ޓިއުރިން (ސެޕްޓެމްބަރު 21) - ޔުވެންޓަސްގެ ސީނިއާ މެނޭޖްމަންޓުގެ ގިނަ ބަޔަކު އެ ޓީމުގެ ކޯޗަކަށް ހުރި މެސިމޯ އަލެގްރީ ވަކިކުރަން ބޭނުންވި ނަމަވެސް އެކަން އެ ގޮތަށް ކުރެވެން ނެތީ ޔުވެންޓަސްގެ ރައީސް އަންދްރެއާ އަގްނެލީގެ ތާއީދު ނެތުމުން ކަމަށް އިޓަލީގެ މީޑިއާތަކުން ރިޕޯޓްކޮށްފި އެވެ.
މި ފަހަރުގެ އިޓާލިއަން ލީގުގައި މިހާތަނަށް ހަތް މެޗު ކުޅުނުއިރު، ޔުވެންޓަސް މޮޅުވީ ދެ މެޗުންނެވެ. ހަތަރު މެޗުން އެއްވަރުވިއިރު، އެ ޓީމު ވަނީ އެއް މެޗުން ބަލިވެފަ އެވެ. ޔުވެންޓަސް މި ވަގުތު އޮތީ ލީގުގެ ކުރީގައި އޮތް ނަޕޯލީ އަށް ވުރެން 10 ޕޮއިންޓް ފަހަތުގައި، ލީގުގެ އަށް ވަނައިގަ އެވެ.
ޗެމްޕިއަންސް ލީގުގައި ވެސް މި ފަހަރު ޔުވެންޓަސްގެ ރެކޯޑް ދަށެވެ. ޔުވެންޓަސް ވަނީ މި ފަހަރުގެ ޗެމްޕިއަންސް ލީގުގައި މިހާތަނަށް ކުޅުނު ދެ މެޗުން ވެސް ބަލިވެފަ އެވެ. ފުރަތަމަ މެޗުގައި ރަށުންބޭރުގައި ޕީއެސްޖީ އަތުން ބަލިވިއިރު، ދެ ވަނަ މެޗުން ވަނީ އަމިއްލަ ދަނޑުގައި ބެންފީކާ އަތުން ބަލިވެފަ އެވެ.
މި ހުރިހާ ނަތީޖާއާ އެކު ޔުވެންޓަސްގެ ސަޕޯޓަރުންނާއި ކްލަބްގެ ސީނިއާ މެނޭޖްމަންޓުގެ މެމްބަރުން ވެސް އެދެނީ އަލެގްރީ މަގާމުން ވަކިކޮށް "ސީޒަން ސަލާމަތް" ކުރުމަށެވެ.
އިޓަލީގެ މީޑިއާ ރިޕޯޓްތައް ބުނާގޮތުން ޔުވެންޓަސްގެ ވައިސް ޕްރެޒިޑެންޓް، ކުރީގެ މަޝްހޫރު މިޑްފީލްޑަރު، ޕަވެލް ނެޑްވެޑް ވެސް ވަނީ އަލެގްރީ ވަކިކުރަން މިއީ އެންމެ ރަނގަޅު ވަގުތު ކަމަށް ބުނެ، އެ ކްލަބްގެ ބޯޑަށް ހުށަހަޅައިފަ އެވެ.
އެކަމަކު، އެ ގޮތަށް ކުރިއަށް ނުދާން ނިންމީ އަގްނެލީގެ އެންގުމާ އެކު، ގިނަ މެމްބަރުންތަކެއް އެ ހުށަހެޅުމަށް ތާއީދު ނުކުރަން ނިންމުމުންނެވެ.
ޑެޒްން އަށް ދިން އިންޓަވިއުއެއްގައި ދާދި ފަހުން ޔުވެންޓަސްގެ ސީއީއޯ މައުރީޒިއޯ އަރިވަބެނޭ ވިދާޅުވީ އަލެގްރީ އަށް އަދި މާ ބޮޑު ޕްރެޝަރެއް ދޭން ބޭނުންނުވާ ކަމަށެވެ. އެއީ ކްލަބްގެ މިހާރު އޮނިގަނޑަކާ އެކު ބޭނުންވަނީ ރަނގަޅު ޓީމެއް ބިނާ ކުރުމަށް ކަމަށާއި އާ ކުޅުންތެރިން ބޮޑު އަގުގައި ގަނެގެން އުޅޭއިރު، ޓީމެއް އެކުލަވާލަން ވަގުތު ބޭނުންވާނެ ކަމަށް އަރިވަބެނޭ ވިދާޅުވި އެވެ.
މިދިޔަ އަހަރު އަންދްރެއާ ޕިރްލޯ، ޔުވެންޓަސްގެ ކޯޗުކަމުން ވަކިކޮށް އަލެގްރީއާ އެ ޓީމު ހަވާލުކުރީ ހަތަރު އަހަރުގެ ކޮންޓްރެކްޓެއްގަ އެވެ. އެއީ ޔުވެންޓަަސް އިން ބޭނުންވެއްޖެނަމަ އިތުރު އެއް އަހަރަށް އާ ކުރެވޭ ގޮތަށް އޮތް އެއްބަސްވުމެކެވެ. އެކަމަކު، އަލުން އަލެގްރީ ހަވާލުވި ފަހުން ޔުވެންޓަސް އަށް އަދި އެއް ފެންވަރެއްގައި ގިނަ މެޗުތަކެއްގައި ރަނގަޅު ކުޅުމެއް ދެއްކޭގޮތް ވަނީ ނުވެފަ އެވެ.
މީގެ ކުރިން އަލެގްރީ ވަނީ 2014 އިން 2019 އަށް ޔުވެންޓަސް އަށް ކޯޗުކޮށްދީފަ އެވެ. އަލެގްރީ، އެ ފަހަރު ވަނީ ޔުވެންޓަސް ފަސް ފަހަރު އިޓާލިއަން ލީގު ކާމިޔާބުކޮށްދީ އިޓާލިއަން ކަޕް ތިން ފަހަރު ކާމިޔާބުކޮށްދީފަ އެވެ. ދެ ފަހަރު ޗެމްޕިއަންސް ލީގުގެ ފައިނަލަށް ދަތުރުކުރި އެވެ.
