ލަންޑަން (ސެޕްޓެމްބަރު 12) - ޗެލްސީ އާއި އެތުލެޓިކޯ މެޑްރިޑަށް ކުރިން ކުޅުނު ސްޕެއިންގެ ފޯވަޑް ޑިއޭގޯ ކޮސްޓާ އިނގިރޭސި ޕްރިމިއާ ލީގުގެ ވުލްވްސް އަށް ސޮއިކޮށްފި އެވެ.
ވުލްވްސް އިން ކޮސްޓާ އަށް ކޮންޓުރެކްޓެއް ހުށަހަޅަނީ އެ ކްލަބާ ދާދި ފަހުން ކުޅުނު ފޯވަޑް ސާސާ ކަލަޑްޒިކާއި މެކްސިކޯގެ ފޯވަޑް ރައުލް ހިމެނޭޒަށް އަނިޔާވެ، އެ ކްލަބަށް ވަގުތުން ވަގުތަށް ފޯވަޑެއް ބޭނުންވާތީ އެވެ.
ސްޕެއިންގެ ގައުމީ ޓީމަށް ވެސް ކުޅެފައިވާ ކޮސްޓާ ،33، ވަނީ ވަނީ ވުލްވްސްގެ ޓްރައިލްއެއް ވެސް ފުރިހަމަކޮށްފަ އެވެ.
"ކޮސްޓާ އަކީ ވަރަށް ތަޖުރިބާކާރު ކުޅުންތެރިއެއް. ކޮސްޓާގެ ފަރާތުން މި ވަގުތު ޓީމަށް ވަރަށް ބޭނުންވާ ކަންތައްތަކެއް ލިބިގެންދާނެ،" ވުލްވްސްގެ ޗެއާމަން ޖެފް ޝީ ވިދާޅުވި އެވެ.
ކޮސްޓާ ވުލްވްސް ކުޅުންތެރިއެއްގެ ގޮތުގައި މީޑިއާ އަށް ތައާރަފްކުރުމަށް ދޫކޮށްލި ޕްރޮމޯ ވީޑިއޯގެ ޝޫޓިންގެ ތެރެއިން.
ކޮސްޓާ ވުލްވްސް އަށް މި ސޮއިކުރީ އޭނާގެ ވޯކް ޕާމިޓް ހޯދުމަށް ވުލްވްސް އަށް ކުރިމަތިިވި މައްސަލަތައް ހައްލުކުރުމަށް ފަހު އެވެ. ކޮސްޓާ އަށް ވިސާ ހޯދަން އުނދަގޫވީ ޖެނުއަރީ މަހުން ފެށިގެން އޭނާ އެއްވެސް ކްލަބަކަށް ނުކުޅެ ހުރުމުންނެވެ. ކޮސްޓާ އެންމެ ފަހުން ކުޅުނީ ބްރެޒިލްގެ އެތުލެޓިކޯ މިނެއިރޯ އަށެވެ. އެކަމަކު، ޖެނުއަރީ މަހު އެ ކްލަބު ދޫކޮށްލި ފަހުން އޭނާ ހުރީ އެއްވެސް ކްލަބަކާ ނުގުޅި އެވެ.
ކޮސްޓާ ވުލްވްސްއާ ގުޅުނީ ފޯވަޑެއް ހޯދަން އެ ކްލަބަށް މުހިންމުވެފައި ވަނިކޮށެވެ. އިނގިރޭސި ލީގުގައި މިހާތަނަށް ކުޅުނު ހަ މެޗުން ވުލްވްސް އަށް ޖެހުނީ އެންމެ ތިން މެޗެވެ. އެ ޓީމު އޮތީ ތާވަލްގެ 14 ވަނައިގަ އެވެ.
ޗެލްސީއާއެކު ޕްރިމިއާ ލީގުގައި ކޮސްޓާ ވަނީ 120 މެޗުން 59 ލަނޑު ޖަހައިފަ އެވެ. -- އޭއެފްޕީ
