ލަންޑަން (ސެޕްޓެމްބަރު 26) - އިންގްލެންޑްގެ ގައުމީ ޓީމު އެންމެ ފަހުން ކުޅުނު ފަސް މެޗުގައި މޮޅެއް ނުލިބުނު ނަމަވެސް، ވޯލްޑް ކަޕްގައި އިންގްލެންޑްގެ ޓީމަށް އިރުޝާދު ދިނުމަށް އެންމެ އެކަށީގެންވާ ކޯޗަކީ އޭނާ ކަމަށް އިންގްލެންޑްގެ ކޯޗުކަމުގައި ހުރި ގެރެތު ސައުތުގޭޓް ބުނެފި އެވެ.
ސައުތުގޭޓްގެ ކޯޗުކަމުގެ ދަށުން އިންގްލެންޑް ވަނީ 2018 ވަނަ އަހަރުގެ ވޯލްޑް ކަޕްގެ ސެމީ ފައިނަލްގައި ކުޅެފަ އެވެ. އަދި ޔޫރޯ 2020 ގެ ފައިނަލްގައި އެ ޓީމު ވަނީ ވާދަކޮށް ޕެނަލްޓީ ޖަހައިގެންވަނީ ބަލިވެފަ އެވެ.
އެކަމަކު، މި އަހަރުގެ ވޯލްޑް ކަޕަށް އެ ޓީމު ތައްޔާރުވަމުންދާއިރު، މި ފަހަކަށް އައިސް ނެރިފައިވާ ނަތީޖާތަކާ މެދު ސަޕޯޓަރުން ވަނީ ހިތްހަމަނުޖެހިފަ އެވެ. އިންގްލެންޑް އެންމެ ފަހުން ކުޅުނު މެޗުގައި އިޓަލީ އަތުން 1-0 އިން ބަލިވިއިރު، އެ ނަތީޖާއާ އެކު އިންގްލެންޑް ވަނީ ނޭޝަންސް ލީގުގެ ދެ ވަނަ ޑިވިޝަނަށް ރެލިގޭޓްވެފަ އެވެ. މި ހުރިހާ ކަމަކާ ހެދި އިނގިރޭސި ސަޕޯޓަރުންގެ ނުރުހުން ސައުތުގޭޓަށް އަމާޒުވެފައިވާއިރު، މީޑިއާގެ ޕްރެޝަރު ވެސް ބޮޑެވެ.
އެންމެ ފަހުން ކުޅުނު ފަސް މެޗުން ވެސް އިންގްލެންޑް މޮޅެއް ނުވެ އެވެ.
އެކަމަކު މީޑިއާއާ ވާހަކަދައްކަމުން ސައުތުގޭޓް ބުނީ އޭނާ ގަބޫލްކުރަނީ ވޯލްޑް ކަޕްގައި އިންގްލެންޑަށް އިރުޝާދު ދިނުމަށް އެންމެ އެކަށީގެންވާ ކޯޗަކީ އޭނާ ކަމަށެވެ.
"އެންމެ ރަނގަޅު ގޮތަކީ (އަހަރެން) ޓީމުގައި ހުރުން (ވޯލްޑް ކަޕްގައި). އިޓަލީ މެޗުގައި އަހަރަމެންގެ ކުޅުން ގޯހެއް ނޫން. މެޗުތަކަކުން ބަލިވެފައި އޮތީމަ ގޯސްކަމަށް ގަބޫލްކުރެވެނީ،" ސައުތުގޭޓް ބުންޏެވެ.
ގަތަރުގައި އޮންނަ ވޯލްޑް ކަޕްގައި އިންގްލެންޑް ކުޅޭ ފުރަތަމަ މެޗު އޮންނާނީ ނޮވެމްބަރު މަހުގެ 21 ވަނަ ދުވަހު އެވެ. އެ މެޗުގެ ކުރިން އިންގްލެންޑް ވޯލްޑް ކަޕަށް ތައްޔާރުވުމަށް ކުޅޭ ފަހު މެޗަކީ މިރޭ ޖަރުމަނާ ދެކޮޅަށް ކުޅޭ މެޗެވެ.
އެހެން އަހަރުތަކާ ހިލާފަށް މި އަހަރުގެ ވޯލްޑް ކަޕް އަހަރުގެ ފަހުކޮޅުގައި ކުޅޭތީ، ޕްރިމިއާ ލީގުގެ މެޗުތަކަށް ފަހު ވޯލްޑް ކަޕަށް ޓީމު ތައްޔާރުކުރަން ސައުތުގޭޓަށް ލިބޭނީ އަށް ދުވަހެވެ. އެހެންކަމުން، މި މުއްދަތުގައި ތައްޔާރުވާން އިތުރު މެޗެއް ކުޅެވޭކަށް ނެތެވެ.
ސައުތުގޭޓް ބުނީ ވޯލްޑް ކަޕްގެ ކުރިން އިތުރު ފްރެންޑްލީއެއް ނުކުޅެވުނަސް، މި ފަހަކަށް އައިސް ކުޅެފައިވަނީ ވަރަށް ވަރުގަދަ ޓީމުތަކާ ދެކޮޅަށް ކަމަށެވެ. އަދި އޭގެ ސަބަބުން ޓީމަށް ފައިދާކުރާނެ ކަމަށެވެ.
