާތަށް ފޯމަށް އެޅޭނެކަމާ މެދު ޝައްކެވެ. އަނެއްކޮޅުން، ކެޕްޓަން ހޫގޯ ލޮރިސް އާއި މުހިންމު ފޯވާޑް އެންޓޮއިން ގްރީޒްމަން ވެސް މިހާރު ހުރީ އެންމެ ރަނގަޅު ފޯމެއްގައެއް ނޫނެވެ.
ގަތަރުގައި އަންނަ މަހުގެ 20 ވަނަ ދުވަހު ފަށާ ވޯލްޑް ކަޕްގައި ފްރާންސް ހިމެނެނީ އޮސްޓްރޭލިއާ، ޑެންމާކް އަދި ޓިއުނީޝިއާއާ އެކު ގްރޫޕް ޑީގަ އެވެ.
