ފީފާ އިން މި މަހު އާންމުކުރި ރޭންކިންގައި ރާއްޖޭގެ ފިރިހެން ގައުމީ ފުޓްބޯޅަ ޓީމަށް ދެ ދަރަޖައިގެ ކުރިއެރުމެއް ލިބިއްޖެ އެވެ.
މި އަހަރު ފެށިއިރު، ދުނިޔޭގެ 157 ވަނައިގައި އޮތް ރާއްޖެ، މާޗް މަހުން ފެށިގެން މިދިޔަ ސެޕްޓެމްބަރު މަހުގެ ނިޔަލަށް އޮތީ ދުނިޔޭގެ 156 ވަނައިގަ އެވެ. އެކަމަކު، މިދިޔަ މަހު ކުުޅުނު ބައިނަލްއަގުވާމީ އެކުވެރިކަމުގެ ދެ މެޗުން ބްރުނާއީ ދާރުއްސަލާމް އާއި ލާއޯސް އަތުން މޮޅުވެފައިވާތީ، މި މަހު ނެރުނު ރޭންކިންގައި ރާއްޖެ ވަނީ ދުނިޔޭގެ 154 ވަނަ އަށް ޖެހިލައިފަ އެވެ.
އިޓަލީގެ ކޯޗު ފްރެންޗެސްކޯ މޮރިއޭރޯގެ އިރުޝާދުގެ ދަށުން ކުޅޭ ގައުމީ ފުޓްބޯޅަ ޓީމު، ބްރުނާއީ ދާރުއްސަލާމް އަތުން މޮޅުވީ 3-0 އިންނެވެ. އަދި ލާއޯސް ބަލިކުރީ 3-1 އިންނެވެ.
މިއީ 2019 ވަނަ އަހަރުގެ އޭޕްރީލް މަހުގެ ފަހުން ރާއްޖޭގެ އެންމެ ރަނގަޅު ރޭންކިން އެވެ.
ފީފާ ރޭންކިންގައި ރާއްޖެ އެންމެ ދަށްކޮށް ރޭންކްކުރެވުނީ 1997 ވަނަ އަހަރުގެ އޮގަސްޓް/ސެޕްޓެމްބަރުގަ އެވެ. އެ ފަހަރު ދުނިޔޭގެ 183 ވަނަ އަށް ވެއްޓުނެވެ. ރާއްޖެ، ރޭންކިންގައި އެންމެ ރަނގަޅު ދަރަޖައެއްގައި އޮތީ 2006 ވަނަ އަހަރުގެ ޖުލައި/އޮގަސްޓްގަ އެވެ. އެއީ ދުނިޔޭގެ 124 ވަނައިގަ އެވެ.
އަންނަ މަހު ގައުމީ ޓީމުގެ އިތުރު މެޗުތަކެއް؟
ގައުމީ ފުޓްބޯޅަ ޓީމުން ވަނީ މި އަހަރު ފީފާ ތާރީހުތަކުގައި ޖުމްލަ ތިން މެޗެއް ކުޅެފަ އެވެ. މިދިޔަ މަހުގައި ބްރުނާއީ އާއި ލާއޯސްއާ ކުޅުމުގެ ކުރިން މިިދިޔަ މާޗް މަހު މާލޭގައި އެކުވެރިކަމުގެ މެޗެއްގައި ބަންގްލަދޭޝް އަތުން ވަނީ 2-0 އިން މޮޅުވެފަ އެެވެ.
ރާއްޖޭން އަންނަނީ އަންނަ މަހު ވެސް އެކުވެރިކަމުގެ މެޗުތަކެއް ކުޅެން މަސައްކަތް ކުރަމުންނެވެ. އެ ގޮތުން އަންނަ މަހު ޕާކިސްތާނުގައި ކުޅޭ މެޗުތަކަކަށް ރާއްޖެ ގެންނަން މަސައްކަތް ކުރަމުން އަންނަ ކަމަށް އެ ގައުމުގެ މީޑިއާތަކުން ވަނީ ރިޕޯޓްކޮށްފަ އެވެ.
"ދި ނިއުސް" އިން ރިޕޯޓްކުރާގޮތުގައި ޕާކިސްތާނުން ބައިނަލްއަގުވާމީ ފުޓްބޯޅަ އަށް ތިން އަހަރު ފަހުން އެނބުރި އައުން ފާހަގަކުރަން ކުޅޭ މެޗުތަކުގެ ތެރޭގައި ރާއްޖެއާ ދެކޮޅަށް ކުޅޭ މެޗެއް ވެސް ހިމެނެ އެވެ.
އެކަމަކު، މެޗުތައް ކުޅެން އޮތް އެންމެ ބޮޑު ހުރަހަކީ އިސްލާމްއާބާދުގެ ޖިނާ ސްޓޭޑިއަމްގެ މަސައްކަތްތައް ކުރިއަށްދާތީ އެ ދަނޑު ބޭނުން ނުކުރެވުން ކަމަށެވެ. އެކަމަކު، ޕަންޖާބް ސްޓޭޑިއަމްގައި މެޗުތައް ކުޅެން އެދިފައިވާތީ، އެ ދަނޑު ދޭން ޕަންޖާބް ސްޕޯޓްސް ބޯޑުން ނިންމައިފިނަމަ އަންނަ މަހު މެޗުތައް ކުޅޭނެ ކަމަށް ޕާކިސްތާން ފުޓްބޯޅަ ފެޑެރޭޝަންގެ އޮފިޝަލަކު ވަނީ މައުލޫމާތު ދީފަ އެވެ.
