ބާމިންހަމް (އޮކްޓޫބަރު 3) - ދަށް ނަތީޖާތަކުގެ ސަބަބުން, ވުލްވްސްގެ ކޯޗު ޕޯޗުގަލްގެ ބްރޫނޯ ލާޖް އެ މަގާމުން ވަކިކޮށްފި އެވެ.
މި ސީޒަނުގައި ލާޖްގެ ކޯޗުކަމުގައި ވުލްވްސް އިން ލީގުގައި މިހާތަނަށް ކުޅުނު ހަ މެޗުގެ ތެރެއިން އެންމެ މޮޅެއް ލިބުނުއިރު، އެންމެ ފަހުން ކުޅުނު ދެ މެޗުން ވެސް ވަނީ ބަލިވެފަ އެވެ. އެންމެ ފަހުން ބަލިވެފައިވަނީ، ހޮނިހިރު ދުވަހުގެރޭ ވެސްޓް ހޭމް ދަނޑުގައި އެ ޓީމު އަތުން 2-0 އިންނެވެ.
ވުލްވްސްގެ ކޯޗަކަށް ހުރި ނޫނޯ އެސްޕިރީޓޯ ސަންޓޯ އެ ޓީމު ދޫކޮށް މިދިޔަ ސީޒަނުގައި ޓޮޓެންހަމަށް ބަދަލުވުމުން، ވުލްވްސް އިން ޓީމަށް ގެނައީ ލާޖް އެވެ. ލާޖްގެ ކޯޗުކަމުގައި ވުލްވްސް މިދިޔަ ފަހަރު ނިންމާލީ ލީގުގެ 10 ވަނައިގަ އެވެ. އެކަމަކު، އެންމެ ފަހުން ލީގުގައި ކުޅުނު 15 މެޗުގެ ތެރެއިން ވުލްވްސް އެއް މޮޅު ހޯދިއިރު، ނުވަ މެޗުން ބަލިވުމުން، އެ ކްލަބްގެ މެނޭޖްމަންޓުން ނިންމީ ލާޖް ވަކިކުރާށެވެ.
ކުރިން ބެންފީކާ އަށް ކޯޗުކޮށްދިން ލާޖްގެ އިރުޝާދުގެ ދަށުން ވުލްވްސް އިން ޖުމްލަ އެކު ވަނީ 51 މެޗު ކުޅެފަ އެވެ. އެ މެޗުތަކުން އެ ޓީމަށް މޮޅުވެވުނީ 19 މެޗުންނެވެ.
ވުލްވްސްގެ މެނޭޖްމަންޓުން ލާޖް ވަކިކުރަން ނިންމި އަނެއް ސަބަބަކީ މި ސީޒަން ފެށިއިރު، ޓްރާންސްފާ މާކެޓްގައި އާ ކުޅުންތެރިން ގަންނަން 135 މިލިއަން ޑޮލަރު ހަރަދުކުރި ނަމަވެސް މެޗުތަކުގައި އޭގެ ނަތީޖާ ނުފެންނާތީ އެވެ.
މި ފަހަރުގެ ޕްރިމިއާ ލީގުގައި މިހާތަނަށް މަދު މެޗެއް ކުޅެވިފައިވީ ނަމަވެސް ތިން ކޯޗެއްގެ ވަޒީފާ މި ވަނީ ގެއްލިފަ އެވެ. އެއީ ބޯންމައުތު ކޯޗަކަށް ހުރި ސްކޮޓް ޕާކާ އާއި ޗެލްސީގައި ހުރި ތޯމަސް ޓުޗެލްގެ އިތުުރުން ލާޖް އެވެ.
ވުލްވްސް އިން ދެން ކޯޗަކަށް ހަމަޖައްސަން މަސައްކަތް ކުރަމުން އަންނަނީ ކުރިން އޮލިމްޕިއާކޯސް އިން ފެނުނު ޕެޑްރޯ މާޓިންސް، ސްޕޯޓިން ލިޒްބަންގައި ހުރި ރުބެން އަމޮރިމް އަދި ޕޯޓޯއާ ހަވާލުވެ ހުރި ސާޖިއޯ ކޮންސެސާއޯ ތެރެއިން ކޯޗެކެވެ.
