ރާއްޖޭގެ ހުނަރުވެރި ޒުވާން ބޮޑީބޯޑަރު، އާމިން އުމަރު މޫސާ، އެންމެ ފަހުން ނެރުނު ދުނިޔޭގެ ޖޫނިއާ ރޭންކިންގެ ތިން ވަނަ އަށް ޖެހިލައިފި އެވެ.
މިއީ ރާއްޖޭގެ ބޮޑީބޯޑަރަކު ދުނިޔޭގެ ރޭންކިންގައި މިހާ ކުރިއަށް ޖެހިލި ފުރަތަމަ ފަަހަރެވެ. މިއީ ރާއްޖޭގެ ކުޅިވަރު ތާރީހުގައި ވެސް ހާއްސަ ކާމިޔާބެކެވެ.
ކްލަބް ވެލެންސިއާގެ ފުޓްބޯޅަ ޓީމަށް ވެސް ކުޅޭ އާމިން އަށް ބޮޑީބޯޑިންގެ ޖޫނިއާ ވޯލްޑް ރޭންކިންގައި މި ވަރުގެ ބޮޑު ކުރިއެރުމެއް ލިބިފައިމިވަނީ މިދިޔަ މަހު މާލޭގައި ކުރިއަށްދިޔަ އައިބީސީ ވޯލްޑް ޓުއާގެ މޯލްޑިވްސް ޕްރޯ 2022ގެ ޖޫނިއާ ފައިނަލުގައި ވާދަކޮށްފައިވާތީ އެވެ.
މޯލްޑިވްސް ޕްރޯގެ އެ ކާމިޔާބީއާ އެކު އާމިން ވެފައިވަނީ ދުނިޔޭގެ ބޮޑީބޯޑިންގެ އެންމެ މަތީ ފަންތީގެ މުބާރާތެއްގެ ފައިނަލެއްގައި ވާދަކުރި ރާއްޖޭގެ ފުރަތަމަ އަދި ހަމައެކަނި އެތުލީޓަށެވެ. އެއީ، ދުނިޔޭގެ ބޮޑީބޯޑިންގެ އެންމެ މަތީ ފަންތީގައި ދިވެހި ޒުވާން އެތުލީޓުންނަށް ވާދަކުރެވޭނެ ކަން ހާމަކޮށްދީ އުއްމީދު ހޯދައިދިން އެތުލީޓެވެ.
އިއްޔެ އާންމުކުރި ރޭންކިންގައި ޖޫނިއާ ލެވެލްގައި ދުނިޔޭގެ އެއް ވަނައިގައި 2000 ޕޮއިންޓާ އެކު ފަސް ބޮޑީބޯޑަރަކު އޮތެވެ. އެއީ ޕޯޗުގަލްގެ ޖޮއެލް ރޮޑްރިގޭސް، ސްޕެއިންގެ ގަބްރިއެލް މޮލީނާ އާއި ޖޯޖް ހެނާންޑޭޒް، ޕެރޫގެ މައިކޯލް ޔަންސޭ އަދި ބްރެޒިލްގެ ޕައޮލޯ ގަލާޓީ އެވެ. މޮލީނާ އަކީ މޯލްޑިވްސް ޕްރޯގައި އާމިންއާ ފައިނަލުގައި ވާދަކުރި ބޮޑީބޯޑަރެވެ.
ރޭންކިންގައި ދެން އޮތީ ތިން ވަނަ އަށް ރޭންކް ކޮށްފައިވާ ފަސް ބޮޑީބޯޑަރުންނެވެ. އާމިން ހިމެނޭ ގޮތަށް އެ ބޮޑީބޯޑަރުން ސްކޯކޮށްފައިވަނީ 1720 ޕޮއިންޓެވެ. ދެން ހިމެނޭ ބޮޑީބޯޑަރުންނަކީ ޕެރޫގެ ނިކޮލަސް އެސްޕިނޯޒާ އާއި ފަބިއޯ ސާވެދްރާ، ބްރެޒިލްގެ ގިލެރްމޭ މޮންޓަނެގްރޯ އަދި ހޯސޭ އޮގަސްޓޯ އެވެ.
ޖޫނިއާ ރޭންކިން މި އަހަރަށް ފައިނަލް ވާނީ އަންނަ މަހު ބާއްވާ އައިބީސީ އިވެންޓަށް ފަހު އެވެ. އެއީ އޮކްޓޫބަރު 15-30 އަށް ކެނަރީ އައިލެންޑްގެ ފްރޮންޓޮން ކިންގްގަ އެވެ.
ފްރޮންޓޮން ކިންގައި މި އަަހަރުގެ ދުނިޔޭގެ ޖޫނިޔާ ވޯލްޑް ޗެމްޕިއަން ކަނޑައަޅާނެ އެވެ. އެ މުބާރާތުގެ ޖޫނިއާ ބައިގައި ވާދަކޮށް ރަނގަޅު ކާމިޔާބެއް ހޯދައިފިނަމަ އާމިން އަށް ދުނިޔޭގެ ރޭންކިންގައި ކުރިއަށް ދިއުމުގެ ފުރުސަތު އެބައޮތެވެ.
އާމިން އަށް ފްރޮންޓޮން ކިންގް މުބާރާތުގައި ވާދަކުރެވޭތޯ މޯލްޑިވްސް ބޮޑީބޯޑިން އެސޯސިއޭޝަނުން އަންނަނީ މަސައްކަތް ކުރަމުންނެވެ.
