ލަންޑަން (ސެޕްޓެމްބަރު 21) - މި މަހު ކުޅޭ ޔުއެފާ ނޭޝަންސް ލީގުގެ މެޗުތަކަށް އެންމެ ފުރަތަމަ ނެގި އިންގްލެންޑް ޓީމުގެ ސްކޮޑުގައި ހިމެނި މެންޗެސްޓާ ސިޓީގެ މިޑްފީލްޑަރު ކަލްވިން ފިލިޕްސް އަށް އަނިޔާވުމުން އޭނާގެ ބަދަލުގައި ލިވަޕޫލްގެ ކެޕްޓަން ޖޯޑަން ހެންޑަސަން ޓީމަށް ނަގައިފި އެވެ.
އިނގިރޭސި ކޯޗު ގަރެތު ސައުތުގޭޓް، މީގެ ހަ ދުވަސް ކުރިން އިއުލާނުކުރި ސްކޮޑުގައި ހެންޑަސަން ނުހިމެނުނީ އޭނާ ފަލަމަސްގަނޑަށް ލިބިފައިވާ އަނިޔާއަކުން ރަނގަޅުވާން ފަރުވާ ހޯދަމުން އަންނާތީ އެވެ.
އެކަމަކު، ސްކޮޑުގެ ކުޅުންތެރިންގެ މެޑިކަލް ޓެސްޓްތަކެއް ހެދިއިރު، ފިލިޕްސްގެ ކޮނޑަށް ލިބިފައިވާ އަނިޔާއެއް ފާހަގަކުރެވިގެން އޭނާ އުނިކުރަން ކޯޗިން ޓީމުން ނިންމިއިރު، ހެންޑަސަން ފިޓްވެފައިވާތީ އޭނާ ނެގީ އެވެ.
ހެންޑަސަން، 32، އަށް އަނިޔާވީ މިދިޔަ މަހުގެ 31 ވަނަ ދުވަހު، ލިވަޕޫލުން އިނގިރޭސި ޕްރިމިއާ ލީގުގައި އަމިއްލަ ދަނޑުގައި ފަހު ވަގުތު ނިއުކާސަލް ޔުނައިޓެޑް އަތުން މޮޅުވި މެޗުގަ އެވެ. އެ އަނިޔާގެ ސަބަބުން ހެންޑަސަން އަށް ވަނީ ލިވަޕޫލް އެންމެ ފަހުން ކުޅުނު ތިން މެޗު ގެއްލިފަ އެވެ.
އިންގްލެންޑަށް 69 މެޗު ކުޅެދީފައިވާ ހެންޑަސަން މި އަހަރު އެ ޓީމަށް ކުޅުނީ އެންމެ މެޗެކެވެ. އެއީ މިދިޔަ މާޗް މަހު ވެމްބްލީ ސްޓޭޑިއަމްގައި ސްވިޒަލެންޑް އަތުން 2-1 އިން އިންގްލެންޑް މޮޅުވި މެޗުގަ އެވެ.
ޔުއެފާ ނޭޝަންސް ލީގުގައި އިންގްލެންޑުން މާދަމާރޭ މިލާނުގައި ކުޅޭނީ އިޓަލީއާ ދެކޮޅަށެވެ. އޭގެ ފަހުން، އަންނަ ހޯމަ ދުވަހު ވެމްބްލީގައި ޖަރުމަނާ ދެކޮޅަށް ނުކުންނާނެ އެވެ.
