އިންޑިއާގައި ކުރިއަށްދިޔަ ދެކުނު އޭޝިއާ ބެޑްމިންޓަން މުބާރާތުގައި ރާއްޖޭގެ ގައުމީ ޖޫނިއާ ޓީމުން ވަނީ ޓީމު އިވެންޓް ބައިން ދެ ލޯ މެޑަލާއި 15 އަހަރުން ދަށުގެ އަންހެން ޑަބަލްސް އާއި ފިރިހެން ޑަބަލްސް އިވެންޓުން ލޯ މެޑަލް ހޯދައިފި އެވެ.
އިންޑިއާގެ ގުވަހާޓީގައި ކުރިއަށްދިޔަ ސަރަހަައްދުގެ ޖޫނިއާ މުބާރާތުގެ ޓީމު އިވެންޓް ބައިގެ އަންހެން އަދި ފިރިހެން ކެޓަގަރީން ރާއްޖެ ލޯ މެޑަލް ހޯދީ އިންޑިއާ، ސްރީ ލަންކާ، ނޭޕާލް އަދި ބޫޓާނާ ވާދަކޮށެވެ.
ސަތާރަ އަހަރުން ދަށާއި 15 އަހަރުން ދަށަށް ހާއްސަ ޓީމު އިވެންޓްގައި ރާއްޖޭން ވާދަކުރިއިރު، 15 އަހަރުން ދަށުގެ އަންހެން ބައިގައި ޗެމްޕިއަންކަން ހޯދި ރާއްޖޭގެ ޓީމުގައި ހިމެނެނީ ކަލާފާނު ސްކޫލްގެ ސަމްރާ އަހުމަދު ހައިކަލް، އިސްކަންދަރު ސްކޫލްގެ އައިޝަތު ޒޯޔާ ހުސެއިން އާއި ޔޫސުފް މުނާދީ އަދި ރެހެންދި ސްކޫލްގެ އައްޔޫބު އަޒްހަރު މުހައްމަދު އެވެ.
ސަތާރަ އަހަރުން ދަށުން ލޯ މެޑަލް ހޯދި ޓީމުގައި ހިމެނެނީ ސީއެޗްއެސްސީގެ މުހައްމަދު އުދައިޝް އަހުމަދު ޝަރީފް އާއި ޝުބާ މުހައްމަދު ޝަރީފް، ކަލާފާނު ސްކޫލްގެ ޝައިބާ މުހައްމަދު ޝަރީފް އަދި އިސްމާއިލް ނާބިތު އިބްރާހިމް އެވެ.
އޯޕަން އިވެންޓްތަކަށް ބަލާއިރު، 15 އަހަރުން ދަށުގެ އަންހެން ބައިން ރާއްޖޭގެ ސަމްރާ އާއި ޒޯޔާގެ ޕެއާ ވަނީ ލޯ މެޑަލް ހޯދައިފަ އެވެ. އަދި 15 އަހަރުގެ ފިރިހެން ކެޓަގަރީން ރާއްޖޭގެ ޔޫސުފް މުނާދީ އާއި އައްޔޫބު އަޒްހަރުގެ ޕެއާ ވަނީ ލޯ މެޑަލް ހޯދައިފަ އެވެ.
ސަރަހައްދުގެ ޖޫނިއާ މުބާރާތުގައި ރާއްޖޭގެ ޓީމަށް އިރުޝާދުދިނީ ބެޑްމިންޓަން ޔޫތު ޑިވެލޮޕްމަންޓްގައި މަސައްކަތް ކުރަމުން އަންނަ ކޯޗު އަހުމަދު އިޔާދު އެވެ. އަދި ޓީމުގެ މެނޭޖަރަަކީ އެސޯސިއޭޝަންގެ ހިންގާ ކޮމިޓީގައި ވެސް މަސައްކަތް ކުރަމުން އަންނަ މެމްބަރު، ހުސެއިން އާތިފް އެވެ.
