ފޯރިގަދަ މާހައުލެއްގައި 32 ސްކޫލަކުން 900 އަށް ވުރެ ގިނަ ކުދިންނާ އެކު ތިން ވަނަ "މަމެން" އިންޓަ ސްކޫލް ސައިކްލިން ޗެމްޕިއަންޝިޕް ހުޅުމާލޭގައި މިއަދު ފަށައިފި އެވެ.
ދިރާގާއި ބައިކް މޯލްޑިވްސް ގުޅިގެން ބާއްވާ ސްކޫލް ސައިކްލިން މުބާރާތް އެންމެ ފުރަތަމަ ބާއްވާފައިވަނީ 2018 ވަނަ އަހަރުގަ އެވެ. އޭގެ ފަހުން ދެ ވަނަ މުބާރާތް 2019 ގައި ބޭއްވި އެވެ. ތިން ވަނަ މުބާރާތް ކޮވިޑު-19ގެ ސަބަބުން ލަސްކުރުމަށް ފަހު މިއަދު ފަށާފައިވަނީ 13 އަހަރުން ދަށުގެ އުމުރުފުރާގެ އިވެންޓުތަކުންނެވެ.
ރާއްޖޭގައި ބާއްވާ އެންމެ ބޮޑު ސައިކްލިން ހަރަކާތުގެ ގޮތުގައި ފާހަގަވެފައިވާ މަމެން" އިންޓަ ސްކޫލް ސައިކްލިން ޗެމްޕިއަންޝިޕް ގައި ފަސް އުމުރުފުރާ އަކުން ކުދިން އަންނަނީ ވާދަކުރަމުންނެވެ. އެއީ 11 އަހަރުން ދަށާއި، 13 އަހަރުން ދަށާއި، 15 އަހަރުން ދަށާއި، 17 އަހަރުން ދަށް އަދި 19 އަހަރުން ދަށެވެ.
މުބާރާތުގައި މިއަދު ހެނދުނު ކުރިއަށްދިޔައީ 13 އަހަރުން ދަށުގެ އަންހެން އަދި ފިރިހެން 200 މީޓަރު ރޭސްތަކެވެ. މިއަދު މެންދުރު ފަހު ކުރިއަށްދާނީ 15، 17 އަދި 19 އަހަރުން ދަށުގެ 200 މީޓަރު ރޭސްތަކެވެ.
"މަމެން" އިންޓަ ސްކޫލް ސައިކްލިން ޗެމްޕިއަންޝިޕް 2022ގެ ތެރެއިން - ފޮޓޯ: އަދަދު / އިސްމާއިލް އަޒްމީން
މާދަމާ ހެނދުނު ކުރިއަށްދާނީ 13 އަހަރާއި ދަށާއި 15 އަހަރުން ދަށުގެ އެއް ކިލޯމީޓަރުގެ ރޭސްތަކެވެ. އޭގެ ފަހުން މެންދުރު ފަހު 17 އަހަރުން ދަށާއި، 19 އަހަރުން ދަށުގެ 3 ކިލޯމީޓަރު ރޭސްތައްވެސް ކުރިއަށްދާނެ އެވެ. ހުރިހާ އުމުރުފުރައެއްގެ ޓީމްބައި އޮތީވެސް މާދަމާ އެވެ. މާދަމާގެ އެންމެ ފަހު ހަރަކާތަކީ 11 އަހަރުން ދަށުގެ ކުދިންނަށް ޚާއްސަކޮށްގެން ކުރިއަށްގެންދާ "ކިޑްސް ފަން ރައިޑް" އެވެ.
"މަމެން" އިންޓަ ސްކޫލް ސައިކްލިން ޗެމްޕިއަންޝިޕްގެ މައިގަނޑު މަގުސަދަކީ ސްކޫލު ކުދިންގެ މެދުގައި ބައިސްކަލް ދުއްވުމަށް ޝައުގުވެރިކަން އިތުރުކުރުމާއިއެކު، ކުޑައިރުއްސުރެ ދުޅަހެޔޮ ސިއްހަތެއްގައި ދިރިއުޅުން ބައްޓަން ކުރުމަށް އެހީތެރިވެދިނުން ކަމުގައި މުބާރާތް އިންތިޒާމް ކުރާ ފަރާތުން ހާމަކުރެ އެވެ.
ދިރާގާއިއެކު މި މުބާރާތް ބޭއްވުމުގައި އެންމެ ބޮޑަށް ބައިވެރިވަމުން އަންނަ ބައިކް މޯލްޑިވްސް އަކީ "އިންޓަނޭޝަނަލް ސައިކްލިސްޓް ޔޫނިއަން" ގެ މެންބަރަކަށްވުމާއިއެކު ބައިނަލްއަގްވާމީ މުބާރާތްތަކަށް ސްކޫލްތަކުގެ ކުދިން ލޯ ހުޅުވައިދީ ބޭރުގެ މުބާރާތްތަކަށް ކުދިން ތަމްރީންކުރުމަކީވެސް މި މުބާރާތް ބޭއްވުމުގެ އެއް މަގުސަދެވެ.
