ލިވަޕޫލް (އޮކްޓޫބަރު 19) - އިނގިރޭސި ޕްރިމިއާ ލީގުގައި އެންމެ ފަހުން ލިވަޕޫލް ކުޅުނު މެޗުގައި ކުޑަކަޅުވާ އަށް ލިބުނު އަނިޔާގެ ސަބަބުން ޕޯޗުގީސް ފޯވާޑް ޑިއޯގޯ ޖޮޓާ އަށް އަންނަ މަހު 20 ވަނަ ދުވަހު ފަށާ ފީފާ ވޯލްޑް ކަޕްގައި ކުޅުމުގެ ފުރުސަތު ގެއްލިއްޖެ އެވެ.
އާދިއްތަ ދުވަހުގެރޭ މެންޗެސްޓާ ސިޓީ އަތުން 1-0 އިން ލިވަޕޫލް މޮޅުވި މެޗުގެ ފަހު ވަގުތު ޖޮޓާ ފަޔަށް އަނިޔާވެގެން ދަނޑުން ބޭލީ ސްޓްރެޗަރުގަ އެވެ. މެޗަށް ފަހު ދިން އިންޓަވިއުގައި ލިވަޕޫލްގެ ކޯޗު ޔާގެން ކްލޮޕް ވަނީ ޖޮޓާގެ އަނިޔާއާ ބެހޭގޮތުން ދެވެން އޮތީ "ހިތްހަމަޖެހޭ ހަބަރެއް" ނޫން ކަމަށެވެ.
ޕްރިމިއާ ލީގުގައި މިރޭ ވެސްޓް ހޭމް ޔުނައިޓެޑާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ކްލޮޕް ބުނީ ޖޮޓާ އަށް ލިބުނު އަނިޔާގެ ސަބަބުން އޭނާ އޮޕަރޭޝަނެއް ކުރަން ނުޖެހުނު ކަމުގައި ވިޔަސް ވޯލްޑް ކަޕުގައި ނުކުޅެވޭނެ ކަމަށެވެ.
ޖޮޓާ އަށް އަނިޔާވުމަކީ ކުރިއަށް ހުރި މެޗުތަކާ ކުރިމަތިލާއިރު، ލިވަޕޫލަށާއި ވޯލްޑް ކަޕްގައި ޕޯޗުގަލް އަށް ވެސް ލިބޭނެ ދެރައެއް ކަމަށް ކްލޮޕްގެ ވާހަކައިގައި ފާހަގަކުރި އެވެ.
ޖޮޓާ، 25، އެނބުރި އަންނާނެ ސީދާ ތާރީހެއް ލިވަޕޫލުން ހާމަނުކުރި ނަމަވެސް މި އަހަރު އޭނާ އަލުން ފެނުމުގެ ފުރުސަތެއް ނެތް ކަމަށް ރިޕޯޓްތައް ބުނެ އެވެ.
އެކަމަކު، ކަކުލަށް ލިބިފައިވާ އަނިޔާގެ ސަބަބުން ކުޅުމާ ދުރުގައި ހުރި ލިވަޕޫލްގެ ކޮލަމްބިއާ ވިންގް، ލުއިސް ޑިއާޒް، ވޯލްޑް ކަޕަށް ފަހު އަލުން ލީގު ފަށާއިރު، ފިޓްވާނެ އެވެ.
ޕްރީ ސީޒަނުގެ ތެރެއިން އޭޝިއާ ޓުއާގައި ޖޮޓާގެ ފަލަމަސްގަނޑަށް ލިބުނު އަނިޔާގެ ސަބަބުން ސީޒަނުގެ ފުރަތަމަ މެޗުތަކުގައި ވެސް އޭނާ އަށް ނުކުޅެވުނެވެ. އެކަމަކު، މިދިޔަ މަސް ތެރޭ އަނިޔާއިން ރަނގަޅުވެގެން އައިސް ލިވަޕޫލްގެ ފުރަތަމަ އެގާރައިގައި މޮޅު ކުޅުމެއް ދައްކަން ފެށިތާ މާގިނަ ދުވަހެއް ނުވެ، އަނެއްކާ ވެސް މި ވަނީ ކުޅުމާ ދުރަށް ދާން ޖެހިފަ އެވެ.
ޕޯޗުގަލްގެ ގައުމީ ޓީމުން އެންމެ ފަހުން ކުޅުނު ނޭޝަންސް ލީގުގެ މެޗުތަކުގައި ވެސް އެ ޓީމުގެ ކޯޗު ފެނާންޑޯ ސަންޓޯސް ވަނީ ޖޮޓާ ބޭނުންކޮށްފަ އެވެ. ޖޮޓާ ވަނީ ޕޯޗުގަލް ގައުމީ ޓީމަށް މިހާތަނަށް ކުޅެދިން 29 މެޗުން 10 ގޯލު ޖަހައި، އަށް ގޯލު ޖަހަން ފުރުސަތު ތަނަވަސްކޮށްދީފަ އެވެ.
