ކްލަބް މޯލްޑިވްސް ކަޕްގައި މިރޭ ޓީމު މާލެ ސިޓީ ކައުންސިލް އަތުން 2-1 އިން މޯލްޑިވިއަން މޮޅުވިއިރު، މި ނަތީޖާއާ އެކު، ގްރޫޕް ބީން ގަދަ 16 ޓީމު ވާދަކުރާ ބުުރުގެ ދެ ޖާގަ ރޯޑް ޑިވެލޮޕްމަންޓް ކޯޕަރޭޝަން (އާރްއާރްސީ) އާއި މޯލްޑިވިއަން އަށް ކަށަވަރުވެއްޖެ އެވެ.
ގްރޫޕް ބީގައި ކޮންމެ ޓީމެއް ދެ މެޗު ކުޅުނުއިރު، އެއް ވަނައިގައި އޮތް އާރްއާރްސީ އާއި ދެ ވަނައިގައި އޮތް މޯލްޑިވިއަން އަށް ވަނީ ހަ ޕޮއިންޓް ލިބިފަ އެވެ. ތިން ވަނައިގައި އޮތް ސިޓީ ކައުންސިލާއި ހަތަރެއްގައި އޮތް މީޑިއާނެޓް ދެ މެޗުން ވެސް ބަލިވެ، ޕޮއިންޓެއް އަދި ލިބިފައިނުވާއިރު، ދެން މި ދެ ޓީމަށް ވެސް ހަ ޕޮއިންޓް ހަމަކުރެވޭނެ ގޮތެއް ނެތި ކެޓީ އެވެ.
ރެހެންދި ދެ ވަނަ ފުޓްސަލް ދަނޑުގައި މިރޭ ކުޅުނު މެޗުގެ ހަތް ވަނަ މިނިޓްގައި، މޯލްޑިވިއަން އަށް ލީޑުނަގައިިދިނީ އިބްރާހިމް ނަދާދު (ކުޑައްޓޭ) ނެގި ހުރަހަކުން ހުސެއިން އަފްސަލް (އޮޒިލް) ޖެހި ގޯލުންނެވެ. އެއްލުމެއްގައި ނަދާދު ރަނގަޅު ވަގުތު ކުޅުނު ބޯޅަ އަފްސަލް ވަނީ ވެއްޓިގެންފައި ގޯލަށް ބޯޅަ ވައްދާލައިފަ އެވެ.
މެޗުގެ 15 ވަނަ މިނިޓްގައި މޯލްޑިވިއަންގެ ދެ ވަނަ ގޯލު ޖެހީ ހަމްޒާ މުހައްމަދު (ހަމްޕު) އެވެ. މެދެއްހާ ހިސާބުން ހަމްޕު ޖެހި ބޯޅަ ގޯލަށް ވަނީ ސިޓީ ކައުންސިލްގެ ހަމްދޫން އަބްދުލް ލަތީފް ފައިގައި ޖެހިފަ އެވެ.
ގޯލެއް ޖެހޭތޯ ސިޓީ ކައުންސިލުން މި މެޗުގައި ފޮނުވާލި ގިނަ ހަމަލާތައް ހުއްޓުވުމުގައި މޯލްޑިވިއަންގެ ކީޕަރު މުހައްމަދު ސިޔާޒު އިސް ދައުރެއް އަދާކުރި އެވެ.
ސިޓީ ކައުންސިލަށް ކުރިއަށް ދެވެން އޮތީ މި މެޗުގައި ބަލިނުވެ ފަރުޖައްސާލައިގެން ކަމަށްވާތީ ފަހު ވަގުތާ ހަމައަށް އެ ޓީމުން ރަނގަޅަށް މަސައްކަތް ކުރި އެވެ. އެ ގޮތުން އެއް ގޯލު ވެސް ޖެހި އެވެ. މިއީ އޭރިއާ ރޮނގުކައިރިން ސިޓީ ކައުންސިލްގެ މުހައްމަދު ނާއިމް ޖެހި ގޯލެކެވެ. ނާއިމް ފޮނުވާލި ބޯޅަ އަމާޒުވީ ގޯލުގެ މަތީ ދާގަނޑަށެވެ.
މިފްކޯގެ ރައުހާން (ވ) އަތުން ބޯޅަ ހޯދަން އެމްޓީސީސީގެ ލިރުއާމް މަސައްކަތް ކުރަނީ.-- ފޮޓޯ: އަބްދުﷲ ޔަޝައު/ އަދަދު
އެމްޓީސީސީ އަށް ފުރަތަމަ މޮޅާ އެކު އުންމީދެއް
ގްރޫޕް އޭގައި މިރޭ ފޯރިގަދަ މެޗަކަށް ފަހު މިފްކޯ އަތުން އެމްޓީސީސީ މޮޅުވީ 3-2 އިންނެވެ. އެމްޓީސީސީ އަށް މި މެޗުގެ ހަތަރު ވަނަ މިނިޓްގައި ލީޑުނަގައިިދިނީ ސްރީ ލަންކާގެ މުހައްމަދު ފަސަލް އެވެ. އެމްޓީސީސީގެ ހަމަލާއެއް ހުއްޓުވަން މިފްކޯ އިން ބްލޮކްކުރަން މަސައްކަތް ކުރި ބޯޅަ ގޯލު ކުރިމަތިން ހޯދައި ފަސަލް ވަނީ ގޯލަށް ބޯޅަ ފޮނުވާލައިފަ އެވެ. މެޗުގެ 15 ވަނަ މިނިޓްގައި ގޯލު ކުރިމަތިން ހުސްކޮށް ލިބުނު ބޯޅައެއް ގޯލަށް ފޮނުވާލައި އަހުމަދު ރިފްޝާން ވަނީ މިފްކޯ އަށް އެއްވަރުކޮށްދީފަ އެވެ.
މެޗުގެ 23 ވަނަ މިނިޓްގައި އަލީ ލިރުއާމް ވަނީ އެމްޓީސީސީ އަށް އަލުން ލީޑުނަގައިދީފަ އެވެ. މިއީ ފަަސަލް ނެގި ކޯނަރަކުން ލިރުއާމް ބޮލުން ޖެހި ގޯލެކެވެ. މެޗުގެ 31 ވަނަ މިނިޓްގައި މިފްކޯގެ ސަފްވާން އަދުނާން ވަނީ ހިލޭ ޖެހުމަކުން ގޯލެއް ޖަހައި އަލުން މިފްކޯ އަށް އެއްވަރުކޮށްދީފަ އެވެ.
އެމްޓީސީސީ މޮޅުވި ގޯލު މެޗުގެ ފަހު މިނިޓްގައި ޖެހީ އަލީ ނާފިއު (ކަޅޭ) އެވެ. މިއީ ފަަސަލް ދިން ބޯޅައަކުން ކީޕަރު ކައިރިން ނައްޓާފައި ކަޅޭ ޖެހި ގޯލެކެވެ. މިއީ ފުރަތަމަ މެޗުން ކްލަބް ވެމްކޯ އަތުން ބަލިވި، އެމްޓީސީސީ އަށް އާ ފެށުމަކުން މުބާރާތް ފަށަން ބަލާއިރު މުހިންމު މޮޅެކެވެ.
ގްރޫޕް އޭގެ އެއް ވަނައިގައި ދެ މެޗުން މޮޅުވެގެން ހަ ޕޮއިންޓާ އެކު ވެމްކޯ އޮތްއިރު، ދެ ވަނައިގައި އޮތް ފެން ކްލަބާއި ތިން ވަނައިގައި އޮތް އެމްޓީސީސީ އަށް ވަނީ ދެ މެޗު ކުޅެގެން ތިން ޕޮއިންޓް ލިބިފަ އެވެ. ފުލުގައި އޮތް މިފްކޯ ދެ މެޗުން ވެސް ބަލިވެ ވަނީ މުބާރާތުން ކަޓައިފަ އެވެ.
