ލަންޑަން (ސެޕްޓެމްބަރު 16) - މި މަހު ކުޅޭ ޔުއެފާ ނޭޝަންްސް ލީގުގެ މެޗުތަކަށް އިންގްލެންޑް ގައުމީ ކޯޗު ގަރެތު ސައުތުގޭޓް ނެގި ސްކޮޑުން ބްރެންޓްފޯޑްގެ ފޯވާޑް އައިވަން ޓޯނީ އަށް ފުރުސަތު ދިންއިރު، ރަނގަޅު ފޯމެއްގައި ހުރި މެންޗެސްޓާ ޔުނައިޓެޑްގެ ވިންގް، ޖޭޑަން ސަންޗޯ ބާކީކޮށްފި އެވެ.
މީގެ ކުރިން އިނގިރޭސި އުމުރުފުރާ ގައުމީ ޓީމަކަށް ވެސް ކުޅެފައިނުވާ ޓޯނީ، 26، އަށް ސީނިއާ ޓީމުން ފުރުސަތު ދޭން ނިންމީ މި ފަހަރުގެ އިނގިރޭސި ޕްރިމިއާ ލީގުގައި އޭނާ ދައްކަމުން އަންނަ ކުޅުމުގެ ސަބަބުންނެވެ. އެ ގޮތުން، ޓޯނީ ވަނީ ލީގުގައި މިހާތަނަށް ބްރެންޓްފޯޑް ކުޅުނު ހަ މެޗުގައި ފަސް ގޯލު ޖަހައިފަ އެވެ.
މި ފަަހަރުގެ ސްކޮޑުން އަނިޔާގެ ސަބަބުން ލިވަޕޫލްގެ ކެޕްޓަން، ޖޯޑަން ހެންޑަސަން އާއި އެވަޓަންގެ ކީޕަރު ޖޯޑަން ޕިކްފޯޑް އަދި މެންޗެސްޓާ ޔުނައިޓެޑްގެ ފޯވާޑް މާކަސް ރަޝްފޯޑް ވަނީ ބާކީކޮށްފަ އެވެ. ރަޝްފޯޑް އެންމެ ފަހުން އިންގްލެންޑް ޓީމަށް ކުޅެފައިވަނީ މިިދިޔަ އަހަރުގެ ޖުލައި މަހުގަ އެވެ.
ޔުނައިޓެޑްގެ މެޗެއްގެ ތެރެއިން ގޯލު ޖެހުމަށް ފަހު ސަންޗޯ އުފާފާޅުކުރަނީ.--- ފޮޓޯ: އޭއެފްޕީ
ފިޓްކޮށް ހުއްޓައި މި ފަހަރު އިނގިރޭސި ޓީމުން ޖާގަ ނުލިބުނީ ސަންޗޯ އަށެވެ. މި ސީޒަނުގައި ރަނގަޅު ފޯމެއްގައި ކުޅެމުން އަންނަ ސަންޗޯ ވަނީ މި ސީޒަނުގައި ޔުނައިޓެޑަށް ތިން ގޯލު ޖަަހައިދީ، އެއް ފެންވަރެއްގައި ރަނގަޅު ކުޅުމެއް ދައްކަމުންނެވެ.
ސަންޗޯ ބުނީ ގައުމީ ޓީމަށް ނުނެގުމަކީ ހިތާމަކުރާ ކަމެއް ކަމަށާއި އެކަމަކު، އަލުން ގައުމީ ޓީމަށް އަރަން ކުރަން ޖެހޭ މަސައްކަތުގައި ދެމިހުންނާނެ ކަމަށެވެ.
ގަތަރުގައި ނޮވެމްބަރާއި ޑިސެމްބަރުގައި ބާއްވާ ފީފާ ވޯލްޑް ކަޕަށް ޓީމުތަކުން ސްކޮޑު ފައިނަލް ކުރާނީ ނޮވެމްބަރު 13 ވަނަ ދުވަހު އެވެ. ކޯޗު ސައުތުގޭޓް ބުނީ އިންގްލެންޑްގެ ކޮންމެ ކުޅުންތެރިއަކަށް ވެސް ފައިނަލް ސްކޮޑަށް އެރުމުގެ ފުރުސަތު އޮންނާނެ ކަމަށާއި ވީހާވެސް ބޮޑަށް ބަލައިގެން ވަރުގަދަ ސްކޮޑެއް ނަގަން ބޭނުންވާ ކަމަށެވެ.
ނޭޝަންސް ލީގުގެ މެޗުތަކަށް ނެގި ސްކޮޑުން ފުރުސަތު ލިބުނު ބައެއް ކުޅުންތެރިންނަކީ މި ސީޒަނުގައި މިހާތަނަށް މަދު މެޗުތަކެއްގައި ފެނުމުގެ އިތުރުން ފޯމު ވެސް ގެއްލިފައި ތިބި ކުޅުންތެރިންނެވެ. އޭގެ ތެރޭގައި މެންޗެސްޓާ ޔުނައިޓެޑްގެ ކެޕްޓަން، ހެރީ މެގުއާ އާއި ވާތު ބެކް، ލޫކް ޝޯ އަދި މެންޗެސްޓާ ސިޓީގެ ވިންގް، ޖެކް ގްރީލިޝް އާއި މިޑްފީލްޑަރު، ކަލްވިން ފިލިޕްސް ހިމެނެ އެވެ.
